Diakamue panyima pa Yone mumane kubatiza Yezu, nyuma wa Nzambi wakalombola Yezu mu tshipela tshia Yudaya. Uvua ne malu a bungi a kuelela meji. Pakabatijibua Yezu, “diulu diakabululuka.” (Matayi 3:16) Nunku uvua mua kuvuluka malu avuaye mulonge ne muenze mu diulu. Bushuwa, kuvua malu a bungi a yeye kuelelangana meji!

Yezu wakenza matuku 40 mu tshipela munya ne butuku. Tshikondo atshi, kavua udia kantu. Pashishe pakamotola nzala, Satana Diabolo wakalua bua kumuteta wamba ne: “Biwikala muana wa Nzambi, ambila mabue aa andamuke mampa.” (Matayi 4:3) Bu muvua Yezu mumanye ne: mbibi bua kuenza bishima ne bukole buende bua kusankisha majinga ende yeye, wakabenga diteta adi.

Diabolo kakamulekela to. Udi umuela diteta dikuabu. Wakambila Yezu bua kudikupa panshi umbukila kuulu kua tshibumba tshia ntempelo. Kadi Yezu kavua musue bua kuenza bualu bua dikema bua mushindu eu to. Wakafila diandamuna dia mu Mifundu uleja ne: mbibi bua kuteka Nzambi mu diteta mushindu au.

Pashishe mu diteta disatu, mu mushindu kampanda Diabolo udi uleja Yezu “makalenge onso a pa buloba ne butumbi buawu” umuambila ne: “Nenkupeshe bintu ebi bionso, wewe mudiele panshi, muenze tshienzedi tshia dinkukuila.” Yezu wakabenga kabidi ne muoyo umue wamba ne: “Umbuka, Satana!” (Matayi 4:8-10) Uvua mubenge kuitaba diteta adi bua kenji bibi to, mumanye ne: anu Yehowa nkayende ke wa kuenzela mudimu wa tshijila. Bushuwa, uvua wangata dipangadika dia kushala mulamate Nzambi.

Mateta aa ne mushindu uvua Yezu mupite nawu bidi mua kutulongesha. Mateta au avua malelela, avua aleja ne: Diabolo ki nngikadilu patupu wa bubi bu mudi bamue bantu bamba to. Mmuntu mulelela uvua kayi umueneka. Muyuki eu udi uleja kabidi ne: mu bulelela, mbulamatadi ya panu mbintu bia Diabolo; yeye ke udi uyilombola. Mmushindu kayi mukuabu uvua dialeja diende kudi Yezu dikale diteta dilelela?

Kabidi, Diabolo uvua muambe ne: uvua musue kufuta Yezu bu yeye muenze tshienzedi tshia dimutendelela, ufika too ne ku dimulaya makalenge onso a pa buloba. Diabolo udi mua kujinga kututeta mu mushindu wa muomumue, pamuapa ututekela kumpala kuetu mishindu mimpe ya katshia ya kupetela bubanji, bukole, anyi muanzu bia panu. Nansha tuetu mu diteta dia bishi, tulondayi tshilejilu tshia Yezu pa kushala balamate Nzambi bua kuleja mutudi ne meji. Kadi vuluka ne: Diabolo wakanji kushiya Yezu “too ne ku tshikondo tshikuabu tshikumbane.” (Luka 4:13) Ke mudiye mua kutuenzela petu, nanku katushadi mu ditanaji nansha.