Luapolo lua bulongolodi bua matunga masanga ludi luleja ne:

•   Kutuadijila mu dia 7/10/2023 too ne mu dia 23/10/2023, ndululu ya mu tshimenga tshia Gaza mu Israël mmikebeshe lufu lua bantu bapite pa 6 400 ne bantu 15 200 mbatapike bibi; ba bungi ba kudibu ki mbasalayi to. Bualu bukuabu, bantu binunu nkama ne nkama mbamuangale.

•   Anu bu muvuabi bua mvita ya mu Russie ne mu Ukraine ya mu dia 24/9/2023, mu Ukraine, bantu badi kabayi basalayi 9 701 bakafua ne bantu 17 748 bavua batapike.

 Nditekemena kayi didi Bible upesha bantu badi batata bua mvita?

 Bible udi ulaya ne: Nzambi ‘neajikije mvita pa buloba buonso bujima.’ (Misambu 46:9) Neumbushe mbulamatadi ya bantu bua kupingaja wende wa mu diulu anyi Bukalenge buende. (Danyele 2:44) Bukalenge bua Nzambi nebujikije ntatu ya bukua bantu.

 Mona tshienza Yezu Kristo, Mukalenge wa Bukalenge bua Nzambi:

•   “Neasungile bapele badi badila balomba diambuluisha, kabidi ne mupuekele ne muntu yonso udi kayi ne mumuambuluishi. Yeye neumvuile bapuekele ne bapele luse, ne yeye neapandishe mioyo ya bapele. Neabasungile ku dikengeshibua ne ku tshikisu.”​—Misambu 72:12-14.

 Nzambi neajikije bupele ne makenga bikebesha kudi mvita ne tshikisu bua kashidi ku diambuluisha dia Bukalenge buende.

•   “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:4.

 Mu katupa kîpi emu, Bukalenge bua Nzambi bukadi pa kuangata malu onso a pa buloba mu bianza. Bible ukavua muakule bua “mvita ne ngumu ya mvita” itudi tumona lelu. (Matayi 24:6) Malu aa ne makuabu adi aleja ne: tudi mu “matuku a ku nshikidilu” wa makokeshi a bana bantu.​—2 Timote 3:1.