Lelu Bantemu ba Yehowa badi bapetela mikanda idi yumvuija malu a mu Bible ne filme mu biamu kupita ne kumpala. Kadi miaba ya bungi pa buloba, bana betu kabena ne mushindu wa kubuela ku Enternete to. Kudi badi basombele miaba idi nzembu iya bikole, bakuabu Enternete wabu udi wenda ne majetete, ne banga kabena nansha nende to.

Nansha nanku, bana betu ba bungi badi ne mushindu wa kuambula mpindieu mikanda ne filme yetu mu tuamu nansha kabayi ne Enternete to. Bidi bienzeka nanku mushindu kayi?

Nku diambuluisha dia JW Box. Ntuamu tukese tudibu batumine bisumbu bia miaba idi Enternete kayi wenda bimpe to. Munkatshi muatu mudi kamu (kamotere) ka kuambula naku bintu mu lupepele kadibu basumbe kua tshianana, mudi kabidi programe udi wendesha kamotere aku muenza kudi Tshibambalu tshia malu a ordinatere tshia ku Betele, mudi ne mikanda ne filme itu mu site wetu wa jw.org. Kashete kajima ka JW Box konso nkangate makuta matue ku dolare 75.

Ku Nzubu wa Bukalenge, bua bana betu kubuelabu ne tuamu tuabu ku JW Box bua kuambula mikanda ne filme idimu, kabiena bibalomba kuasa nshinga kampanda ku JW Box to, bidi bienzekela mu lupepele. Nansha wewe ne tshiamu tshia kale anyi tshia makuta makese, udi anu mua kubuela natshi ku JW Box bua kuambula bintu. Kadi tshisumbu tshiotshi katshiyi ne mushindu wa kubuela ku Enternete, mmushindu kayi udibu mua kuenda kusakidila mikanda anyi bintu bipiabipia mu JW Box? Ku tshikondo ne ku tshikondo, Betele neikale utuma flash ya mushinga wa dolare mitue ku 4, mikale ne bintu bipiabipia bia ku jw.org bia kusakidila mu JW Box.

Mmunyi mukadi JW Box muambuluishaku bana betu? Muanetu Nathan Adruandra (tatu wa dîku musombele mu R.D. Congo) udi wamba ne: “Ndi mupatate bikole bua kuambula drame wa ‘Yehowa, ndi mukueyemene’ ne wa ‘Vuluka mukaji wa Lota,’ kadi tshiyi nkokesha bua kuyambula to. Bivua bintekesha mu maboko. Mpindieu ndiku ne mushindu wa kuyambula mu tshiamu tshianyi; abi bidi bituambuluisha tuetu baledi bua kulongesha bana betu bimpe.”

Muanetu kampanda utu wambuluisha bana betu ba mu Nigeria bua kuteka JW Box mu bisumbu biabu udi wamba ne: “Bana betu badi bamona ne: JW Box ndipa dia pa buadi dia kudi Yehowa. Badi ne disanka bua mudibu mpindieu ne mushindu wa kuambula mikanda ne filme ya mu Bintu bietu bia kulongesha nabi kakuyi lutatu.”

Bakadi batumine bana betu ba mu Afrike, mu Océanie, ne mu Amerike wa kuinshi JW Box mipite pa 1 700. Badi benda balongolola bua kuyitumina kabidi bisumbu bikuabu bia bungi. Makuta atubu basumba nawu JW Box atu afumina kuepi? Atu afumina mu mapa atubu bafila bua mudimu wetu wa buloba bujima. A bungi a kudiwu batu baafidila ku donate.pr418.com. Tuasakidila wa bungi bua kutua mudimu eu mpanda ne muoyo mujima mushindu eu.