Mu dia 24/1/2023, bamanyi ba bia panu mbasemeje mulonda wa dîba dia ku tshimanu kumpala pabuipi menemene ne dîba dia mundankulu didi dileja dituku dia kabutu a ka buloba.

•   “Mulonda wa ‘dîba dia ku tshimanu didi dileja dituku dia kabutu’ dia njiwu ya bukua bantu edi mmutambe kusemena pabuipi ne dîba dia mundankulu mu Dibidi munkatshi mua mvita ya mu Ukraine, bimvundu bia malu a bingoma bia mbutula, ne dinyanguka dia mivu.”​—AFP International Text Wire.

•   “Bamanyi ba bia panu mbaleje ne: mu Dibidi, ‘dîba didi dileja dituku dia kabutu’ edi mbasemeje mulonda wadi pa sekonde 90 patupu pabuipi ne dîba dia mundankulu, mmumue ne: bantu mbasemene pabuipi menemene ne kabutu kabi kupita muvuabu kumpala.”​—ABC News.

•   “Kasumbu ka bamanyi ba bia panu ba bukua matunga mbadimuije ne: dikala dia bantu ne muoyo pa buoba didi mu njiwu minene kupita kuonso eku.”​—The Guardian.

 Bantu ne dibulunge dietu dia buloba edi bikadi pa kubutuka anyi? Tudi mua kutshina malu enzeka kumpala eku anyi? Ntshinyi tshidi Bible wamba?

 Bible udi wamba ne: “buloba budi bushalaku kashidi” ne nekuikale bantu ‘basombapu bua kashidi.’ (Muambi 1:4; Misambu 37:29) Nunku bantu kabakubutula buloba anyi kubuvuija muaba udi bantu kabayi mua kusombela nansha.

 Nansha nanku, Bible udi uleja bimpe ne: kudi nshikidilu. Tshilejilu, udi wamba ne: “buloba budi bupita.”—1 Yone 2:17.

•   Bua kumanya tshidi Bible wamba padiyi wakula bua nshikidilu wa buloba, bala tshiena-bualu tshia “Tudi batangile ku nshikidilu wa bionso bia panu anyi? Bible mmulaye kabutu ka bionso bidiku anyi?”

•   Bua kumanya tshidi Bible wamba bua mianda ya panu yenzeka kumpala eku, bala tshiena-bualu tshia “Quand la fin du monde viendra-​t-​elle?”

 Bible udi mua kutuambuluisha bua kumona malu mu mushindu muimpe nansha mudiku ntatu pa buloba. Mushindu kayi?

•   Bible udi utupesha mibelu mimpe. (2 Timote 3:16, 17) Tshilejilu, bala tshiena-bualu tshia “Mua kupita ne malu adi asamisha mutu” bua umone mudi Bible mua kukuambuluisha bua wikale umona malu mu mushindu muimpe nansha mudiku ntatu.

•   Bible udi ufila ditekemena dilelela bua matuku atshilualua. (Lomo 15:4) Udi umvuija menemene tshitudi mua kutekemena lelu ne mu matuku atshilualua, abi nebituambuluishe bua kutua malu a panu tshiadi ne muoyo mukole.

 Bua wewe kumvua Bible bimpe menemene, tudi tukulomba ne muoyo mujima bua utete programe wetu wa dilonga dia Bible dia ulonga ne mulongeshi lelu kuyi ufuta makuta.