Mu ngondo wa 7 ne wa 8, bua musangu wa kumpala, bana betu ba buloba bujima badi ne bua kutangidila mpungilu wa rejon wa 2020 mu filme mu tshikondo tshimue tshimue bobu bonso. Bua bualu ebu kuenzeka, bivua bikengela kukudimuna filme ayi mu miakulu mipite pa 500. Mu kuamba kuimpe, bivua ne bua kuangata tshidimu tshijima anyi tshidimu ne matuku ndambu bua kulongolola mudimu wa mushindu au, kukudimuna miyuki ne filme, ne kubikuata. Kadi anu bua lutatu lua tshipupu tshia korona, bakudimunyi bavua anu ne ngondo mishadile ku inayi patupu bua kujikija mudimu wonso wa Mpungilu wa rejon wa 2020 wa ‘Ikalayi nusanka misangu yonso’! au.

Bena midimu ya dikumuna ne Bena mudimu wa disumbila Betele ya buloba bujima bintu badi ku Biro binene bia buloba bujima bia Bantemu ba Yehowa bakambuluisha mu mudimu munene au. Bena midimu ya dikudimuna abu bavua baleje ne: bivua bikengela kupetesha tusumbu tua bungi tua bakudimunyi bintu bikuabu bua kukumbaja mudimu eu, nangananga mikro mimpe menemene. Bena mudimu wa disumbila Betele ya buloba bujima bintu bakasumba mikro 1 000 bobu kuyituma miaba mitue ku 200.

Bua kulaminyina makuta, bana betu abu bakasumba mikro ya bungi, yonso misumba kaba kamue ku tshibumbu. Pashishe, bakanji kuyituma kaba kamue kavuabu bayikutulula, bayikanga kabidi mu mabuki avuabu balua kutumina bakudimunyi ba miaba mishilangane pa buloba bujima. Muvua mikro ayi misumba yonso kaba kamue ku tshibumbu, mukro umue mmusumbila ku mushinga wa ndola 170, muine amu musangisha ne makuta a diyambuisha bua kuyitumina bakudimunyi. Au mmushinga mushadile bikole ku makuta atuvua mua kuikala batule bua kusumba mikro yonso ayi ku umue ku umue.

Bena mudimu wa disumbila Betele ya buloba bujima bintu bavua ne bua kusumba mikro eyi ne kuyitumina bakudimunyi anu mu ngondo muinayi ne muitanu wa 2020: tshikondo tshivua midimu ya bangenda-mushinga ba bungi kayiyi itamba kuenzeka anu bua tshipupu tshia korona. Nansha nanku, pakavua ngondo muitanu mutangile ku ndekelu, bana betu badi miaba ya bungi ya kule idi biro bia mudimu wa dikudimuna, ba ku Betele mishilangane, ne ba miaba mikuabu idi mudimu wa dikudimuna wenzekela bakavua bapete bia mudimu bionso bivuabu nabi dijinga.

Muanetu Jay Swinney, udi utangila Bena mudimu wa disumbila Betele ya buloba bujima bintu, udi wamba ne: “Bena ku Betele ne bapanyi ba bintu ba pambelu bavua beleshangane diboko bimpe mu mudimu wonso eu. Anu nyuma wa Yehowa ke uvua mutuambuluishe bua kuenza mudimu eu ne lukasa nunku ne kulobelela makuta avua atuka bua kuambuluisha bana betu.”

Muanetu Nicholas Ahladis, utu pende wambuluishangana ne Bena midimu ya dikudimuna, udi wamba ne: “Dîba adi, bakudimunyi bavua kabatshiyi mua kupatuka anu bua tshipupu tshia korona, bavua babakankamije bikole bua kupetabu mikro ayi. Nansha muvuabu kabayi mua kutuilangana ne kasumbu ka bakudimunyi nabu bakuabu, mbenze nabu bonso mudimu pamue bimpe bua kukudimuna ne kukuata miyuki, drama, ne misambu mu miakulu mipite pa 500.”

Mudimu eu ngumue wa ku midimu ya bungi ivuabu benze bua kupatuila dîku dia bana betu ba pa buloba bujima Mpungilu wa rejon wa 2020 wa ‘Ikalayi nusanka misangu yonso’! Mapa anuvua bafidile ku donate.pr418.com ne muoyo mujima anyi mu mishindu mikuabu ke avua masumbe bia mudimu bionso bivua bikengedibua ebi.