Mu dia 24/5/2022, bualu kampanda bua kanyawu mbuenzeke mu tshimenga tshikese tshia Uvalde, mu Texas, mu États-Unis. Tshibejibeji kampanda ntshiambe ne: “Lumangu mukuabu muambule tshingoma mpila muonji mmuase bana batekete 19 ne balongeshi babidi . . . mu tshilongelu tshia tulasa tupuekele tua Robb.”​—The New York Times.

 Diakabi, malu mabi a mushindu eu akadi mashale tshilele. Tudiomba kampanda tua mu États-Unis amu ntuleje ne: bua mu ditunga adi nkayadi, “tshidimu tshishale etshi mbashile bantu 249 mu bilongelu bia tulasa. Kabatu banji kuasa bantu bungi ebu tshidimu tshikuabu katshia ku tshidimu tshia 1970 to.”

 Malu a kanyawu a mushindu eu adi enzeka bua tshinyi? Ntshinyi tshidi mua kutuambuluisha padiwu atufikila? Malu a tshikisu neajikaku dimue dituku anyi? Bible udi wandamuna nkonko yonso eyi.

•   Bible udi ubikila matuku etu aa ne: ‘mmatuku a ku nshikidilu’ adi bantu ba bungi “kabayi banange bana babu” ne “bena luonji.” Mmumue ne: benzelangana malu mabi a tshikisu. Bantu ba nunku “nebatungunuke ne kunyanguka bibi menemene.” (2 Timote 3:1-5, 13) Bua kumanya malu makuabu, bala tshiena-bualu tshia “La Bible a-t-elle prédit la mentalité et la conduite des gens de notre époque?”

 Bantu ba bungi batu badiebeja ne: ‘Bua tshinyi Nzambi kena wenza bua malu a kanyawu bu mudi a diashilangana mu tulasa kayikadi enzeka?’ Bua kumanya mudi Bible wandamuna lukonko elu, bala tshiena-bualu tshia ne: “Malu mabi adi afikila bantu bimpe​—bua tshinyi?”

•   “Malu onso avuabu bafunde kale bavua baafunde bua kutulongesha, bua tupete ditekemena ku diambuluisha . . . dia busambi bua mu Mifundu.”​—Lomo 15:4.

 Mêyi manene a mu Bible adi mua kukuleja tshia kuenza padibu bakuenzela malu a tshikisu. Bua kumanya malu makuabu, bala tshibejibeji tshia Tabulukayi! mu tshiena-bualu tshia “La violence cessera-t-elle un jour?”.

 Baledi bobu basue kumanya mua kuambuluisha bana babu bua bamanye tshia kuenza padibu bamona anyi bumvua ngumu ya malu adi enza buôwa, badi mua kubala tshiena-bualu tshia “Enfants et actualités troublantes.”

•   “Neabasungile ku dikengeshibua ne ku tshikisu.”​—Misambu 72:14.

•   “Nebafule miele yabu ya mvita kuyivuija nkasu ya kudima nayi ne mafuma abu kuavuija miele ya kusonza nayi mitshi. Tshisamba katshiakujudila tshisamba tshikuabu muele wa mvita, kabakulonga kabidi mvita nansha.”​—Mika 4:3.

 Nzambi neenze tshidi bantu kabayi bakumbana bua kuenza to. Mbulamatadi wa Bukalenge buende bua mu diulu neabutule bingoma bionso ne neajikije malu onso a tshikisu. Bua kumanya malu a bungi a tshienza Bukalenge bua Nzambi, bala tshiena-bualu tshia ne: “Mu Bukalenge bua Nzambi ‘ditalala nedivulangane.’”