Tshikisu tshia bangondavi tshidi tshikengeshisha bena mu ditunga dia Haïti bikole. Malu a tshikisu mmakebeshe makenga a bungi mu Afrique du Sud, mu Mexique, ne mu matunga makuabu a mu Amerike wa kuinshi. Nansha miaba idi kayiyi tshikisu tshia bungi, ngumu ya buivi ne dinyangakaja bintu bia ditunga idi ipetesha bantu tunyinganyinga ne yenza bua bantu kabadimonu mu bukubi to.

 Ntshinyi tshidi Bible wamba bua dishipa dia mikenji didiku lelu pa buloba bujima?

 Bible ukavua mudianjile kumanyisha ne: dishipa dia mikenji nedikale tshimanyinu tshia “nshikidilu wa ndongoluelu wa malu eu.” (Matayi 24:3) Pavua Yezu Kristo wakula bua malu adi enza tshimanyinu atshi, wakamba ne:

•   “Bua divulangana dia dishipa dia mikenji, dinanga dia ba bungi nedikepele.”​—Matayi 24:12.

 Bible ukavua mumanyishe kabidi ne: “Mu matuku a ku nshikidilu” bantu nebikale “kabayi badikanda, bena luonji, kabayi banange malu mimpe.” (2 Timote 3:1-5) Ngikadilu mibi eyi ke idi ikebesha bienzedi bia dishipa dia mikenji bitudi tumona lelu.

 Kadi kudi tshidi tshitusaka bua kuikala ne ditekemena. Bible udi ulaya ne: mu katupa kîpi emu, dishipa dia mikenji nedijike.

•   “Mu katupa kîpi patupu, bantu babi kabakuikalaku kabidi to;neutangile muaba uvuabu, kabakuikalaku to. Kadi bena bupuekele nebapiane buloba, nebikale ne disanka dipite bungi mu ditalala divule.”​—Misambu 37:10, 11.

 Manya malu makuabu a mukenji wa ditekemena udi mu Bible, ne bua tshinyi udi ne bua kutuishibua ne: malu adi enzeka lelu adi akumbaja dîyi dia buprofete dia mu Bible. Bala biena-bualu bidi bilonda ebi:

 “Ditekemena dilelela dia matuku atshilualua mimpe”

 “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

 “La Bible a-t-elle prédit la mentalité et la conduite des gens de notre époque?”