Mu Dia lumingu dia 20/11/2022, bavua bajikije tshisangilu tshia matunga madisange bua kutangila tshilumbu tshia dinyanguka dia mivu. (COP27) Bamfumu ne bamanyi bapiluke bavua babuele mu tshisangilu atshi bavua bumvuangane bua kupesha matunga mapele makuta bua amone mua kupita ne ntatu idi dinyanguka dia mivu ikebesha. Ba bungi mbamone ne: kuenza nanku kakuakujikija tshidi tshikebesha ntatu ayi to.

•    Mu dia 19/11/2022, António Guterres sekretere generale wa Bulongolodi bua matunga masanga uvua muambe ne: “Ndi ne disanka dia bungi bua mutudi bapangadije bua kufila makuta a kuambuluisha nawu badi batata bua dinyanguka dia mivu. Kadi tudi bamanye ne: kuenza nanku kakuakukumbana to . . . dibulunge dietu edi didi mu lutatu lukole ludi lulomba bua kuenza malu ne lukasa.”

•    Mu dia 20/11/2022, Mary Robinson mfumu wa kale wa ditunga dia Irlande ne muleji mpala wa kale wa tshibambalu tshia manême a bantu tshia ONU uvua muambe ne: “Mu matuku makese emu buloba mbufuane kunyanguka bibi menemene.”

 Bansonga badi basamisha mutu bikole bua tshiafikila dibulunge dietu edi kumpala eku. Kadi bamfumu ba matunga badi mua kuenza mudimu pamue bua kukumbaja mulayi wabu wa kujikija dinyanguka dia mivu anyi? Ntshinyi tshidi Bible wamba?

 Bible udi uleja ne: nansha mbulamatadi yoyi mua kuditatshisha bua kujikija lutatu lua dinyanguka dia mivu, kayakulujikija luonso nkong to. Mona malu abidi adi atusaka bua kuamba nanku:

•    “Tshintu tshidi tshikonyangale, kabena mua kutshilulamija.”​—Muambi 1:15.

   Diumvuija: Mbulamatadi idi ne mikalu bualu bantu kabena mua kudilombola nkayabu to. (Yelemiya 10:23) Nansha bamfumu ba matunga bobu benze mudimu pamue anyi badienzeje mushindu kayi, kabakukumbana anu bua kujikija ntatu idi pa buloba to.

•    “Bualu bantu nebikale badinangi, banangi ba makuta, . . ., kabayi ne lungenyi lua kumvuangana.”​—2 Timote 3:2, 3.

   Diumvuija: Bible ukavua mulaye bimpe ne: matuku etu aa, bantu ba bungi bavua ne bua kuikala badinangi, kabayi bajinga bua kuenza mudimu pamue bua kuambuluisha bakuabu to.

 Mushindu wikala dibulunge dietu edi kumpala eku kawena ulonda milayi ya mbulamatadi ya bana ba bantu to. Nzambi mmusungule Yezu Kristo Mukokeshi mukumbane wa buloba. Bible udi wamba bua bualu buende ne:

•    “Mbulamatadi neikale pa dikaya diende. Nebamubikile ne: Mufidi wa Mibelu wa Dikema, Nzambi wa Bukole, Tatu wa Tshiendelele, Mukalenge wa Ditalala.”​—Yeshaya 9:6, dimanyisha dia kuinshi kua dibeji.

 Yezu ke Mukalenge wa Bukalenge bua Nzambi, anyi mbulamatadi wa mu diulu. (Matayi 6:10) Udi ne bukole, meji, ne dijinga dia kutabalela dibulunge dietu edi ne bantu badi basombelapu. (Misambu 72:12, 16) Mu bukokeshi buende, mbulamatadi wa mu diulu eu neabutule “badi babutula buloba” ne neavuije buloba muaba muimpe wa kusombela.​—Buakabuluibua 11:18, dimanyisha dia kuinshi kua dibeji; Yeshaya 35:1, 7.

 Bua kumanya malu makuabu a tshikala mua kujikija tshipupu tshia dinyanguka dia mivu, bala tshiena bualu tshia “Dinyanguka dia mivu ne malu mimpe adi matuindile: Tshidi Bible wamba”