Dipasalala dibi dia mâyi didi dikengeshisha bantu ba bungi pa buloba bujima. Ke tshidi luapolo eyi ileja:

•   ‘Matuku makese mashale aa, nkuloke mvula mubi wa kajomona mu tshimenga tshikulu tshia ditunga dia Chine utu kayi muanji kuloka kukadi bidimu bitue ku 140. Kubangila mu Disambombo too ne mu Disatu, mâyi mapite bungi avua mapasalale mu tshimenga.’​—AP News, 2/8/2023.

•   ‘Dinayi divua dituku dibidi divua tshipepele tshikole tshia Khanun tshikebeshe mvula ya kajomona ne mvunda mikole ku sud kua Japon ivua mishipe bantu batue ku babidi. . . . Badi bela meji ne: mvula wa tshipupu au neakebeshe dipasalala dibi dia mâyi mapite bungi miaba ya mikuna ya munkatshi mua ditunga dia Taïwan.’​—Deutsche Welle, 3/8/2023.

•   “Dipasalala dia mâyi divua dienzeke mu Disambombo ne Dia lumingu [mu ditunga dia Nouvelle-Écosse] divua dikebesha kudi mvula mubi wa kajomona utu kayi muanji kuloka kukadi bidimu 50; mvula au uvua muloke ku muelelu wa Mbuu wa Atlantique mu tshimenga tshia Canada.”​—BBC News, 24/7/2023.

 Ntshinyi tshidi Bible wamba bua malu a nanku?

 Bible udi uleja mutudi mu tshikondo tshidiyi ubikila ne: ‘Mmatuku a ku nshikidilu.’ (2 Timote 3:1) Yezu wakamanyisha ne: tshikondo tshietu etshi netumone “malu adi akuatshisha buôwa.” (Luka 21:11) Dishintuluka dia malu a mivu ke didi ditamba kukebesha malu adi akuatshisha buôwa adi kaayi melela meji adi enzeka bikole ku musangu ne ku musangu.

 Bible udi uleja ne: malu a bungi adi akuatshisha buôwa adi enzeka pa buloba lelu adi ne bua kutupetesha ditekemena. Bua tshinyi? Bualu Yezu wakamba ne: “Panudi numona malu aa enzeka, numanye ne: Bukalenge bua Nzambi budi pabuipi.”​—Luka 21:31; Matayi 24:3.

 Malu atudi tumona enzeka adi aleja ne: mu matuku makese emu Bukalenge bua Nzambi nebukokeshe bua kashidi bintu bia mu bufuki bidi pa buloba pamue ne luendu lua mâyi.​—Yobo 36:27, 28; Misambu 107:29.

 Bua kumanya malu makuabu a muikala Bukalenge bua Nzambi mua kuakaja nsombelu pa buloba, bala tshiena-bualu tshia “Nnganyi wasungila buloba?”