Mvita ya mu ditunga dia Ukraine mmileje ne: bamfumu ba bitendelelu bia buena Kristo ba bungi badi bayisonsola. Mona mudibu basaka biluilu bionso bibidi bua kuluangana:

•   “Balume ba mvita bonso badi bakungamangana ne muluishi bua kuluila ditunga diabu dia Ukraine mba kuela diboko muulu ne kuleja dianyisha . . . Mioyo yetu idi kudibu ne tudi anu tubasambidila ne muoyo mujima ne tubatua mpanda.” (Mêyi mamba kudi munene kampanda wa tshitendelu tshia mu tshimenga tshia Kiev, mafunda mu The Jerusalem Post, 16/3/2022.

•   “Munene wa tshitendelelu tshia bena Ortodokse tshia mu Russie mmuenzele basalayi ba mu Russie masangisha mu Dia lumingu dishale edi ubalomba bua kuluila ditunga diabu ‘anu bu mudi bena mu Russie nkayabu mua kuenza,’ padi eku ditunga edi ditungunuke anu ne kuluisha dia Ukraine.”​—Reuters, 3/4/2022.

 Mbimpe bena Kristo babuelakane mu mvita anyi? Ntshinyi tshidi Bible wamba?

 Bible udi uleja ne: bantu badi balonda Yezu Kristo mu bulelela kabatu babuelakana mu mvita to.

•   “Pingaja muele webe wa mvita muaba wawu, bualu muntu yonso udi wambula muele wa mvita, neafue ku muele wa mvita.”​—Matayi 26:52.

   Muntu yeye usaka badi balua mvita bua batungunuke nayi, udiku mu bulelela utumikila mêyi a Yezu anyi?

•   “Ndi nnupesha mukenji mupiamupia ne: nunangangane; anu bu mundi mununange, nuenu penu nunangangane. Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”​—Yone 13:34, 35.

   Muntu yeye ukankamija bakuabu bua kulua mvita, udiku uleja mudiye ne dinanga dia buena divua Yezu muambe ne: ke divua ne bua kusunguluja bayidi benda balelela anyi?

 Bua kumanya malu makuabu, bala tshiena-bualu tshia ne: “Peut-on concilier guerre et christianisme?”

 Mbimpe bua mudi bena Kristo kabayi babuelakana mu malu a mvita lelu eu anyi? Eyowa. Bible ukavua muambe ne: tshikondo tshietu etshi, tshidiye ubikila ne: “matuku a ku nshikidilu,” kuvua ne bua kuikala bantu ba mu bisamba bionso bikale kabayi mua ‘kulonga kabidi mvita nansha,’ bua kutumikila malu avua Yezu mulongeshe.​—Yeshaya 2:2, 4, dimanyisha dia kuinshi kua dibeji.

•   Bua kumanya malu makuabu, bala biena-bualu bia mu Tshibumba tshia Nsentedi bia ne: “Mmunyi mudi Nzambi umona mvita?”

 Yehowa a “Nzambi wa ditalala” ukadi pa kuteka mbulamatadi wa mu diulu bua kusungila bantu bende “ku dikengeshibua ne ku tshikisu.”​—Filipoyi 4:9; Misambu 72:14.

•   Bua kumanya muenzaye bualu ebu, tangila filme wa Bukalenge bua Nzambi ntshinyi?