Ku est kua Mbuu wa Galela, Yezu wakadiisha bantu binunu bia bungi mu tshishima ne pashishe kunyemaye pavuabu bakeba kumuvuija mukalenge. Butuku bua dituku adi wakendela pa mbuu uvua ne mavuala makole, ne kusungilaye Petelo uvua pende muendele pa mâyi kadi mutuadije kudina pavua ditabuja diende ditekete. Yezu wakabatamija kabidi tshipepele, pamuapa bua kusungila bayidi bende bavua bakeba kudina ne buatu.

Mpindieu Yezu udi upingana ku ouest kua mbuu, luseke luvua Kapênuma. Bantu bavuaye mudiishe mu tshishima abu bakamumona kutuadijabu kumuebeja ne: “Uvua mufike muaba eu dîba kayi?” Yezu wakababela wamba ne: bavua bamukeba anu bua abadiishe kabidi. Ke yeye kubambila ne: “Enzayi mudimu bua biakudia bidi bishala bua muoyo wa tshiendelele.” Nunku bakamuebeja ne: “Tudi ne bua kuenza tshinyi bua kukumbaja midimu ya Nzambi?”​—Yone 6:25-28.

Bavua mua kuikala bela meji bua malu a mu Mikenji, kadi Yezu wakakula bua mudimu uvua ne mushinga wa bungi wamba ne: “Mudimu wa Nzambi udi nunku: nuleje ditabuja mu muntu udiye mutume.” Kadi bantu kabavua baleje Yezu ditabuja dia nunku to, nansha muvuaye muenze malu a bungi. Bavua balomba ne: enza tshimanyinu kampanda bua bobu kushisha kumuitabuja. Bakebeja ne: “Mmudimu kayi uudi wenza? Bankambua betu bavua badie mana mu tshipela, anu mudibu bafunde ne: ‘Wakabapesha diampa dia mu diulu bua kudia.’”​—Yone 6:29-31; Misambu 78:24.

Bu muvua bantu balomba tshimanyinu, Yezu wakatuma ntema yabu kuvua bishima bifuma wamba ne: “Ndi nnuambila ne: Mose kavua munupeshe diampa dia mu diulu to, kadi Tatu wanyi udi unupesha diampa dilelela dia mu diulu. Bualu diampa dia Nzambi nyeye udi ufuma mu diulu ne upesha ba pa buloba muoyo.” Bu muvuabu kabayi bumvue tshivuaye usua kuamba, bakamulomba ne: “Mukalenge, ikala anu utupesha diampa edi.” (Yone 6:32-34) Kadi ‘ndiampa’ kayi divua Yezu wakuila?

Udi umvuija ne: “Ndi diampa dia muoyo. Muntu yonso udi ulua kundi kakumvua kabidi nzala nansha kakese, ne muntu yonso udi uleja ditabuja kundi, kakumvua kabidi nyota nansha kakese. Kadi anu mumvua munuambile: nudi bammone, kadi kanuena nuitabuja. . . . Tshiena mufume mu diulu bua kuenza disua dianyi, kadi mbua kuenza disua dia yeye uvua muntume. Disua dia yeye uvua muntume didi nunku: tshijimiji muntu nansha umue wa mu bantu bonso badiye mumpeshe, kadi mbabishe ku lufu dituku dia ku nshikidilu. Bualu disua dia Tatu wanyi didi nunku: muntu yonso udi ujingulula Muana ne uleja ditabuja kudiye, ikale ne muoyo wa tshiendelele.”​—Yone 6:35-40.

Bualu ebu buakafiikisha bantu munda, ne bena Yuda bakatuadija kunungana bua bualu buende. Mmunyi mudiye mua kuamba ne: udi “diampa didi difume mu diulu.” (Yone 6:41) Buabu bobu, udi anu muana wa baledi ba mu tshimenga tshia Galela wa mu Nazaleta. Bantu badi bebeja ne: “Eu ki n’Yezu muana wa Jozefe, utudi bamanye tatuende ne mamuende anyi?”​—Yone 6:42.

Yezu udi wamba ne: “Lekelayi kunungana munkatshi muenu. Muntu kena mua kulua kundi padi Tatu uvua muntume kayi mumukoke nansha, ne nemmubishe ku lufu dituku dia ku nshikidilu. Mbafunde mu mikanda ya Baprofete ne: ‘Buonso buabu nebalongeshibue kudi Yehowa.’ Muntu yonso udi muteleje Tatu ne mulonge udi ulua kundi. Kakuena muntu ukadi mumone Tatu, anu yeye udi mufume kudi Nzambi; yeye eu ukadi mumone Tatu. Bulelela, bulelela, ndi nnuambila ne: muntu yonso udi witabuja udi ne muoyo wa tshiendelele.”​—Yone 6:43-47; Yeshaya 54:13.

Pavua Yezu muyukile ne Nikodemo, wakakula bua muoyo wa tshiendelele ne kuwusuikakajaye ne ditabuja mu Muana wa muntu wamba ne: “Muntu yonso udi uleja ditabuja kudi [Muana mulela umuepele wa Nzambi] kabutudibu, kadi apete  muoyo wa tshiendelele.” (Yone 3:15, 16) Kadi mpindieu udi wakula kumpala kua bantu ba bungi, ubambila mudiye ne mudimu kampanda mu kupeta kuabu kua muoyo wa tshiendelele, udi nansha mana anyi mampa avua amueneka bikole mu Galela kaayi mua kuwufila to. Nunku mmunyi mudibu mua kupeta muoyo wa tshiendelele? Yezu udi wambulula mêyi ende wamba ne: “Ndi diampa dia muoyo.”​—Yone 6:48.

Muyuki wabu uvua utangila diampa dia mu diulu udi utungunuka, ufika ku ndekelu padi Yezu ulongesha mu nsunagoga wa mu Kapênuma.