Mu nsunagoga wa mu Kapênuma, Yezu uvua ulongesha bua muvuaye diampa dilelela dia mu diulu. Malu avuaye wamba adi bushuwa ashindika tshivuaye muambile bantu bavua bapingane bafumina ku est kua Mbuu wa Galela, bantu bavua badie mampa ne mishipa ivuaye mufile.

Yezu wakatungunuka ne muyuki wende wamba ne: “Bankambua benu bavua badie mana mu tshipela, kadi bakafua.” Kadi wakumvuija ne: “Ndi diampa didi ne muoyo divua difume mu diulu. Muntu yeye mudie diampa edi, neikale ne muoyo bua kashidi; bushuwa, diampa dingafila mmubidi wanyi bua muoyo wa ba pa buloba.”​—Yone 6:48-51.

Mu muvu wa mashika wa mu 30 B.B., Yezu wakambila Nikodemo ne: Nzambi mmunange ba pa buloba bikole ke bualu kayi wakatuma Muanende bu musungidi. Yezu udi mpindieu uleja mudibi ne mushinga bua kudia mubidi wende pa kuikala ne ditabuja mu mulambu wende wafilaye. Eu ke mushindu wakupeta muoyo wa tshiendelele.

Nansha nanku, bantu bakabenga kuitaba mêyi a Yezu. Bakamba ne: “Mmunyi mudi muntu eu mua kutupesha mubidi wende bua kudia?” (Yone 6:52) Yezu uvua musue bua bumvue ne: uvua wakula bualu ebu mu ngakuilu wa mu tshimfuanyi. Tshidiye ulua kuamba pashishe tshidi tshileja tshivuaye usua kuamba.

Udi wamba ne: “Nuenu kanuyi badie mubidi wa Muana wa muntu ne banue mashi ende, kanuena ne muoyo munda muenu to. Muntu yonso udi udia mubidi wanyi ne unua mashi anyi, udi ne muoyo wa tshiendelele; . . . bualu mubidi wanyi ntshiakudia tshilelela ne mashi anyi ntshiakunua tshilelela. Muntu yonso udi udia mubidi wanyi ne unua mashi anyi, udi ushala mu buobumue nanyi.”​—Yone 6:53-56.

Ela meji muvua bualu ebu mua kunyingalaja bena Yuda bavua bamuteleja! Bavua mua kuikala bela meji ne: Yezu uvua ubalomba bua badie muntu anyi bashipe mukenji wa Nzambi wa kubenga kunua mashi. (Genese 9:4; Lewitiki 17:10, 11) Kadi Yezu kavua wakula bua kudia mubidi anyi kunua mashi etu mena dîna aa to. Uvua uleja ne: bantu bonso badi basue kupeta muoyo wa tshiendelele badi mua kuleja ditabuja mu mulambu uvuaye ne bua kufila pavuaye ufila mubidi wende mupuangane ne kupongolola mashi ende. Kadi ba bungi ba ku bayidi bende kabavua bumvue dilongesha edi to. Bamue bakamba ne: “Edi dîyi ndibi ditambe; nnganyi udi mua kuditeleja?”​—Yone 6:60.

Bu muvua Yezu mumone ne: bamue bayidi bavua banungana, wakebeja ne: “Bualu ebu budi bunulenduisha anyi? Nunku, ntshinyi tshienzeka nuenu bamone Muana wa muntu ubanda kuvuaye kumpala? . . . Mêyi andi munuambile adi nyuma ne adi muoyo. Kadi kudi bamue ba kunudi badi kabayi bitabuja.” Bua bualu ebu bayidi ba bungi bakumbuka ne kabakamulonda kabidi to.​—Yone 6:61-64.

Nunku Yezu udi wela bapostolo bende 12 lukonko ne: “Nuenu kanuena basue kuya penu to, ki mmuomu?” Petelo udi wandamuna ne: “Mukalenge, netuye kudi nganyi? Wewe udi ne mêyi a muoyo wa tshiendelele. Tudi bitabuje ne bafike ku dimanya ne: wewe udi Wa Tshijila wa Nzambi.” (Yone 6:67-69) Etshi ntshilejilu tshimpe tshia lulamatu, bualu Petelo ne bapostolo bakuabu kabavua bumvue bimpe tshivua Yezu ulongesha mu bualu ebu to.

Bu muvua Yezu musanke bua diandamuna dia Petelo, wakamba ne: “Mvua munusungule nuenu 12, ki mmuomu anyi? Kadi umue wenu mmushiminyinyanganyi wa malu.” (Yone 6:70) Yezu udi wakula bua Yudasa Isakaliote. Pamuapa Yezu uvua mumone ne: Yudasa uvua mutuadije kuenza bualu kampanda musaka kudi majinga ende mabi.

Kadi bualu budi busankisha Yezu mbua kumanya ne: Petelo ne bapostolo bakuabu ki mbalekele kumulonda ne kuenza mudimu wa kupandisha bantu uvuaye wenza to.