Yezu ukavua mupeshe bayidi bende tshilejilu bua kuikala ne disuminyina mu disambila. (Luka 11:5-13) Udi mua kuikala mpindieu mu Samalea anyi mu Galela, ne udi kabidi ushindika mushinga wa kusuminyina mu disambila. Udi wenza nunku ne tshilejilu tshikuabu etshi:

“Mu tshimenga tshikuabu muvua mulumbuluishi kampanda uvua kayi utshina Nzambi ne kayi unemeka muntu. Kuvua kabidi mukaji mukamba mukuabu mu tshimenga atshi uvua utungunuka ne kuya kudiye, wamba ne: ‘Enzaku bua kukosa tshilumbu tshianyi ne muntu undi nende tshilumbu biakane.’ Kadi, bua tshikondo kampanda yeye kavua musue kumuitabila to, kadi pashishe wakadiambila ne: ‘Nansha mundi tshiyi ntshina Nzambi anyi nnemeka muntu nansha umue, kadi bu mudi mukaji mukamba eu utungunuka anu ne kuntatshisha, nengenze bua kukosa tshilumbu tshiende biakane bua katungunuki ne kulua kuntshiokesha bikole ne dilomba diende to.’”​—Luka 18:2-5.

Yezu wakafila dilongesha wamba ne: “Umvuayi tshivua mulumbuluishi eu muambe nansha muvuaye kayi muakane! Nunku, bushuwa, Nzambi kakuenza bua kubingisha basungula bende badi bamudidila munya ne butuku, patshidiye ne lutulu kudibu anyi?” (Luka 18:6, 7) Kadi ntshinyi tshidi Yezu wamba bua Tatuende?

Yezu kavua bushuwa usua kuamba nansha kakese ne: Yehowa Nzambi udi bu mulumbuluishi udi kayi muakane eu to. Uvua usua kuamba ne: bikala mulumbuluishi udi kayi muakane wandamuna milombu ya disuminyina, Nzambi neenze bushuwa bia muomumue. Mmuakane ne mmuimpe, ne neandamune padi bantu bende basuminyina ne kumusambila. Tudi mua kumona bualu ebu ku tshivua Yezu muambe kabidi etshi: “Ndi nnuambila ne: [Nzambi] neenze bua kubabingisha ne lukasa.”​—Luka 18:8.

Bantu kabatu misangu yonso benzela bapuekele ne bapele malu ne buakane to, kadi batu benzela babanji ne bantu badi ne bukole malu ne bulenga. Kadi Nzambi yeye katu wenza nanku to. Pakumbana tshikondo, neenze bua bantu babi banyokibue ne bua batendeledi bende bapete muoyo wa tshiendelele.

Mbanganyi badi ne ditabuja bu dia mukaji mukamba au? Mbantu bungi kayi badi bushuwa bitaba ne: Nzambi “neenze bua kubabingisha ne lukasa”? Yezu uvua ufuma ku difila tshilejilu bua kuleja mudibi ne mushinga bua kusuminyina mu disambila. Mpindieu bua kuleja mudi disambila ne bukole, udi webeja ne: “Padi Muana wa muntu ulua, neasangane bulelela ditabuja edi pa buloba anyi?” (Luka 18:8) Dilongesha didi ne: palua Kristo, bantu ba bungi kabakuikala ne ditabuja edi to.

Bamue bantu bavua bateleja pavua Yezu wakula bavua badiamba muvuabu ne ditabuja. Bavua badimona bikale bakane, ne bapepeja bantu bakuabu. Yezu wakapesha bantu ba mushindu eu tshilejilu etshi:

“Bantu babidi bakabanda ku ntempelo bua kusambila, umue uvua Mufalese ne mukuabu mulambuishi wa bitadi. Mufalese wakimana, kutuadijaye kusambila munda munda bua malu aa: ‘Nzambi wanyi, ndi nkuela tuasakidila bualu tshiena bu bantu bakuabu, banyengianganyi ba bintu, bantu badi kabayi bakane, bena masandi, anyi bu mulambuishi wa bitadi eu to. Ntu mbuela mu tshijila tshia biakudia misangu ibidi ku lumingu; ntu mfila tshia dikumi tshia bintu bionso bindi mpeta.’”​—Luka 18:10-12.

 Bafalese bavua bamanyike bua muvuabu benza malu kumpala kua bantu bua babamone bu bakane. Bavua benza nunku bua bantu babamone. Bavua batamba kuenza nunku mu Dimue ne mu Dinayi, matuku avuaku bisalu binene bua bantu ba bungi babamone. Bavua bafuta tshia dikumi tshionso too ne bua bikunyibua bikese. (Luka 11:42) Ngondo mikese kumpala, bavua bapetule bantu ba bungi bamba ne: “Musumba wa bantu udi kawuyi mumanye Mikenji [bilondeshile mmuenenu wa Bafalese] eu mbantu bedibue mulawu.”​—Yone 7:49.

Yezu udi utungunuka ne tshilejilu tshiende wamba ne: “Kadi mulambuishi wa bitadi, uvua muimanyine yeye pa bule, kavua nansha musue kujula mêsu ende muulu to, kadi uvua udikuma pa tshiadi, wamba ne: ‘Nzambi wanyi, umfuilaku luse, meme muenji wa mpekatu.’” Eyowa, mulambuishi wa bitadi wakitaba ne budipuekeshi buonso bilema biende. Yezu udi ujikija wamba ne: “Ndi nnuambila ne: muntu eu wakapueka kuende, mubadibue muakane kupita Mufalese au. Bualu muntu yonso udi udibandisha nebamupuekeshe, kadi muntu yonso udi udipuekesha nebamubandishe.”​—Luka 18:13, 14.

Nunku Yezu wakaleja patoke mudibi ne mushinga bua kuikala ne budipuekeshi. Mubelu eu uvua ne mushinga bua bayidi bende bavua banyunguluka kudi Bafalese bavua badimona bakane ne batamba kuakula bua mianzu. Mubelu eu udi kabidi ne mushinga bua bayidi bonso ba Yezu.