Bu muvua Pasaka wa mu 32 B.B. wenda usemena, Yezu uvua mu Galela wenda uyisha bikole. Pashishe pamuapa udi uya mutangile ku Yelushalema bua Pasaka eu, anu muvua Mikenji ya Nzambi ilomba. Kadi Yezu wakenza bualu ebu ne budimu buonso bualu bena Yuda bavua bakeba kumushipa. (Yone 7:1) Pashishe wakapingana ku Galela.

Pamuapa Yezu uvua mu Kapênuma pavua Bafalese ne bafundi balua kudiye bafumina mu Yelushalema. Bua tshinyi bakenza luendu elu? Bavua bakeba tumalu tua kushiminyina Yezu ne: muenze bubi bua mu malu a ntendelelu. Bakamuebeja ne: “Bua tshinyi bayidi bebe badi banyanga bilele bia bantu ba bikondo bia kale? Tshilejilu, kabena bowa mâyi ku bianza padibu bakeba kudia biakudia to.” (Matayi 15:2) Nzambi katu muanji kuambila bantu bende bua kutumikila tshilele tshia ‘kuowa mâyi ku bianza too ne mu nkengibua’ to. (Mâko 7:3) Kadi Bafalese bakamona ne: kubenga kuenza nunku mbubi bunene.

Pamutu pa Yezu kuandamuna lukonko luabu alu buludiludi, wakaleja mudibu bashipa mikenji ya Nzambi ku bukole. Wakabebeja ne: “Bua tshinyi nudi nunyanga mukenji wa Nzambi bua bilele bienu? Tshilejilu, Nzambi wakamba ne: ‘Nemeka tatuebe ne mamuebe,’ kabidi ne: ‘Muntu udi wamba tatuende anyi mamuende mêyi mabi ashipibue.’ Kadi nudi nuamba ne: ‘Muntu yonso udi wambila tatuende anyi mamuende ne: “Tshintu tshionso tshindi natshi tshivua mua kukuambuluisha tshidi dipa dilambula Nzambi,” kena ne bualu bua kunemeka tatuende nansha kakese.’”​—Matayi 15:3-6; Ekesode 20:12; 21:17.

Bafalese bavua bamba ne: makuta, bintu bionso bidi nabi muntu, anyi tshintu tshionso tshilambula bu dipa kudi Nzambi ntshia ntempelo, nunku kabena mua kuenza natshi mudimu bua bualu bukuabu to. Kadi mu bulelela, muntu eu udi anu muena dipa didibu balambule. Tshilejilu, muana udi mua kuamba ne: makuta ende anyi bintu biende ‘nkobana,’ mmumue ne: dipa dilambula Nzambi anyi ntempelo, bienze anu bu ne: ntempelo udi wangata muaba wa kumpala bua dipa edi. Makuta anyi bintu bitshidi ku bukokeshi bua muana, kadi udi wamba ne: kena mua kuenza nabi mudimu bua kuambuluisha baledi bende bakadi bantu bakole ne badi mu dijinga to. Nunku uvua wepuka bujitu buvuaye nabu bua baledi bende.​—Mâko 7:11.

Bivua bikumbane bua muvua Yezu munyingalale bua muvuabu bakonyangaje Mikenji ya Nzambi, ke kuambaye ne: “Nudi bavuije dîyi dia Nzambi tshianana bua bilele bienu. Nuenu bena lubombo, Yeshaya wakambilamu mêyi a buprofete bua bualu buenu, pakambaye ne: ‘Bantu aba badi bannemeka ne mishiku yabu, kadi mioyo yabu idi kule menemene nanyi. Badi batungunuka ne kuntendelela tshianana, bualu badi balongesha mikenji ya bantu bu malongesha a nshindamenu.’” Bafalese bakapanga tshia kuamba bua mêyi mashile avua Yezu mubambe aa. Ke yeye kubikila musumba wa bantu bua wikale pabuipi apu. Wakamba ne: “Telejayi ne nujingulule bualu ebu: Ki ntshintu tshidi tshibuela mukana mua muntu tshidi tshimunyanga to, kadi tshidi tshipatuka mukana muende ke tshidi tshimunyanga.”​—Matayi 15:6-11; Yeshaya 29:13.

Pashishe, pakabuelabu mu nzubu kampanda, bayidi bakebeja Yezu ne: “Udi mumanye ne: Bafalese bavua balenduke pavuabu bumvue tshiuvua muambe anyi?” Yeye wakandamuna ne: “Mutshi wonso uvua Tatu wanyi udi mu diulu kayi mukune, nebawujule. Balekelayi. Mbalombodi bampofu. Nunku, bikala mpofu ulombola mpofu mukuabu, bonso babidi nebakuluke mu tshina.”​—Matayi 15:12-14.

Yezu wakenza bu uvua ukema bua bayidi bende padi Petelo umuebeja bua kumanya bimpe tshivua tshinyanga muntu. Yezu wakandamuna ne: “Kanuena bamanye ne: tshintu tshionso tshidi tshibuela mukana tshidi tshipitshila mu tshifu ne batshipatula tshiya mu nkumba anyi? Kadi tshintu tshionso tshidi tshipatuka mukana tshidi tshifumina mu muoyo, ne bintu abi bidi binyanga muntu. Tshilejilu, mu muoyo ke mudi mupatuka meji mabi, dishipangana, masandi a basele, masandi, buivi,  dijadika dia malu a dishima ne bipendu. Malu aa ke adi anyanga muntu; kadi kudia biakudia ne bianza kabiyi biowa mâyi kakuena kubipisha muntu to.”​—Matayi 15:17-20.

Yezu kavua ubenga mankenda a mubidi, anyi wamba ne: muntu kena ne bua kuowa bianza kumpala kua kulamba biakudia anyi kubidia to. Kadi uvua ubipisha lubombo lua bamfumu ba bitendelelu bavua balengulula mikenji miakane ya Nzambi pa kuyikonyangaja ne bilele bia bantu. Bulelela budi ne: bienzedi bia dishima bidi bifumina mu muoyo ke bidi binyanga muntu.