Pavua Yezu ulongesha bantu mu buloba bua Kaisalia wa Filipoyi buvua mu ntanta wa kilometre mitue ku 25 kumbukila ku Mukuna wa Hêmona, wakamanyisha bapostolo bende bualu bua disanka wamba ne: “Bulelela ndi nnuambila ne: kudi bamue ba ku badi bimane muaba eu bikala kabayi mua kulabula lufu nansha, too ne padibu banji kumona Muana wa muntu ulua mu Bukalenge buende.”​—Matayi 16:28.

Bayidi bavua mua kuikala badiebeja tshivua Yezu usua kuamba. Bu lumingu lumue pashishe, wakangata basatu ba ku bapostolo bende aba Petelo, Yakobo, ne Yone bua kuya nabu pa mutu pa mukuna mutumbuke kampanda. Bivua mua kuikala butuku bualu bayidi basatu abu bakavua ne tulu. Pavua Yezu usambila, udi wandamuka kumpala kuabu. Bapostolo bende badi bamona ku mêsu kuende kutua nsese bu dîba ne bilamba biende biengelela bu butoke bua menemene.

Pashishe bimfuanyi bivuabu bajingulule bu “Mose ne Eliya” biakamueneka. Bakatuadija kuyukila ne Yezu bua ‘diya diende, dikavuaye pa kukumbaja mu Yelushalema.’ (Luka 9:30, 31) Diya dia Yezu edi divua bushuwa ditangila lufu luende ne dibishibua diende ku lufu dikavua pa kulua, bivuaye ufuma ku diakuila. (Matayi 16:21) Muyuki eu uvua muleje ne: bishilangane ne tshivua Petelo muambe, lufu lua Yezu lua bundu kaluvua tshintu tshia kuepuka to.

Mpindieu bu mudi tulu tuonso tujike bapostolo mu mêsu, badi bakema bua bidibu bamona ne bumvua. Etshi ntshikena kumona, kadi tshivua tshimueneka bu bualu bulelela kudi Petelo bienza bua adibuinke mu tshidi tshienzeka wamba ne: “Labi, mbitambe buimpe mutudi muaba eu. Nanku tuase ntenta isatu: umue webe, umue wa Mose, ne umue wa Eliya.” (Mâko 9:5) Petelo uvuaku ujinga bua base ntenta bua tshikena kumona etshi tshitungunuke anyi?

Patshivua Petelo wakula, ditutu ditoke diakababuikila, ne dîyi diakafuma mu ditutu edi diamba ne: “Eu udi Muananyi, munanga, undi muanyishe. Mutelejayi.” Pakumvua bapostolo dîyi edi, bakumvua buôwa kutuabu mpala yabu panshi, kadi Yezu wakabambila ne: “Jukayi. Kanutshinyi to.” (Matayi 17:5-7) Padibu bajukuluka, bapostolo basatu aba kabena bamona muntu mukuabu to, anu Yezu nkayende. Tshikena kumona etshi tshidi tshijika. Padi butuku butshia ne benda bapueka ku mukuna, Yezu udi ubatumina dîyi ne: “Kanuambidi muntu nansha umue tshikena kumona etshi too ne pajudibua Muana wa muntu ku lufu.”​—Matayi 17:9.

Dimueneka dia Eliya mu tshikena kumona etshi didi dijula lukonko. Bapostolo badi bebeja ne: “Bua tshinyi bafundi badi bamba ne: Eliya udi ne bua kuanji kulua kumpala?” Yezu wakabandamuna ne: “Eliya ukadi mulue, ne kabavua bamujingulule to.” (Matayi 17:10-12) Yezu uvua wakula bua Yone Mubatiji uvua mukumbaje mudimu wa muomumue ne Eliya. Eliya wakalongoluela Elisha njila ne Yone wakenza pende nanku bua Kristo.

Tshikena kumona etshi tshivua tshikoleshe Yezu ne bapostolo bende. Tshivua tshidianjila kuleja butumbi bua Bukalenge bua Kristo. Nunku Bayidi bakamona “Muana wa muntu ulua mu Bukalenge buende,” anu mukavua Yezu mulaye. (Matayi 16:28) Patshivuabu pa mukuna, bavua “bamonyi ba butumbi buende bunene.” Nansha muvua Bafalese bajinga tshimanyinu tshivua tshileja ne: Yezu uvua Mukalenge uvua Nzambi musungule, kakabaleja nansha tshimue to. Kadi bayidi ba Yezu bavua bamulamate bikole bakamona diandamuka dia Yezu divua dikumbaja mêyi a buprofete avua atangila Bukalenge. Nunku, Petelo wakalua kufunda pashishe ne: “Tudi ne dîyi dia buprofete dijadika bimpe menemene.”​—2 Petelo 1:16-19.