Lumu lua difika dia Yezu ufumina ku Dekapoli luakamuangalaka munkatshi mua bena Yuda badi ku nord kua muelelu wa Mbuu wa Galela lua ku ouest. Pamuapa bantu ba bungi mbumvue ne: mu tshipepele tshikole tshivua tshifuma ku dituta, Yezu uvua mubatamije lupepele ne mâyi, ne bamue bavua mua kuikala bamanye ne: uvua muondope bantu bavuabu bakuate kudi bademon. Ke bualu kayi, “musumba munene wa bantu” wakadisangisha ku muelelu kua mbuu, pamuapa mu tshitupa tshia buloba bua Kapênuma, bua kuakidila Yezu. (Mâko 5:21) Pakatulukaye ku muelelu kua mâyi, bantu bavua ne mioyo kuulu kuulu bua kumona bivuaye wenza.

Umue wa ku bantu bavua bajinga ne muoyo mujima bua kumona Yezu, n’Yailo mulombodi wa nsunagoga, pamuapa wa mu Kapênuma. Wakadiela ku makasa a Yezu ne kumulombaye njila ne njila ne: “Muananyi mutekete wa bakaji udi usama bikole menemene. Luaku koku, umutentekele bianza bua umvue bimpe, ikale ne muoyo.” (Mâko 5:23) Ntshinyi tshivua Yezu muenze bua dilomba dia Yailo dia muoyo mujima bua kuambuluisha muanende wa bakaji mulela umue, uvua ne bidimu 12 ne uvua ne mushinga wa bungi kudiye?​—Luka 8:42.

Pavua Yezu mu njila mutangile kua Yailo, wakatuilangana ne nsombelu mukuabu udi ulenga ku muoyo. Bantu ba bungi bavua ne Yezu bavua ne disanka, badiebeja bikalabu mua kumumona wenza tshishima tshikuabu. Kadi, mukaji mukuabu mu tshisumbu tshia bantu atshi uvua uditatshisha yeye bua disama dikole divuaye nadi.

Mukaji muena Yuda au uvua ukenga ne disama dia mashi apueka kukavua bidimu 12. Mukebe diambuluisha kudi baminganga ba bungi, mutule makuta ende onso bua bamuondope. Kadi kavua mupete diambuluisha to. Disama diende divua “anu dienda dikola.”​—Mâko 5:26.

Wakamona pamuapa ne: disama diende kadivua anu dimutshiokesha patupu to, kadi divua kabidi dimuenza bundu ne dimupuekesha milongo. Pa tshibidilu muntu uvua ne disama dia nunku kavua mua kudiamba pa bantu to. Bualu bukuabu, mu Mikenji ya Mose, dipatuka dia mashi mu mubidi divua divuija mukaji mukoya. Muntu yonso uvua umulenga anyi ulenga bilamba biende bivua biyile mashi, uvua ne bua kuowa mâyi ne uvua ulua mukoya too ne ku dilolo.​—Lewitiki 15:25-27.

Mukaji eu ‘mmumvue malu adibu bamba bua Yezu,’ mpindieu udi wenda umukeba. Bu muvuaye ne bukoya, udi udifinya mu musumba wa bantu kayi ukoka ntema yabu kudiye, udiambila ne: “Meme mulenge anu bilamba biende bia pa mutu, nengumvue bimpe.” Padiye ulenga luzembe lua tshilamba tshiende, udi umvua diakamue mashi ende avua apueka akama! ‘Mmuondopibue ku disama dikole didiye nadi.’​—Mâko 5:27-29.

Pashishe Yezu wakamba ne: “Nnganyi udi mundenge?” Buebe wewe, mukaji eu uvua mua kuikala mumvue tshinyi pavuaye umvua mêyi aa? Petelo wakabenga tshivua Yezu wamba, bu udi umutandisha ne: “Misumba ya bantu mmikunyunguluke, ikufinakaja.” Kadi bua tshinyi Yezu uvua muebeje ne: “Nnganyi udi mundenge?” Yezu wakumvuija ne: “Muntu mmundenge, bualu ndi mujingulule ne: bukole mbupatuke munda muanyi.” (Luka 8:45, 46) Bulelela, diondopangana divua dienzeke diakapatula ndambu wa bukole bua Yezu.

Pakajingulula mukaji au ne: mbamanye tshivuaye muenze, wakadiela panshi kumpala kua Yezu, muikale ne buôwa ne uzakala. Kuambilaye Yezu kumpala kua bantu bonso bulelela bua disama diende ne muvuaye muondopibue. Yezu kumukolesha ne bulenga buonso ne: “Muananyi wa bakaji, ditabuja diebe ndikuondope. Ndaku mu ditalala, umvue bimpe ku disama diebe dikole.”​—Mâko 5:34.

Bulelela, muntu udi Nzambi musungule bua kukokesha buloba mmuntu udi mumanye kusomba bimpe ne bantu, udi uditeka pa muaba wa bakuabu, ubatabalela ne udi kabidi ne bukole bua kubambuluisha!