NUSHALE BATABALE!
2022 ntshidimu tshia kayumbayumba kakole—Ntshinyi tshidi Bible wamba?
Mu ngumu ya mu 2022, bavua batamba kuakula bua mvita, bua ntatu ya makuta, ne bua bipupu. Anu Bible ke udi mua kumvuija bimpe tshidi mianda eyi yumvuija menemene.
Diumvuija dia mianda ivua mienzeke mu 2022
Malu adi menzeke tshidimu tshishale etshi mmaleje kabidi patoke mutudi mu tshikondo tshidi Bible ubikila ne: “matuku a ku nshikidilu.” (2 Timote 3:1) Tshikondo atshi tshiakatuadija mu 1914. Mona mudi mianda ivua mienzeke eyi ipetangana ne tshikavua Bible muambe bua matuku etu aa.
“Mvita.”—Matayi 24:6.
‘Tshidimu tshia 2022 ntshidimu tshivua mvita mibi mienzeke kabidi ku Mputu.’ a
Tangila tshiena-bualu tshia “Biluilu bia Russie mbibuelele bena Ukraine.”
“Biyole bia nzala.”—Matayi 24:7.
‘Tshidimu tshia 2022 ntshidimu tshia nzala mikole.’ b
Tangila tshiena-bualu tshia “Mvita ya mu Ukraine idi ivudija biyole bia nzala pa buloba bujima.”
“Bipupu bia masama.”—Luka 21:11.
“Disama dia tuneke nansha dia mbalanga ndijukuluke bibi, dia korona diodi ditshidi anu dibutulangana ne bantu. Ebi mbileje patoke bubi bua masama a tshiambu ne mudi bantu baakuatshika bipepele.” c
Tangila tshiena-bualu tshia “Bantu miliyo 6 bakadi bafue ku disama dia korona.”
“Malu adi akuatshisha buôwa.”—Luka 21:11.
“Miunya mikole, minanga, dioshika dia mêtu, ne dipasalala dia mâyi. Bushuwa, bantu nebikale bavuluka tshikondo tshia muvu wa luya tshia mu 2022 bua bungi kabuyi kubala bua misangu ivua mivu mitomboke mikebeshe bipupu, mibutule mioyo ya bantu binunu nkama, mimuangeje bantu miliyo ne miliyo pa buloba bujima.” d
Tangila tshiena-bualu tshia “Dibanda dibi dia luya pa buloba bujima.”
“Bimvundu [anyi “ndululu; buntomboji,” dim.].”—Luka 21:9.
“Bantu mbafikile mbulamatadi yabu tshiji tshikole tshibajudije ndululu mikole mu 2022 anu bua ntatu ya malu a makuta, nangananga ya muvua bintu anu bienda bibanda mushinga.” e
Tangila tshiena-bualu tshia “Dibanda dia bintu mushinga pa buloba bujima.”
Mmalu kayi enzeka tshidimu tshialua?
Kakuena udi mua kumanya menemene malu enzeka mu 2023 to. Tshitudi tuetu bamanye ntshia ne: mu katupa kîpi emu Bukalenge bua Nzambi anyi mbulamatadi wa mu diulu neadiangatshile malu onso a pa buloba mu bianza. (Danyele 2:44) Mbulamatadi au neabutule tshikebeshi tshia ntatu ya bukua bantu ne neenze bua disua dia Nzambi dienzeke pa buloba.—Matayi 6:9, 10.
Tudi tukulomba bua kutumikila mubelu wa Yezu Kristo wa ‘kushala batabalele’ mudi malu adi enzeka pa buloba akumbaja malu akavua Bible mulaye. (Mâko 13:37) Keba mua kupetangana netu bua umone mua kumanya malu makuabu a mudi Bible mua kukuambuluisha mpindieu ne mudiye mua kukupetesha wewe ne ba mu dîku dienu ditekemena dilelela dia malu mimpe atshilualua.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
Mona bikuabu:
TSHIBUMBA TSHIA NSENTEDI
Mu katupa kîpi emu Nzambi neajikije makenga onso
Mmunyi mutudi mua kumanya ne: Nzambi neajikije makenga onso ne malu mabi?
MALONGESHA A MU BIBLE A NSHINDAMENU
Bukalenge bua Nzambi ntshinyi?
Pavua Yezu uyisha, uvua ulongesha bantu bua Bukalenge bua Nzambi kupita malu makuabu onso. Munkatshi mua nkama ya bidimu, bayidi bende mbasambile bua Bukalenge abu kulua
MALONGESHA A MU BIBLE A MUSHINGA
Bukalenge bua Nzambi buakatuadija kukokesha mu 1914
Kukadi bidimu bipite pa 2 600 katshia Nzambi walotesha mukalenge kampanda wa bukole tshilota tshia buprofete tshidi tshienda tshikumbana lelu eu.
BIENA-BUALU BIKUABU
Ditekemena dilelela dia matuku atshilualua mimpe
Bua tshinyi milayi ya mu Bible mishilangane ne milayi ya bantu ne malu atubu bamba ne: nealue kuenzeka?
MALU ETU
Lomba bua balue kukutangila
Tata lukonko lua malu a mu Bible, anyi longa malu a bungi adi atangila Bantemu ba Yehowa.
