Ntshinyi tshidi Bible wamba bua biyole bia nzala bia matuku etu aa?

TELEJA MU

“Kakuakuikala kabidi nzala to.” Mêyi aa adi aleja tshipatshila tshidi bamfumu ba buloba bujima badifundile bua kujikija lumue lua ku ntatu mibi mitambe idi ikuata bantu, mmumue ne: kupesha bantu bonso ba buloba bujima biakudia. a Kadi nzala neijikaku pa buloba anyi? Ntshinyi tshidi Bible wamba?

Bible ukavua mulaye biyole bia nzala bia matuku etu aa

Bible wakadianjila kumanyisha ne: nekuikale biyole bia nzala matuku etu aa adiyi ubikila ne: “matuku a ku nshikidilu.” (2 Timote 3:1) Nzambi ki ngudi ukebesha biyole bia nzala ebi to, kadi mmutudimuije bua bualu buabi. (Yakobo 1:13) Mona mêyi abidi a buprofete a mu Bible adi akula bua biyole bia nzala:

“Nekuikale biyole bia nzala, . . . ku muaba ne ku muaba.” (Matayi 24:7) Mulayi wa buprofete wa mu Bible au ukavua muleje ne: nekuikale biyole bia nzala mu matunga a bungi. Luapolo ludibu bapatule matuku adi panshi aa kudi bantu badi balonga mua kudima biakudia ne kubiabanyinangana ludi luleja ne: “Tshilumbu tshia biyole bia nzala bidi pa buloba ne dipangila dia biakudia bimpe anyi bikumbane tshidi tshienda tshinyanguka bikole menemene.” b Mu matunga a bungi bantu miliyo nkama ne nkama kabena bapeta biakudia bidibu bakengela to. Bia dibungama ba bungi ba kudibu badi bafua.

“Tangilayi! kabalu kafiike, ne eu uvua musombapu uvua ne tshipiminu mu tshianza tshiende.” (Buakabuluibua 6:5) Mu dîyi dia buprofete adi, kabalu ne muendeshi waku ntshimfuanyi tshia biyole bia nzala mu matuku a ku nshikidilu. c Muendeshi wa kabalu udi ne tshipiminu mu tshianza bua kupima biakudia. Padi muendeshi wa kabalu au upita, dîyi didi dimanyisha ne: biakudia nebibande mushinga bikole ne didi didimuija bantu bua kulama biakudia bia mushinga. (Buakabuluibua 6:6) Bualu abu budi buleja bimpe menemene biyole bia nzala bidi bikuata bantu miliyare ne miliyare pa buloba bujima matuku etu aa, kabayi mua kupeta biakudia bimpe anyi kukokesha bua kubisumba to.

Muajika biyole bia nzala

Bamanyi bapiluke badi baleja ne: buloba budi bupatula biakudia bungi budi bukengela bua kudiisha bantu bonso. Kadi nntatu kayi idi ikebesha biyole bia nzala? Bilondeshile Bible, ntshinyi tshienza Mufuki wetu Yehowa d bua kujikija ntatu ayi?

Lutatu: Mbulamatadi kayena mua kujikija bupele ne dishilangana mu malu a mpetu didi diladisha bantu ne nzala to.

Muajikalu: Bukalenge bua Nzambi anyi mbulamatadi wa bantu bapuangane nebupingane makalenge a bantu bapange bupuangane. (Danyele 2:44; Matayi 6:10) Lelu eu, bapele ba bungi badi batata bikole bua kupeta makuta a kusumba biakudia, kadi mu Bukalenge bua Nzambi malu onso neashintuluke. Bible udi wamba bua Yezu Kristo Mukalenge wa Bukalenge bua Nzambi ne: “Neasungile bapele badi badila balomba diambuluisha, kabidi ne mupuekele ne muntu yonso udi kayi ne mumuambuluishi. . . . Nekuikale ntete ya bungi pa buloba; neyivulangane bikole pa nsongo ya mikuna.”—Misambu 72:12, 16.

Lutatu: Mvita itu ibutulangana ne inyangakaja malu a mpetu, nunku bitu bikolela bantu bua kupeta biakudia bidibu bakengela.

Muajikalu: “[Yehowa] udi ujikija mvita pa buloba buonso bujima. Udi utshibula buta bua mikete ne usunsula difuma; udi wosha matempu a basalayi ne kapia.” (Misambu 46:9) Nzambi neabutule bia mvita ne bantu badi bakebesha mvita. Pashishe, muntu yonso kakutata bua kupeta biakudia to. Bible udi ulaya ne: “Muntu muakane neatante, ne ditalala nedivulangane.”—Misambu 72:7.

Lutatu: Dinyanguka dibi dia mivu ne bipupu bidi binyangakaja bia pa madimi ne bishipa nyama.

Muajikalu: Nzambi neakokeshe makole a mu bufuki bua kuikale mushindu muimpe wa kukolesha biakudia. Bible udi wamba ne: “ [Yehowa] udi utuyisha tshipepele; mavuala a mbuu adi abatama. . . . Udi ukudimuna tshipela tshilua majiba a mâyi adi ne malenge, ne buloba bume bulua mishimi ya mâyi. Udi usombeshamu badi ne nzala . . . Badi badima madimi ne badima madimi a tumuma tua mvinyo adi akuama bintu bia bungi.”—Misambu 107:29, 35-37.

Lutatu: Bantu babi ne bena lukuka badi badima biakudia bidi binyanga mubidi anyi benza bua biakudia kabifiki kudi bantu badi nabi dijinga to.

Muajikalu: Bukalenge bua Nzambi nebumbushe bantu babi bonso ne bena dishima. (Misambu 37:10, 11; Yeshaya 61:8) Bible udi wamba bua Yehowa Nzambi ne: “Yeye udi wenza bua benzele bantu badibu badie bintu malu ne buakane, yeye udi upesha badi ne nzala diampa.”—Misambu 146:7.

Lutatu: Tshidimu tshionso, tshia bisatu tshia biakudia bia buloba bujima tshidi tshiyanguka anyi tshijimina.

Muajikalu: Mu Bukalenge bua Nzambi, bantu bikale batangila malu a biakudia nebabanye biakudia mu mushindu muimpe. Yezu kakanyanga biakudia pavuaye pa buloba to. Tshilejilu, dituku dikuabu wakadiisha musumba wa bantu bapite pa 5 000 mu tshishima. Pashishe wakambila bayidi bende ne: “Sangishayi bipese bidi bishale, bua tshintu nansha tshimue katshijiminyi to.”—Yone 6:5-13.

Bukalenge bua Nzambi nebujikije ntatu idi ikebesha nzala. Nunku bantu bonso nebikale ne disanka dia kuikala ne biakudia bimpe menemene bia bungi. (Yeshaya 25:6) Bua kumanya dîba dikala Bukalenge bua Nzambi mua kukumbaja bualu abu, bala tshiena-bualu tshia “Bukalenge bua Nzambi nebutuadije kukokesha buloba dîba kayi?”

a Mu 2015 bena mu matunga onso adi enza Bulongolodi bua matunga masanga bavua bafunde malu alongololabu bua kashidi mu 2030.

b Luapolo lua bitupa bia Bulongolodi bua matunga masanga (FAO, FIDA, UNICEF, PAM, ne OMS).

c Bua kumanya bia bungi pa bidi bitangila bendeshi ba tubalu bonso banayi ba mu Buakabuluibua, bala tshiena-bualu tshia “Bendeshi ba tubalu banayi mbanganyi?”

d Yehowa ndîna menemene dia Nzambi. (Misambu 83:18) Bala tshiena-bualu tshia “Yehowa nnganyi?”