Bilondeshile bulongolodi bua malu a makanda a mubidi (OMS), mu dia 23/5/2022, bantu 6 270 000 bakadi bafue ku disama dia korona. Kadi mu ngumu ivuabu bamanyishe mu dia 5/5/2022, bulongolodi ebu buvua butshinke ne: bungi bua bantu bakadi bafue mbua bungi kupita ebu. Buvua buleje ne: mu tshidimu tshia 2020 ne tshia 2021, “bungi buonso bua bantu badi bafue ku disama dia korona anyi badibu balunguluje kudi disama edi bua masama makuabu akavuabu nawu . . . buvua bufike ku 14 900 000.” Bible kenaku ne tshidiye wamba bua makenga a kanyawu a buena aa anyi?

•    Yezu ukavua muambe ne: “bipupu bia masama” mabi nebikalaku mu tshikondo tshidibu babikila ne: ntshia “matuku a ku nshikidilu.”​—Luka 21:11; 2 Timote 3:1.

 Mêyi avua Yezu muambe au adi enda akumbana lelu. Bua kumanya malu a bungi, bala tshiena-bualu tshia “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

•    “Nzambi wa busambi buonso . . . udi utusamba mu mateta etu onso.”​—2 Kolinto 1:3, 4.

 Mukenji wa mu Bible eu ukadi musambe bantu ba bungi bakadi bafuishe. Bua kumanya malu makuabu, bala tshiena-bualu tshia: “Mua kupita ne kanyinganyinga: Tshiudi mua kuenza mpindieu” ne tshia: “Diambuluisha ditambe buimpe bua bantu badi bafuishe.”

•    “Bukalenge buebe bulue. Disua diebe dienzeke kabidi pa buloba muomumue ne mu diulu.”​—Matayi 6:10.

 “Bukalenge bua Nzambi” bukadi pa kuenza bua “muntu nansha umue udi musombele mu ditunga [kambi] ne: ‘Ndi nsama.’” (Mâko 1:14, 15; Yeshaya 33:24) Tangila filme wa Bukalenge bua Nzambi ntshinyi? bua umanye tshidi mbulamatadi wa mu diulu eu ne malu aluaye kuenza.

 Tudi tukulomba bua ulonge bua kumanya malu makuabu atu Bible wamba bua wewe ne bena mu dîku diebe nusanke pakumbana milayi mimpe ya dikema eyi.