Yezu wakambila bayidi bende malu matambe buimpe a kuenza a mua kukumbaja mudimu wa diyisha pavuabu baya babidi babidi. Kadi kavua muimanyina anu apu to. Wakabadimuija ne bulenga buonso bua baluishi babu, wamba ne: “Monayi! Ndi nnutuma bu mikoko munkatshi mua mbua ya ditu . . . Nudimukile bantu, bualu nebanufile ku bilumbuluidi biabu, nebanuele mfimbu mu nsunagoga yabu. Nebaye nenu kumpala kua banguvena ne bakalenge bua bualu buanyi.”​—Matayi 10:16-18.

Eyowa, bayidi ba Yezu bavua mua kutuilangana ne buluishi bukole, kadi wakabalaya ubajadikila ne: “Panufilabu, kanuditatshishi bua mushindu wa kuakula anyi bua tshia kuamba to, bualu tshinudi ne bua kuamba nebanupeshatshi pa dîba adi; bualu ki nganu nuenu badi bakula to, kadi nyuma wa Tatu wenu ke udi wakuila mukana muenu.” Yezu wakatungunuka wamba ne: “Muntu neafile muanabu ku lufu, tatu neafile muanende, bana nebatombokele baledi babu ne nebabashipeshe. Nunku nebanukine kudi bantu bonso bua dîna dianyi, kadi muntu udi munanukile too ne ku nshikidilu neapandishibue.”​—Matayi 10:19-22.

Bu muvua mudimu wa diyisha ne mushinga wa bungi, Yezu wakaleja bayidi bende muvuabi ne mushinga bua kuikala badimuke bua bikale ne budikadidi bua kukumbaja mudimu eu. Wakamba ne: “Padibu banukengesha mu tshimenga kampanda, nunyemene mu tshikuabu; bualu, bulelela ndi nnuambila ne: kanuakutuangaja bimenga bionso bia mu Isalele Muana wa muntu kayi mufike nansha.”​—Matayi 10:23.

Aa mmalu a kuenza, madimuija ne mêyi adi akankamija bia pa buabi bidi Yezu wambila bapostolo bende 12! Kadi udi mua kumona ne: mêyi aa adi kabidi ne mushinga bua bantu balua kuenza mudimu wa diyisha eu panyima pa lufu lua Yezu ne dibishibua diende ku lufu. Bualu ebu budi bumuenekela mu mêyi avuaye muambile bayidi bende aa: “Nebanukine kudi bantu bonso,” ki nganu kudi bantu badi bapostolo ne bua kuya kuyisha to. Bualu bukuabu, kakuena muaba udibu bafunde mudibu baya ne bapostolo kumpala kua banguvena ne bakalenge mu tshikondo tshîpi tshidibu bayisha mu Galela etshi anyi babafila ku lufu kudi bena mu mêku abu to.

Bidi bimueneka patoke ne: Yezu udi wambila bapostolo malu aa mutume meji ende ku matuku atshilualua. Tangila mudiye wamba ne: bayidi bende kabakujikija kuyisha miaba yonso “Muana wa muntu kayi mufike nansha.” Yezu udi uleja ne: bayidi bende kabakujikija kuyisha bua Bukalenge bua Nzambi kumpala kua Mukalenge Yezu Kristo udi mutumbishibue kuluaye bu mulumbuluishi udi Nzambi muteke to.

Pavua bapostolo benza mudimu wabu wa diyisha, kabavua ne bua kukema pavuabu batuilangana ne buluishi to, bualu Yezu wakamba ne: “Mulongi kena ku mutu kua mulongeshi wende, anyi  mupika ku mutu kua mfumuende to.” Tshidi Yezu wamba ntshitoke. Bavua bamuenzela malu mabi ne bamukengesha bua muvuaye uyisha Bukalenge bua Nzambi, ne ke tshiabenzelabu pabu. Kadi Yezu wakabadimuija ne: “Kanutshinyi badi bashipa mubidi kadi kabayi mua kushipa anyima, kadi nutshine yeye udi mua kubutula anyima ne mubidi mu Ngena.”​—Matayi 10:24, 28.

Yezu uvua mushiye tshilejilu tshimpe mu bualu ebu. Wakatantamena lufu kayi ne buôwa pamutu pa kunyanga muoyo wende mutoke kudi Yehowa, muntu udi ne bukole buonso. Nzambi wa Bukole Buonso ke udi mua kushipa “anyima” wa muntu (mmumue ne: ditekemena dia muoyo wa mu matuku atshilualua) anyi udi mua kumubisha bua apete muoyo wa tshiendelele. Ela meji mudi bualu ebu ne bua kuikala bukoleshe bapostolo!

Yezu udi ufila tshilejilu bua kuleja mudi Nzambi uditatshisha ne dinanga bua bayidi bende mu mushindu eu: “Batu bapana mishamisha ibidi ku dikuta dimue dia tshinjanja dia mushinga mukese, ki mmuomu anyi? Kadi nansha umue wa kudiyi kawakumata panshi Tatu wenu kayi mumanye to. . . . Nunku kanutshinyi to; nudi ne mushinga wa bungi kupita mishamisha ya bungi.”​—Matayi 10:29, 31.

Mukenji uvua bayidi ba Yezu bayishe newutapulule bantu ba mu nzubu umue, mmumue ne: bamue bena mu mêku nebawitabe ne bakuabu nebawubenge. Yezu wakumvuija ne: “Kanuedi meji ne: mvua mulue bua kufila ditalala pa buloba.” Eyowa, bidi bilomba dikima bua muena mu dîku umue kulamata bulelela bua mu Bible. Yezu wakaleja ne: “Muntu yonso udi munange tatuende anyi mamuende kupita mudiye munnange, ki mmunkumbanyine to; muntu yonso udi munange muanende wa balume anyi muanende wa bakaji kupita mudiye munnange, ki mmunkumbanyine to.”​—Matayi 10:34, 37.

Kadi, bamue bantu nebakidile bayidi bende bimpe. Wakamba ne: “Muntu yonso udi upesha umue wa ku bantu bakese aba anu dikopo dia mâyi matalale a kunua patupu bualu mmuyidi, ndi nnuambila mu bulelela ne: kakupangila difutu diende nansha kakese.”​—Matayi 10:42.

Bu muvuabu bambile bapostolo malu a kuenza, madimuija, ne dikankamija, badi baya ‘bapitshila mu tshitupa atshi, ku musoko ne ku musoko benda bamba lumu luimpe ne bondopa bantu miaba yonso.’​—Luka 9:6.