Katupa kakese Yezu mumane kuondopa muena mudimu wa mfumu wa basalayi, udi umbuka mu Kapênuma uya mu Naina, tshimenga tshivua ku sud lua ku ouest mutantshi wa kilometre mipite pa 32. Kena nkayende to. Bayidi bende ne musumba munene wa bantu bavua nende mu luendu alu. Bakavua pamuapa ku dilolo padibu bafika pabuipi ne misoko ya ku mpenga kua Naina. Kuoku aku bakatuilangana ne bena Yuda ba bungi milongo milongo baya batangile ku nkita. Mbambule tshitalu tshia nsongalume bapatuka natshi tshimenga bua kuya kutshijiika.

Muntu uvua ne kanyinganyinga kakole kapita ka bakuabu bonso mmamuende wa nsongalume eu. Mmukaji mukamba, mpindieu muanende umuepele mmufue. Pavua bayende mufue, yeye ke wende mutekela muoyo uvuaye mushale nende. Ela meji muvuaye ne bua kuikala mumvue bua lufu lua muanende eu, bualu ditekemena diende ne bukubi buende bua matuku atshilualua bivua mu muana eu. Mpindieu yeye pende mmufue. Nnganyi mukuabu uvua mua kusomba nende ne kumukuatshisha?

Pakamona Yezu mukaji eu, muoyo wakamusama bikole ne kanyinganyinga, kubungamaye bua tshivua tshimufikile. Yezu wakakula ne dinanga dionso kadi ne dishindika didi dipetesha ditekemena, wambila mamu eu ne: “Lekela kudila.” Kadi kavua muimanyine anu apu to. Wakasemena pabuipi ne kulenga kalalu kavuabu bambuile tshitalu. (Luka 7:13, 14) Tshikadilu tshiende ne malu avuaye wenza bidi bisaka bantu ba mu tshimenga bavua badila bua kuimana diakamue. Bantu ba bungi bavua ne bua kuikala badiebeja ne: ‘Udi usua kuamba tshinyi? Ntshinyi tshidiye ukeba kuenza?’

Netuambe tshinyi bua bantu bavua benza luendu ne Yezu bakavua bamumone wenza malu a kukema, wondopa bantu ba bungi bavua basama? Pamuapa kabavua banji kumona Yezu ubisha muntu ku lufu to. Nansha muvuabu babishe bamue bantu ku lufu kale, Yezu udiku mua kuenza bualu bua nunku anyi? (1 Bakalenge 17:17-23; 2 Bakalenge 4:32-37) Yezu udi utuma dîyi ne: “Nsongalume, ndi nkuambila ne: Juka!” (Luka 7:14) Tshivuaye muambe etshi ke tshivua tshienzeke. Nsongalume wakajuka, kusomba ne kutuadija kuakula! Yezu udi umufila kudi mamuende udi ukema bikole bua bualu ebu kadi muikale ne disanka diyila ne panshi. Kena kabidi nkayende to.

 Padi bantu bamona ne: nsongalume uvua bushuwa ne muoyo, bakatumbisha Yehowa, Mufidi wa muoyo, bamba ne: “Mbajule muprofete munene munkatshi muetu.” Bakuabu badi bajingulula tshivua malu a kukema avua Yezu wenza umvuija, bamba ne: “Nzambi mmutume ntema yende kudi bantu bende.” (Luka 7:16) Lumu lua bualu bua dikema ebu luakamuangalaka ne lukasa mu ditunga divua pabuipi apu, ne pamuapa mu Nazaleta, kua ba Yezu, mutantshi wa kilometre mitue ku 10. Lumu elu luakatangalaka too ne ku sud mu Yudaya.

Yone Mubatiji utshivua mu buloko, ne uvua uditatshisha bikole bua kumanya malu avua Yezu wenza. Bayidi ba Yone bavua bamulondela bishima ebi. Ntshinyi tshidiye wenza?