NUSHALE BATABALE!
Tshikisu mu malu a tshididi—Ntshinyi tshidi Bible wamba?
Bienzedi bia bungi bia tshikisu mu malu a tshididi mbitangalake pa buloba bujima.
Dishipa dia bena tshididi 39 ba mu Mexique ditu katshia kadiyi dianji kuenzeka, kusangisha ne malu a tshikisu makuabu mbinyangakaje masungulangana a tshidimu tshia 2023-2024.
Matuku mashale aa, malu a tshikisu mu tshididi mmavulangane bikole ku Mputu. Tshilejilu, bavua bajinge kushipa mmena kavula mbedi wa ditunga dia Slovaquie mu dia 15/5/2024.
Bantu ba États-Unis bavua bumvue bibi menemene pavuabu bajinge kushipa mfumu udiku, Donald Trump mu dia 13/7/2024.
Bua tshinyi kudi malu a bungi a tshikisu mu tshididi? Kaakujikaku anyi? Ntshinyi tshidi Bible wamba?
Bakavua bamanyishe ditapulukangana mu tshididi
Bible ukavua mudianjile kumanyisha bua bikondo bietu ebi, bidiyi ubikila ne: “matuku a ku nshikidilu,” bantu ba bungi nebikale ne bienzedi bia tshikisu ne kabayi bumvuangana to.
“Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale . . . kabayi ne dianyisha, kabayi ne lulamatu, . . . kabayi ne lungenyi lua kumvuangana, . . . bena luonji, . . . batungidianganyi, bena mutu mukole, badiuwuja ne lutambishi.”—2 Timote 3:1-4.
Bible ukavua mumanyishe kabidi ne: bimvundu bu mudi ditombokela mbulamatadi ne ndululu ya malu a tshididi bivua ne bua kuenzeka matuku etu aa. (Luka 21:9, dimanyisha) Nansha nanku, tshikisu ne ditapulukangana mu tshididi kabiakushalaku kashidi to.
Dijika dia malu a tshikisu mu tshididi
Bible udi umvuija ne: Nzambi neumbushe mbulamatadi yonso ya bana ba bantu, ne neapingaje mbulamatadi wende yeye wa mu diulu.
‘Nzambi wa mu diulu neajadike Bukalenge bukuabu buazaza makalenge makuabu aa onso ne nebuatuishe ku ndekelu, ne buobu nkayabu nebushalaku kashidi.’—Danyele 2:44.
Bukalenge bua Nzambi nebusangishe bantu mu buobumue ne nebujadike ditalala pa buloba bujima.
Bible udi ubikila Yezu Kristo Mulombodi wa Bukalenge ebu ne: “Mukalenge wa Ditalala,” ne neenze bua ne: ‘ditalala edi kadikadi ne ndekelu to.’—Yeshaya 9:6, 7.
Nansha lelu, bantu badi Bukalenge ebu bukokesha badi balonga mua kusomba mu ditalala. Bua bualu abu, Bible udi wamba ne: “Nebafule miele yabu ya mvita kuyivuija nkasu ya kudima nayine mafuma abu kuavuija miele ya kusonza nayi mitshi. Tshisamba katshiakujudila tshisamba tshikuabu muele wa mvita, kabakulonga kabidi mvita nansha.”—Yeshaya 2:3, 4.
Bua kumanya malu makuabu, bala tshiena-bualu tshia “Bukalenge bua Nzambi nebuenze tshinyi?” ne tangila filme wa Bukalenge bua Nzambi ntshinyi?