Lelu, tshikisu, mêyi a lukinu, malu mabi, diluishangana dia bisamba ne mvita ke malu adibu batamba kuakuila mu ngumu.

•   “Lelu, bantu badi bambangana mêyi mabi bikole mu miaba ya dipetelangana ku Enternete bua bilumbu bidi pankatshi pa ditunga dia Israël ne tshimenga tshia Gaza; kabidi bualu kudi bantu badi bakebesha malu a tshikisu ne lukuna.”​—The New York Times, mu dia 15/11/2023.

•   “Dennis Francis mfumu wa tshipangu tshinene tshia Bulongolodi bua matunga masanga mmuambe mu dia 3/11/2023 ne: “Katshia mu dia matuku 7 a ngondo wa 10, bantu badi benzelangana malu ne tshikisu ne bambangana mêyi mabi bualu kansungansunga nkavule bikole pa buloba.”

 Tshikisu, mêyi mabi a lukinu, ne mvita ki mbienyi ku mêsu kua bantu to. Bible mmuakule bua bantu ba kale bavua “baludika mêyi abu a tshikisu anu bu mikete” ne bakebesha mvita ne malu a tshikisu. (Misambu 64:3; 120:7; 140:1) Nansha nanku, Bible udi uleja ne: lukuna ludiku lelu ludi ne tshidilu luleja.

 Bible udi wakula bua malu abidi adi aleja bua tshinyi kudi lukuna lua bungi mu bantu lelu.

1.  1. Ukavua mumanyishe bua tshikondo tshivua ‘dinanga dia ba bungi ne bua kukepela.’ (Matayi 24:12) Pamutu pa bantu kuikala ne dinanga, badi bobu benza malu adi akebesha lukuna.​—2 Timote 3:1-5.

2.  2. Mushindu udi lukuna luvulungane lelu udi uleja mudi Satana Diabolo ukebesha malu mabi. Bible udi wamba ne: “Ba pa buloba bonso badi ku bukokeshi bua mubi.”​—1 Yone 5:19; Buakabuluibua 12:9, 12.

 Bible udi uleja kabidi mumbusha Nzambi malu mabi adi makebesha kudi lukuna mu katupa kîpi emu. Kupita apu, neajikije makenga onso adi lukuna lukebele bantu. Bible udi ulaya ne:

•   Nzambi “neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:4.