Tudi dituku disatu katshia Natanaele walua umue wa ku bayidi ba kumpala ba Yezu. Yezu, pamuapa ne bamue ba ku bayidi ba kumpala abu, badi baya batangile ku nord mu buloba bua Galela, muaba udibu basombele. Badi baya ku Kana, tshimenga tshia ba Natanaele. Tshimenga tshia Kana tshidi mu mikuna ya ku nord kua Nazaleta, muaba uvua Yezu muine mukolele. Mbababikile mu difesto dia dibaka ku Kana.

Mamuende wa Yezu mmulue pende mu difesto edi. Bu muvua Mariya mulunda wa dîku dia bavua baselangana, bidi bimueneka ne: uvua mu bantu bavua bambuluisha bua kutabalela babikidibue. Ke bualu kayi wakamona ne lukasa luonso ne: nkupangike tshintu, ke kuambilaye Yezu ne: “Kabena ne mvinyo to.”​—Yone 2:3.

Mu kuamba kuimpe, Mariya uvua ulomba Yezu bua enze bualu kampanda bua mvinyo uvua mujike. Yezu uvua wakula mu ngakuilu kampanda wa dibenga nende umuambila ne: “Mukaji, bualu ebu mbututangile nebe ku tshinyi?” (Yone 2:4) Bu muvua Yezu Mukalenge udi Nzambi musungule, anu Tatuende wa mu diulu ke udi ne bua kumulombola mu malu adiye wenza, ki mbena mu dîku anyi balunda bende to. Mariya uvua ne meji a bungi, wakashila muanende malu mu bianza, wambila bavua benza mudimu muaba au anu ne: “Enzayi tshionso tshidiye unuambila.”​—Yone 2:5.

Kuvua milondo ya mâyi ya mabue isambombo muaba au, mulondo wonso uvua mua kubuela litre ya mâyi mipite pa 40. Yezu wakambila bantu bavua bambuluisha abu ne: “Uwujayi milondo eyi ne mâyi.” Pashishe Yezu udi wamba ne: “Mpindieu tuntayi ndambu, nuye nende kudi mulombodi wa tshibilu.”​—Yone 2:7, 8.

Mulombodi wa difesto wakakema bua bulenga bua mvinyo, kadi ki mmumanye ne: mbamuenze mu tshishima to. Wakabikila musedianganyi umuambila ne: “Muntu yonso eu utu wanji ufila mvinyo mutambe buimpe, nanku padi bantu bakuatshika, ulua kufila udi mushadile. Wewe udi mulame mvinyo mutambe buimpe too ne mpindieu.”​—Yone 2:10.

Etshi ke tshishima tshia kumpala tshivua Yezu muenze. Pavua bayidi bende bapiabapia bamone tshishima etshi, ditabuja diabu kudiye diakakola. Pashishe Yezu, mamuende, ne bana babu ba mamuende bakasa luendu batangile ku tshimenga tshia Kapênuma tshidi ku nord lua ku ouest kua muelelu wa Mbuu wa Galela.