Mu dituku dia ndekelu dia Tshibilu tshia Nzubu ya ntenta, dituku dia muanda mutekete, Yezu udi ulongesha mu muaba kampanda wa ntempelo uvuabu babikila ne: “muaba wa tushete tua diela makuta.” (Yone 8:20; Luka 21:1) Bidi bimueneka ne: muaba eu uvua mu Lubanza lua Bakaji, luvua bantu bela mapa abu.

Butuku mu tshibilu, muaba wa ku ntempelo eu uvua ukenka mu mushindu wa pa buawu. Bitekelu binene bia miendu binayi bivua muaba au, tshitekelu tshionso tshivua ne malongo manene anayi muwuja ne mafuta. Bukenke bua miendu eyi buvua bukole bualu buvua butokesha too ne miaba ya kule. Tshidi Yezu wamba mpindieu tshidi mua kuvuluija bantu badi bamuteleja bualu ebu: “Ndi butoke bua pa buloba. Muntu yonso udi undonda kakuendela mu mîdima nansha kakese, kadi neikale ne butoke bua muoyo.”​—Yone 8:12.

Bafalese bakabenga mêyi a Yezu aa bamba ne: “Udi ujadika bualu buebe nkayebe; bujadiki buebe ki mbulelela to.” Yezu wakabandamuna ne: “Nansha mundi njadika bualu buanyi nkayanyi, bujadiki buanyi mbulelela, bualu ndi mumanye kumvua mufume ne kundi nya. Kadi nuenu kanuena bamanye kumvua mufume ne kundi nya to.” Wakamba kabidi ne: “Mbafunde mu Mikenji yenu ne: ‘Bujadiki bua bantu babidi mbulelela.’ Meme ke udi ujadika bualu buanyi nkayanyi, ne Tatu uvua muntume udi ujadika bualu buanyi.”​—Yone 8:13-18.

Bu muvua Bafalese babenge kuitaba mêyi ende aa bakebeja ne: “Tatu webe udi penyi?” Yezu wakandamuna kayi udia tshibanga ne: “Kanuena bammanye ni mmeme ni n’Tatu wanyi to. Bu nuenu bammanye, nuvua kabidi mua kumanya Tatu wanyi.” (Yone 8:19) Nansha muvua Bafalese bajinga anu kukuata Yezu, muntu nansha umue kakamulenga to.

Yezu wakambulula bualu bukavuaye muambe ne: “Meme ndi nya, nenunkebe, kadi nuenu nenufue mu mpekatu wenu. Kanuena mua kulua muaba undi nya.” Bu muvua bena Yuda kabayi bumvue  bimpe mêyi a Yezu aa, bakatuadija kudiebeja ne: “Kakudishipa to, ki mmuomu? Bualu udi wamba ne: ‘Kanuena mua kulua muaba undi nya.’” Kabavua bumvue tshivua Yezu usua kuamba to, bualu kabavua bamanye kuvuaye ufumina to. Wakamba ne: “Nuenu nudi bafumine miaba ya panshi; meme ndi mufumine miaba ya muulu. Nuenu nudi bafumine pa buloba ebu; meme tshiena mufumine pa buloba ebu to.”​—Yone 8:21-23.

Yezu uvua wakula bua nsombelu uvuaye nende mu diulu kumpala kua kuluaye pa buloba ne bua dikala diende bu Masiya mulaya anyi Kristo uvua bamfumu ba bitendelelu ne bua kuikala batekemene. Nansha nanku, bakamuebeja ne dipetu dionso ne: “Wewe udi nganyi?”​—Yone 8:25.

Bu muvuabu babenga Yezu ne bamuluisha, wakabandamuna ne: “Bua tshinyi mene ndi ngakula nenu?” Udi kabidi utuma ntema yabu kudi Tatuende ne umvuija bua tshinyi bena Yuda badi ne bua kuteleja Muana wamba ne: “Yeye uvua muntume mmulelela, ne malu mine amvua mumvue kudiye, ndi ngambila ba pa buloba.”​—Yone 8:25, 26.

Pashishe Yezu wakaleja muvuaye mueyemene Tatuende uvua bena Yuda aba kabayi beyemene wamba ne: “Panuikala babandishe Muana wa muntu kuulu, dîba adi nenumanye ne: Meme ndi yeye ne tshitu ndienzela bualu mu meme nkayanyi to; kadi ndi ngakula malu aa anu muvua Tatu mundongeshe. Eu uvua muntume udi nanyi; kavua mundekele nkayanyi to, bualu misangu yonso ndi ngenza malu adi amusankisha.”​—Yone 8:28, 29.

Kadi bamue bena Yuda bakitabuja Yezu, yeye kubambila ne: “Nuenu bashale mu dîyi dianyi, nudi bushuwa bayidi banyi, ne nenumanye bulelela, ne bulelela nebunupeshe budikadidi.”​—Yone 8:31, 32.

Bua bamue, muyuki wa budikadidi eu uvua umueneka bu bualu buvua kabuyi mua kuenzeka to. Bakabenga bamba ne: “Tuetu tudi bana ba Abalahama, katutu banji kuikala bapika ba muntu nansha. Mmunyi muudi wamba ne: ‘Nenupete budikadidi’?” Bena Yuda bavua bamanye ne: musangu kampanda bavua ku bukokeshi bua bantu bakuabu, kadi bakabenga kubikidibua bu bapika. Kadi Yezu wakaleja mutshivuabu bapika wamba ne: “Bulelela, bulelela, ndi nnuambila ne: muenji wa mpekatu yonso mmupika wa mpekatu.”​—Yone 8:33, 34.

Bu muvua bena Yuda kabayi bitaba ne: bavua ku bupika bua mpekatu, bivua bibateka mu njiwu. Yezu wakumvuija ne: “Mupika katu ushala mu nzubu mua mfumuende kashidi to; muana udi ushalamu kashidi.” (Yone 8:35) Mupika katu ne bukenji bua kupeta bumpianyi to, ne badi mua kumuipata dîba kayi dionso. Anu muana udibu balele anyi bakolesha ke udi ushala “kashidi,” mmumue ne: bidimu bionso bienzaye.

Nunku, bulelela pa bidi bitangila Muana ke budi bupikula bantu bua kashidi ku mpekatu udi ubafikisha ku lufu. Yezu wakamba ne: “Muana yeye munupeshe budikadidi, nenuikale bushuwa ne budikadidi.”​—Yone 8:36.