Pavua bapostolo ba Yezu munkatshi mua dienza mudimu wabu wa diyisha mu Galela, muntu uvua mumanyishe Yezu kudi bantu kavua kabidi ne budikadidi ebu to. Yone Mubatiji uvua mu buloko kukavua bidimu bitue ku bibidi.

Yone uvua mumanyishe patoke ne: kabivua bimpe bua mukalenge Helode Antipa kuangataye Helodiya, mukaji wa muanabu Filipo, bu mukajende to. Helode uvua mushipe dibaka ne mukajende wa kumpala bua kusela Helodiya. Bilondeshile Mikenji ya Mose, ivua Helode wamba mudiye utumikila, dibaka dia nunku ndia masandi ne mikenji kayena idianyisha to. Bua mubelu wa Yone au, Helode wakamuelesha mu buloko, pamuapa muenzeja kudi Helodiya.

Helode kavua mumanye tshia kuenzela Yone to, bualu bantu bavua “bamuangata bu muprofete.” (Matayi 14:5) Kadi Helodiya ukavua ne tshivuaye musuike bua kuenza. ‘Mmumulamine tshiji,’ ne mu bulelela wakatungunuka ne kukeba bua bamushipe. (Mâko 6:19) Ndekelu wa bionso, mpunga wakamueneka.

Matuku makese kumpala kua Pasaka wa mu 32, Helode wakalongolola difesto dinene bua kusekelela mufikilu wa diledibua diende. Banene bonso ba mu bukalenge bua Helode ne bamfumu ba basalayi, too ne balombodi ba bimenga bia Galela mbalue mu difesto adi. Munkatshi mua tshibilu, badi batuma Salome, muana wa bakaji wa Helodiya uvuaye mulele ne bayende wa kumpala, Filipo, bua kujiila benyi maja. Bantu bavua basanka bikole bua njiilu wende mulenga.

Bu muvua Helode musanke bikole bua muana wa bakaji eu, udi umuambila ne: “Ndomba tshionso tshiudi musue, nenkupeshatshi.” Udi mene uditshipa ne: “Tshionso tshiudi ulomba, nenkupeshatshi, too ne ku tshia bibidi tshia bukalenge buanyi.” Kumpala kua Salome kuandamuna, udi upatuka, uya kudi mamuende umukonka ne: “Ndombe tshinyi?”​—Mâko 6:22-24.

Helodiya mmupete mpunga uvuaye ukeba! Wakandamuna diakamue ne: “Mutu wa Yone Mubatiji.” Diakamue Salome wakapingana kudi Helode, umulomba ne: “Ndi musue umpeshe mpindieu mutu wa Yone Mubatiji pa dilongo.”​—Mâko 6:24, 25.

Dilomba edi divua dinyingalaje Helode bikole, kadi babikidibue bende bavua bumvue muvuaye muditshipe kudi Salome. Bidi bimutonda bua kubenga kukumbaja dilomba edi, nansha muvuabi bilomba bua kushipa muntu uvua kayi ne bualu. Nunku, Helode uvua utuma mulami wende ku buloko, mumuambile malu a kuenza avua enza buôwa. Katupa kîpi pashishe, mulami eu udi upingana ne mutu wa Yone mu dilongo. Udi uwupesha Salome, ne yeye pende udi uya nawu kudi mamuende.

Padi bayidi ba Yone bumvua tshidi tshienzeke, badi balua, bumbusha tshitalu tshia Yone, ne batshijiika. Pashishe badi batuadila Yezu lumu elu.

Padi Helode ulua kumvua lumu lua mudi Yezu wondopa bantu ne wipata bademon, udi umvua buôwa. Udi udiebeja bikala muntu udi wenza malu aa, mmumue ne: Yezu, muikale menemene Yone Mubatiji, mpindieu “mujudibue ku lufu.” (Luka 9:7) Ke bualu kayi Helode Antipa udi ukeba ne muoyo mujima bua kumona Yezu. Bushuwa, kena ukeba bua kumvua mudi Yezu uyisha to. Kadi Helode uvua ukeba kumona Yezu bua kujadika bikala bualu buvua bumutatshisha bulelela anyi bua dishima.