MYAKA makulukaji atanu anahichimo, vatu vaze vahanjika lilimi lyaSpanish vayile kulifuchi lyaCosta Rica. Lifuchi kana valivulukile ngwavo Costa Rica mwomwo yakushinganyeka ngwavo navawanamo palata, oloze yauchimo. Eli Lifuchi kavalitachikiza mwomwo yaluhetoko, oloze mwomwo mwatwama mitondo navimuna vakulisezaseza.

Vatu vamulifuchi lyaCosta Rica vavatachikiza kupwa vakiko vaTicos, lizu lize veji kuzachisanga muchisemwa chavo lize lyafuma kulizu “ico” lize veji kunungilanga kusongo yamazu mangana akehe. Chakutalilaho, muchishishisa chakwamba ngwavo, “un momento” kulumbununa (vanguvandamineko mwane), vanahase kuhanjika ngwavo “un momentico” (vanguvandamineko chindende mwane). Kakavulu veji kuhanjikanga ngwavo “¡pura vida!” kulumbununa (kuyoya chamwaza) mangana vasolole nge vanasakwilila chipwe chivwasano chipwe vambenga ngwavo “ngunameneka mwane” chipwe “mwoyo wenu.”

Mulifuchi lyaCosta Rica mwatwama kulya chize vazanga chikuma vatu. Kulya kana vachivuluka ngwavo gallo pinto chipwe ngwetu loso lize vanachingasana namakunde. Kulya kana vanahase kulyaulacho nachimene,  chipwe kuchilya namusana nachingoloshi. Wala vazanga kunwa vatu vamulifuchi kana shina café chorreado. Wala kana veji kuukelanga kuzachisa coffee.

Mulifuchi lyaCosta Rica muli kafwe vikungulwilo vyakuheta ku 450 vyaVinjiho jaYehova. Kukunguluka chavo chili mumalimi akuheta ku 10 kuhakilako vene nalilimi lyatuveveve lyakuCosta Rica namalimi avali vazachisa mulifuchi kana, akufwana nge Bribri naCabecar.