Malu a tshididi adi atapulula matunga pa buloba bujima. Makebulula menza mu 2022 kudi bena Pew Research Center adi aleja ne: “Bantu bakole bia pa lukama 65 ba mu matunga 19 badi bamba ne: mu matunga abu, bantu badi batua bisumbu bishilangane bia malu a tshididi mpanda badi bakokangana bikole menemene.”

 Ukadi mumone ne: malu a tshididi adi atapulula bantu bikole muaba uudi musombele anyi? Bua tshinyi bidi nanku? Kudi mushindu wa kujikija matapuluka anyi? Mona tshidi Bible wamba.

 Bible ukavua mamanyishe ne: matuku etu aa adiye ubikila ne: “matuku a ku nshikidilu,” bantu ba bungi bavua ne bua kuikala ne bikadilu bidi bibapangisha bua kuikala mu buobumue.

•   “Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale badinangi, . . . kabayi ne lungenyi lua kumvuangana.”—2 Timote 3:1-3.

 Nansha mudi bantu ba bungi badienzeja ne muabu muonso, mbulamatadi idi itata bua kuenza mudimu bimpe. Bantu badi ne mmuenenu ya malu mishilangane badi bamona ne: mbikole anyi mene ne: kabiena mua kuenzeka bua bobu kuenza mudimu pamue bua kujikija ntatu to. Bipeta bidi bijadika tshikavua Bible muambe kukadi bidimu bia bungi.

•   “Muntu [udi ukokesha] muntu mukuabu bua kumukengesha.”—Muambi 8:9.

 Nansha nanku, Bible udi uleja ne: anu mbulamatadi udibu bakokesha kudi muntu udi mua kujikija malu onso adi akengeshisha bantu lelu ke wajikija ntatu.

 Bible udi uleja ne: Yezu Kristo ke mukokeshi udi mukumbane tshishiki. Yezu udi ne bukole, bukokeshi, ne dijinga dia kupetesha bantu bonso buobumue ne ditalala.

•   “Mu matuku ende muntu muakane neatante, ne ditalala nedivulangane.”—Misambu 72:7.

•   “Bisamba bionso nebimuenzele mudimu.”—Misambu 72:11.

 Yezu mmukokeshi muimpe menemene bualu udi utabalela bantu ne mmusue kubambuluisha, nangananga badibu benzele bibi.

•   “Yeye neasungile bapele badi badila balomba diambuluisha, kabidi ne mupuekele ne muntu yonso udi kayi ne mumuambuluishi. Yeye neumvuile bapuekele ne bapele luse, ne yeye neapandishe mioyo ya bapele. Neabasungile ku dikengeshibua ne ku tshikisu.”—Misambu 72:12-14.

 Longa malu makuabu adi atangila Bukalenge bua Nzambi, mbulamatadi wa mu diulu udi Yezu ukokesha. Mona masanka adi bukokeshi buabu mua kukupetesha ne muudi mua kubutua mpanda.

•   Tangila filme wa Bukalenge bua Nzambi ntshinyi?

•   Bala tshiena-bualu tshia “Bukalenge bua Nzambi: Mbulamatadi udi kayi ne dikosa dia mishiku.”