Nansha muvua Yezu uya mu Yelushalema, uvua mua kuikala utshidi kua Zakayi ne bayidi bende. Bavua bamone ne: “Bukalenge bua Nzambi” bukavua pa kujadikibua mu katupa kîpi buikale ne Yezu bu Mukalenge. (Luka 19:11) Bavua bumvue bualu ebu bibi, anu muvuabu kabayi bumvue bimpe ne: Yezu uvua ne bua kufua. Ke bua tshinyi wakabapesha tshilejilu kampanda bua kubambuluisha bua kumona ne: Bukalenge kabuvua pabuipi to.

Wakamba ne: “Muntu mukuabu wa mu dîku dia bantu banene wakenza luendu kuya mu ditunga dia kule bua kuangata bukokeshi bua bukalenge, pashishe kupingana.” (Luka 19:12) Luendu lua nunku luvua ne bua kuangata matuku a bungi. Bushuwa Yezu ke “muntu mukuabu wa mu dîku dia bantu banene” uvua muye mu “ditunga dia kule,” mmumue ne: mu diulu, muvua Tatuende ne bua kumupesha bukokeshi bua bukalenge.

Mu tshilejilu etshi, kumpala kua “muntu mukuabu wa mu dîku dia bantu banene” kuya mu luendu, udi ubikila bapika dikumi ne upesha yonso dikuta dia mina ne ubambila ne: “Nuenduluke nawu mushinga too ne pandi mpingana.” (Luka 19:13) Makuta a mina mena dîna avua ne mushinga wa bungi. Dikuta dia mina divua difutu divua tshidime upeta munkatshi mua ngondo mipite pa isatu.

Bayidi bavua mua kuikala bajingulule ne: bavua bu bapika dikumi ba mu tshilejilu etshi, bualu Yezu ukavua mubafuanyikije ne banowi. (Matayi 9:35-38) Bulelela, kavua mubalombe bua kumutuadila ntete ya dinowa to. Kadi dinowa divua dienza ne bayidi bakuabu bavua mua kupeta muaba mu Bukalenge bua Nzambi. Bayidi bakenza mudimu ne bintu bivuabu nabi bua kupeta bantu ba bungi bavua ne bua kupiana Bukalenge.

Mmalu kayi makuabu avua Yezu muleje mu tshilejilu etshi? Wakamba ne: bena mu ditunga “bavua bamukine, kutumabu kasumbu ka baleji mpala panyima pende bua kuamba ne: ‘Katuena basue bua muntu eu alue mukalenge wetu to.’” (Luka 19:14) Bayidi bavua bamanye ne: bena Yuda kabavua bitaba Yezu to, bamue bakakeba too ne bua kumushipa. Panyima pa Yezu mumane kufua ne mubande mu diulu, bena Yuda mu kabujima bakaleja mmuenenu wabu bua Yezu pavuabu bakengeshe bikole bayidi bende. Baluishi aba bakaleja patoke ne: kabavua basue bua Yezu ikale Mukalenge to.​—Yone 19:15, 16; Bienzedi 4:13-18; 5:40.

Anu bu bapika dikumi, mmu mushindu kayi uvuabu benza mudimu ne mina yabu too ne pavua “muntu mukuabu wa mu dîku dia bantu banene” upeta “bukokeshi bua bukalenge” ne upingana? Yezu udi wamba ne: “Ndekelu wa bionso, pakapinganaye yeye mumane kuangata bukokeshi bua bukalenge, wakabikidisha bapika bavuaye mupeshe makuta, bua kumanya bivuabu bapete ku mushinga wabu. Nunku wa kumpala wakasemena, kuambaye ne: ‘Mukalenge, mina webe mmupatule mina dikumi.’ Wakamuambila ne: ‘Udi muenze bimpe, mupika muimpe! Bualu udi mudileje muena lulamatu mu bintu bikese menemene, ikala ne bukokeshi pa bimenga dikumi.’ Mpindieu muibidi wakalua, wamba ne: ‘Mukalenge, mina webe mmupatule mina itanu.’ Wakambila kabidi yeye au ne: ‘Wewe pebe ikala utangila bimenga bitanu.’”​—Luka 19:15-19.

Bu bayidi bobu bamone ne: bavua bu bapika bavua benze mudimu bikole ne bintu biabu bua kuvuija bayidi ba bungi, bavua ne bua kujadika ne: Yezu uvua ne bua kusanka. Bavua mua kutekemena ne: nebapete difutu bua tshisumi tshia nunku. Bulelela, bayidi bonso ba Yezu kabena ne nsombelu anyi mushindu wa kuenza malu ne mpunga bia muomumue to. Kadi Yezu uvua mupete “bukokeshi bua bukalenge” neamone lulamatu luabu ne neabeneshe madikolela abu a kuvuija bantu bayidi.​—Matayi 28:19, 20.

Kadi mona dishilangana didi Yezu uleja padiye ujikija tshilejilu etshi ne: “Kadi [mupika] mukuabu wakalua, wamba ne: ‘Mukalenge, mina webe umvua musokoke mu tshilamba nyeye eu. Udi mumone, mvua nkutshina, bualu utu muntu wa malu makole; utu wangata tshiuvua kuyi muteke, ne utu unowa tshiuvua kuyi mukune.’ Wakamuambila ne: ‘Ndi nkupisha ne mêyi ebe wewe, mupika mubi. Wewe uvua mumanye ne: ntu muena malu  makole, ntu ngangata tshimvua tshiyi muteke ne nnowa tshimvua tshiyi mukune, ki mmuomu? Nunku bua tshinyi kuvua mutekeshe makuta anyi mu nzubu wa dilamina makuta? Nanku pamvua ndua, mvua mua kuangata ne makasa.’ Ke yeye kuambila bantu bavua bimane muaba au ne: ‘Munyengayi mina au, numupeshe udi ne mina dikumi.’”​—Luka 19:20-24.

Bu muvua mupika eu mupangile bua kuvudija bubanji bua bukalenge bua mfumuende, mupika eu wakajimija bivuabu bamupeshe. Bapostolo bavua badianjile kumona mu lungenyi muvua Yezu ukokesha mu Bukalenge bua Nzambi. Nunku bilondeshile tshivua Yezu muambe bua mupika wa ndekelu eu, bavua mua kuikala bumvue ne: bobu kabayi ne tshisumi, kabakupeta muaba mu Bukalenge abu to.

Mêyi a Yezu avua ne bua kusaka bayidi ba lulamatu bua kuvudija madikolela abu. Udi ujikija ne: “Ndi nnuambila ne: muntu yonso udi ne tshintu, nebamupeshe bikuabu, kadi muntu udi kayi ne tshintu, nebamunyenge too ne tshidiye natshi.” Udi usakidila ne: bena lukuna bende bavua kabayi basue bua ikale “mukalenge wabu” nebabutudibue. Pashishe Yezu wakatungunuka ne luendu luende mutangile ku Yelushalema.​—Luka 19:26-28.