Mua kupita ne bunkaya
Udiku umvua bunkaya anyi udimona nkaya anyi? Biobi nanku, pamuapa udi umvua pebe anu muvua mufundi wa musambu eu mumvue pende. Wakamba ne: “Ndi anu bu nyunyi wa tshienda nkaya pa musaka wa nzubu.” (Misambu 102:7) Meji adi mu Bible adi mua kukuambuluisha bua kutua ntatu idi bunkaya bukebesha tshiadi.
Semena pabuipi ne Nzambi
Nansha mu tshikondo tshia bunkaya, udi mua kuikala ne disanka wewe mumanye dijinga diebe dia malu a mu nyuma ne udikumbaja. (Matayi 5:3, 6) Bintu bidi bilonda kuinshi eku bidi mua kukuambuluisha, kuakubifidila makuta to. Mbiobi ebi:
Bible wa ku Enternete mmujalame ne mmupepele bua kubala
Filme mîpi idi itangila amue malongesha a mu Bible a mushinga
Tshitupa tshia “Mandamuna a nkonko ya mu Bible” tshidi tshiandamuna nkonko itu bantu ba bungi badiela
Tshitupa tshia “Nuidikije ditabuja diabu” tshidi tshilonda bimpe mianda ya balume ne bakaji ba lulamatu ba mu Bible
Tshitupa tshia “Mbidienzekele anyi mbifuka?” tshidi tshileja bulengele ne bintu bidi bikemesha bia mu bufuki
Bala mvese ya mu Bible idi ikolesha
Mvese idi ilonda kuinshi eku mmikoleshe bantu ba bungi. Pamutu pa wewe kubala mvese ya bungi musangu umue, tetabi kuenza malu ne dîba diudi nadi bua bunkaya bua kuelangana meji a mvese ne mvese yonso ne kusambila.—Mâko 1:35.
Manya diumvuija dia mianda idi yenzeka pa buloba
Udi mua kutua nsombelu mukole yonso kayi tshiadi wewe mumanye bua tshinyi malu mabi adi enzeka ne muikala Nzambi muakuajikija.—Yeshaya 65:17.
Tshimanyinu tshia matuku a ku nshikidilu ntshinyi?
Epuka tunyinganyinga tua patupu
Biena-bualu bidi bilonda kuinshi eku bidi mua kukuambuluisha bua kupita ne tunyinganyinga tudi bunkaya bukebesha ne bua ‘kulekela kuditatshisha.’—Matayi 6:25.
Diaku bulunda ne bakuabu
Balunda badi bakuambuluisha bua kuikala ne ditalala mu meji ne mu muoyo webe, ne badi nangananga ne mushinga mu bikondo biudi kuyi mua kutuilangana ne bantu bakuabu bipepele to. Biwikala kuyi ne mushindu wa kupatuka lubanza, udi mua kulama bulunda buenu ne balunda bebe ba kuonso eku ne kukeba kabidi bakuabu bapiabapia, wewe ubabikila ku biamu bia numuenangana ku bule anyi ku telefone. Biena-bualu bidi bilonda kuinshi eku bidi mua kukuambuluisha bua kukeba ‘balunda balelela’ ne kuikala wewe muine mulunda mulelela.—Nsumuinu 17:17.
Ikala wibidija mubidi
Bible udi wamba ne: “dibidija dia mubidi didi ne mushinga.” (1 Timote 4:8) Didi mua kukuambuluisha bua kuikala ne ditalala mu meji ne mu muoyo webe, nangananga paudi udimona nkaya. Nansha wewe kuyi ne mushindu wa kupatuka lubanza, pamuapa kudi malu audi mua kuenza bua wikale bimpe.
