“Masama a mitu adi mu bansonga, mbualu bua kutabalela ne lukasa; ne tshidi tshitamba kuakebesha mmiaba ya dipetelangana ku enternete.”​—Doktere Vivek Murthy, wa mu ÉTATS-UNIS, New York Times, mu dia 17/6/2024.

 Mmushindu kayi udi baledi mua kukuba bana babu ku njiwu ya miaba ya dipetelangana ku enternete? Bible udi ufila mibelu idi yambuluisha.

 Konkononayi mêyi manene a mu Bible aa:

 “Muntu mudimuke udi welangana meji a tshidia tshionso tshidiye wela.”​—Nsumuinu 14:15.

 Kuena muenzejibue bua kulekela muanebe ubuela miaba ya dipetelangana ku enternete to. Bualu idi mua kumukebela njiwu. Kumpala kua wewe kumuanyishila bua kubuela miaba ayi, ikala mutuishibue ne: ukadi mushindame mu lungenyi, mukumbane bua kudikosela dîba dia kubuelamu, kudia bulunda ne bantu bimpe, ne kuepuka bintu bidi kabiyi ne mushinga.

•   Bua kumanya malu makuabu, bala tshiena-bualu tshia “Mon enfant devrait-il utiliser les réseaux sociaux?” ne tshia “Protégez votre adolescent des dangers des réseaux sociaux.”

 ‘Enza malu bimpe bitambe ne dîba diebe.’​—Efeso 5:16.

 Wewe muanyishile muanebe bua kubuela miaba ya dipetelangana ku enternete, muelele mikenji ya tshidiye mua kuenza padiye ubuelamu, umumvuija muikala mikenji eyi mua kumuambuluisha bua kapetshi njiwu to. Ikala mumanye bikadilu bia muanebe bidi kukuleja ni udi mua kumukandika dibuela miaba ayi.

•   Leja muanebe filme wa benda bazola bimfuanyi wa Ikala ne meji paudi mu site wa dipetelangana ne bantu ku Enternete bua kumuambuluisha amanye mushinga wa kudielela mikalu.

 Bible udi wamba ne: tudi mu “bikondo bia malu makole bidi bikole mua kupita nabi.” (2 Timote 3:1-5) Mu tshikondo etshi, ke mudi Bible utupesha mibelu mimpe ya mua kupita bimpe ne ntatu. Kudi biena-bualu bipite pa 20 bidi baledi ne bana mua kupeta mu tshiena-bualu tshidi tshiakula bua masama a mitu mu bansonga.