Utu pamuapa wanyisha bikole bua kupeta lumu luimpe. Kudi bushuwa lumu lutambe buimpe buebe wewe ne bua bantu baudi munange.

Lumu luimpe elu ludi mu Bible, mukanda uvua Yehowa Nzambi Mufuki wa diulu ne buloba mufundishe kukadi bidimu bia bungi. Mu mukanda eu, netuimanyine pa mikanda inayi ya mu Bible idi ne lumu lutambe buimpe bua yonso wa kutudi. Badi bayibikila mu mêna a bantu bavua Nzambi muenze nabu mudimu bua kuyifunda aba: Matayi, Mâko, Luka, ne Yone.

Bantu ba bungi batu babikila mikanda inayi eyi ne: Evanjeliyo. Yonso inayi idi yakula bua evanjeliyo anyi lumu luimpe bua Yezu yamba ne: Nzambi mmuenze nende mudimu bua kupetesha bantu lupandu ne kabidi bu Mukalenge wa Bukalenge bua Nzambi bua mu diulu, neapeshe bantu bonso badi baleja ditabuja kudiye masanka a tshiendelele.​—Mâko 10:17, 30; 13:13.

Udi mua kuikala udiebeja ne: bua tshinyi Nzambi uvua mufundishe ku nyuma wende mikanda inayi idi yakula bua nsombelu ne malongesha a Yezu.

Patudi tubala mikanda mishilangane eyi ya malu avua Yezu muambe ne muenze, tudi tupeta masanka. Tshilejilu, fuanyikijabi ne: bantu banayi mbimane pabuipi ne mulongeshi muende lumu. Muntu udi muimane kumpala kua mulongeshi udi ne nzubu wa dilambuisha bitadi. Muntu udi ku dia balume mmunganga. Udi uteleja ku dia bakaji mmulobi ne mulunda wa mulongeshi wa pa muoyo. Muntu muinayi udi muimane panyima, mmubandidi ne mmuana ku bonso. Buonso buabu banayi mbantu bena bululame, ne yonso wa kudibu udi ne muende mudiye udifila bua kumvua. Yonso wa kudibu yeye mufunde muyuki udi utangila malu adi mulongeshi wamba ne midimu yende, kakuyi mpata, miyuki yabu inayi eyi neyikale ne mushindu wa diumvuija malu mushilangane. Tuetu babale bionso bivua bantu banayi aba bafunde netumvue bimpe tshivua Yezu mulongeshi munene muambe ne muenze. Bualu ebu budi buleja masanka atudi mua kupeta mu mikanda inayi idi yakula bua nsombelu wa Yezu, Mulongeshi Munene.

 Patudi tutungunuka ne tshilejilu etshi, tudi tumona ne: mulambuishi wa bitadi mmusue yeye kusaka bena Yuda ku dienza malu kampanda, nunku udi usangisha amue malongesha ne malu mu mushindu wa kuambuluisha bantu aba. Munganga udi wakula bua diondopibua dia babedi anyi balema, nunku kena utela amue malu avua mulambuishi wa bitadi mufunde anyi udi uamba mu mushindu mushilangane. Mulunda wa pa muoyo wa mulongeshi udi yeye wimanyina pa mushindu uvua mulongeshi udiumvua ne ngikadilu yende. Mukanda wa eu uvua muana kudibu mmufunda mu tshikoso, ne mmuipi. Kadi muyuki wa muntu yonso mmujalame. Bualu ebu budi buleja bimpe mudi kuikala ne mikanda inayi ya nsombelu wa Yezu kutuambuluisha bua kumvua midimu yende, malongesha ende, ne bumuntu buende.

Bantu badi mua kuakula bua ‘Evanjeliyo wa Matayi’ anyi ‘bua Evanjeliyo wa Yone.’ Kuenza nunku ki nkubi to, bualu mikanda ibidi eyi idi ne “lumu luimpe lua Yezu Kristo.” (Mâko 1:1) Kadi mu mushindu mualabale, kudi anu evanjeliyo umue anyi lumu luimpe, ludi lutangila Yezu lutudi tupeta mu mikanda inayi eyi.

Balongi ba Dîyi dia Nzambi ba bungi bakafuanyikija malu adi mu Matayi, Mâko, Luka ne Yone ne bakenza bua apetangane. Mu bidimu bia 170 B.B., Tatien mufundi muena Sulia wakateta bua kuenza nunku. Wakaleja muvua mikanda inayi eyi mikale mijalame ne mifundisha ku nyuma wa Nzambi, ke kufundaye Diatessaron udi umvuija ne: “Evanjeliyo inayi,” mukanda muakaja udi wakula bua nsombelu wa Yezu ne mudimu wende.

Mukanda eu wa Yezu udi njila ne bulelela ne muoyo mmuenze pawu bia muomumue, kadi wowu mmujalame bikole ne udi ne malu onso. Bidi nanku bualu tudi mpindieu tumvua bimpe menemene dikumbana dia mêyi a buprofete a Yezu a bungi ne bilejilu biende. Ngumvuilu eu udi utokesha malu avuaye muambe ne muenze, ne mushindu uvua malu malondangane. Bintu bivua bakebuludi ba kale bapete mbifile kabidi butoke pa amue malu ne bipatshila bia baafundi. Bushuwa, muntu nansha umue kena ne bua kuamba ne dishindika dionso ne: malu avua menzeke anu mu mushindu kampanda to. Kadi mukanda wa Yezu udi njila ne bulelela ne muoyo udi ne nkatshinkatshi ne udi uleja malu adi umvuika.

Paudi wenda ubala mukanda eu, teta kumvua mukenji munene udiwu ukupesha wewe ne bantu baudi munange. Vuluka ne: Yezu Kristo nkayende wakambila mupostolo Tomase ne: “Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi.”​—Yone 14:6.

Mukanda eu wa Yezu udi njila ne bulelela ne muoyo neukuambuluishe bua kusanka bua mudi Yezu muikale bushuwa “njila.” Anu ku diambuluisha diende ke kutudi mua kusemena kudi Yehowa Nzambi mu disambila. Bualu bukuabu, Yezu nnjila udi utuambuluisha bua kulengejangana ne Nzambi. (Yone 16:23; Lomo 5:8) Nunku, anu ku diambuluisha dia Yezu ke kutudi tudia malanda mimpe ne Nzambi.

Yezu udi “bulelela.” Uvua wakula ne wenza malu mu diumvuangana ne bulelela; bivua bienze anu bu ne: bulelela buvua bulue mu Yezu. Wakakumbaja mêyi a buprofete a bungi akalua “‘eyowa’ ku diambuluisha diende.” (2 Kolinto 1:20; Yone 1:14) Mêyi a buprofete aa adi atuambuluisha bua kumona mudimu wende munene mu malu adi Nzambi mulongolole.​—Buakabuluibua 19:10.

Yezu Kristo udi “muoyo.” Ku diambuluisha dia tshia kupikulangana natshi, mmumue ne: difila dia muoyo wende mupuangane ne mashi ende, mmuenze bua ne: tupete “muoyo wa bushuwa,” mmumue ne: “muoyo wa tshiendelele.” (1 Timote 6:12, 19; Efeso 1:7; 1 Yone 1:7) Nealeje kabidi mudiye “muoyo” bua miliyo ya bantu badi bafue kadi babishabu bua kupetulula muoyo bua kusombabu mu Mparadizu bua kashidi.​—Yone 5:28, 29.

Tuetu bonso tudi ne bua kumvua ne kuanyisha mudimu udi nawu Yezu mu malu adi Nzambi mulongolole. Enza bua dilonga malu a bungi pa bidi bitangila Yezu udi “njila ne bulelela ne muoyo” dikuambuluishe.