Mu bulelela, tudi mua kumona Bible mujima bu mukenji wa kudi Nzambi. Tatu wetu wa mu diulu mmutupeshaye bua kutulongesha. Kadi tukonkononayi mikenji ibidi ya pa buayi ivuabu bamanyishe kukadi bidimu bipite pa 2 000. Bavua bayimanyishe kudi muanjelu mukuabu “utu wimana pabuipi kumpala kua Nzambi,” dîna diende Gabaliele. (Luka 1:19) Mmu nsombelu kayi muvua muanjelu eu mumanyishe mikenji ya mushinga eyi?

Bidi bu mu tshidimu tshisatu kumpala kua Yezu. Nkuepi kuvua Gabaliele mumanyishile mukenji wa kumpala? Mmu mikuna ya Yudaya, pamuapa pabuipi ne Yelushalema, muaba uvua Zekâya muakuidi wa Yehowa musombele. Yeye ne muena kuende Elizabeta bakavua bantu bakulumpe, kadi kabavua ne bana to. Bua eu musangu, Zekâya ke udi wenza mudimu wa buakuidi ku ntempelo wa Nzambi mu Yelushalema. Patshidi Zekâya ku ntempelo, Gabaliele udi umueneka mu tshimpitshimpi pabuipi ne tshioshelu tshia musenga wa manananshi.

Bua buntu, Zekâya udi umvua buôwa. Kadi muanjelu udi umbusha Zekâya buôwa wamba ne: “Zekâya, kutshinyi to, bualu mbumvue kusengelela kuebe bimpe, mukajebe Elizabeta neakulelele muana wa balume, neumuinyike dîna ne: Yone.” Gabaliele udi wamba kabidi ne: Yone “neikale munene ku mêsu kua Yehowa” ne ‘nealongoluele Yehowa bantu bamana kulongolola.’​—Luka 1:13-17.

Bua Zekâya, bualu ebu kabuvua mua kuenzeka to. Bua tshinyi? Bua bukole bukavuabu yeye ne muena kuende Elizabeta. Ke Gabaliele kumuambila ne: “Neupuwe, kuyi mua kuakula, too ne dituku dienzeka malu aa, bualu kuena muitabuje mêyi anyi.”​—Luka 1:20.

Pine apu, bantu bavua pambelu bavua badiebeja bua tshinyi Zekâya uvua munenge bikole munda mushindu au. Ndekelu wa bionso wakapatuka, kadi kayi mua kuakula to. Zekâya uvua yeye unyungusha anu bianza patupu bua kuamba bualu. Bushuwa, uvua mumone bualu kampanda bua dikema pavuaye mu ntempelo.

Zekâya mumane kujikija mudimu wende ku ntempelo, udi upingana kuende. Abidi mmale asatu mmîpi, Elizabeta wakimita! Kusombaye kuende, kule ne bantu bua ngondo itanu, muindile diledibua dia muanende.

Pashishe Gabaliele wakamueneka musangu muibidi. Kudi nganyi? Kudi nsongakaji uvuabu kabayi banji kusela, diende Mariya uvua musombele ku nord mu tshitupa tshia buloba tshivuabu babikila ne: Galela, mu tshimenga tshia Nazaleta. Muanjelu wakamuambila tshinyi? Wakamuambila ne: “Udi muanyishibue kudi Nzambi.” Gabaliele wakambila kabidi Mariya ne: “Tangila! newimite difu, neulele muana wa balume, udi ne bua kumuinyika ne: Yezu.” Gabaliele udi usakidila ne: “Yeye eu neikale munene, nebamubikile ne: Muana wa Mutambe Bunene, . . . ne neakokeshe bu Mukalenge ku mutu kua nzubu wa Yakoba bua kashidi, Bukalenge buende kabuakuikala ne ndekelu to.”​—Luka 1:30-33.

Udi mumone muvua Gabaliele mudimone wa diese bua kumanyisha mikenji ibidi eyi anyi? Patudi tuenda tubala malu a bungi adi atangila Yone ne Yezu, netumone bimpe bua tshinyi mikenji eyi idi ifumina mu diulu idi ne mushinga wa bungi.