Pavua Yezu ne bayidi bende bajikije luendu luabu ku sud kua Peleya baya ku Yelushalema, bakasabuka Musulu wa Yadene pabuipi ne Yeliko. Bavua benza luendu elu ne bantu bakuabu bua kuya kuenza Pasaka wa mu 33 B.B.

Yezu udi wenda kumpala kua bayidi bende, mudisuike bua kufika mu tshimenga kumpala kua dîba bua kuenza Pasaka. Kadi bayidi badi ne buôwa. Kumpala, pavua Lazalo mufue ne pavua Yezu usua kuya mu Peleya mu Yudaya, Tomase wakambila bayidi bakuabu ne: “Tuyayi petu, bua tufue nende.” (Yone 11:16, 47-53) Nunku kuya mu Yelushalema kuvua ne njiwu, ne bidi biumvuika bua tshinyi bayidi bavua ne buôwa.

Bua kubalongolola ku tshivua ne bua kubafikila, Yezu wakaya ne bapostolo bende ku luseke ne kubambila ne: “Tudi tubanda ku Yelushalema, ne Muana wa muntu neafidibue mu bianza bia bamfumu ba bakuidi ne bafundi. Bobu nebamukosele tshibawu tshia lufu ne nebamufile mu bianza bia bantu ba bisamba bua bamuseke, bamuele mfimbu ne bamushipe ku mutshi; ne dituku disatu neajudibue.”​—Matayi 20:18, 19.

Eu mmusangu muisatu udi Yezu wambila bayidi bende bua lufu ne dibishibua diende ku lufu. (Matayi 16:21; 17:22, 23) Kadi bua musangu eu udi wamba ne: bavua ne bua kumushipela ku mutshi. Bakamuteleja, kadi kabavua bumvue tshivuaye usua kuamba to. Pamuapa bavua batekemene bua bukalenge bua Isalele bujadikibue pa buloba, bajinga bua kupeta lumu ne butumbi pamue ne Kristo mu bukalenge bua pa buloba.

Mamuende wa mupostolo Yakobo ne Yone, diende pamuapa Salome, udi munkatshi mua bena luendu aba. Yezu uvua mupeshe bapostolo babidi aba dîna divua diumvuija ne: “Bana ba Dikubakuba,” kakuyi mpata bualu bavua bafunafuna. (Mâko 3:17; Luka 9:54) Tshikondo kampanda, bayidi babidi aba bavua ne dijinga dia kuikala ne miaba ya lumu mu Bukalenge bua Kristo. Mamuabu uvua mumanye pende bualu abu. Udi uya kudi Yezu bua bualu buabu, umuinamina ne umulomba bua  amuenzele bualu kampanda buimpe. Yezu wakamuandamuna ne: “Udi musue tshinyi?” Yeye kuamba ne: “Amba dîyi bua bana banyi ba balume babidi aba basombe, umue ku tshianza tshiebe tshia balume ne mukuabu ku tshia bakaji, mu Bukalenge buebe.”​—Matayi 20:20, 21.

Dilomba edi divua mu bulelela difumina kudi Yakobo ne Yone. Bu muvua Yezu ne bua kutuilangana ne bundu ne dipuekeshibua milongo wakabambila ne: “Kanuena bamanye tshinudi nulomba to. Nudi mua kunua dikopo dinkadi pa kunua anyi?” Bakandamuna ne: “Tudi mua kunua.” (Matayi 20:22) Kadi pamuapa kabavua bumvue tshivua bualu ebu mua kubalomba to.

Nansha nanku, Yezu wakabandamuna ne: “Bushuwa nenunue dikopo dianyi, kadi bua kusomba ku tshianza tshianyi tshia balume ne ku tshia bakaji, ki mbualu buanyi bua kufila to, kadi nkua bantu bakadibu bakulongoluele kudi Tatu wanyi.”​—Matayi 20:23.

Pakumvua bapostolo bakuabu dikumi dilomba dia Yakobo ne Yone bakanyingalala. Yakobo ne Yone bavuaku bakule ne dîyi dikole mu dikokangana dia kumpala divua dienzeke pankatshi pa bapostolo bua kumanya uvua mutambe bakuabu anyi? (Luka 9:46-48) Nansha nanku, dilomba edi diakaleja ne: bayidi dikumi ne babidi kabavua batumikile mubelu wa Yezu uvuaye mubapeshe bua kuenza malu bu bantu bapuekele to. Batshivua anu ne dijinga dia kupeta miaba minene.

Yezu wakapangadija bua kujikija dikokangana dia ndekelu edi ne dilaminangana munda divuadi mua kukebesha. Wakabikila bayidi bende bonso dikumi ne babidi ne kubabela ne dinanga dionso wamba ne: “Nudi bamanye ne: badi bamueneka bu badi bakokesha bisamba badi babakokesha ne bumfumu buonso, bantu babu banene badi babaleja mudibu ne bukokeshi. Kabiena ne bua kuikala nanku munkatshi muenu to; kadi muntu yonso udi musue kulua munene munkatshi muenu, udi ne bua kuikala muena mudimu wenu, ne muntu yonso udi musue kuikala wa kumpala munkatshi muenu, udi ne bua kuikala mupika wa bonso.”​—Mâko 10:42-44.

Yezu wakafila tshilejilu tshiende tshivuabu ne bua kuidikija wamba ne: ‘Muana wa muntu wakalua, ki mbua bamuenzele mudimu to, kadi mbua kuenzela bakuabu mudimu ne kufila muoyo wende bu tshia kupikulangana natshi pa muaba wa bantu ba bungi.’ (Matayi 20:28) Munkatshi mua bidimu bisatu, Yezu wakenzela bantu bakuabu mudimu. Wakenza kabidi nanku kufikaye too ne ku difua bua bukua bantu! Bayidi bavua ne bua kuikala ne lungenyi lua buena lua Kristo alu lua kuenzela bakuabu mudimu pamutu pa kujinga bua babenzele bobu, lua kuikala bapuekele pamutu pa kukeba miaba minene.