HANYIMA yakuwana unjiho wosena, vatu vavavulu vanawane nge kuyoya kachalijilile chiveneko, oloze kwatwama mutu wakulitulaho uze ahakileko kuyoya. Achishinganyekenu hachakutalilaho chaAntony Flew uze atanga mangana autu, uze kafwelelele muli Kalungako. Flew alumwine muchima wenyi hakulinangula omu vyeji kuzatanga vyuma vyakuyoya vyakukomwesa navyuma vatanga mumelu nahamavu. Asonekele vyuma vahanjikile vaze valinangula mangana autu vakushikulu ngwenyi: “Twatela kwitavila vyuma vize navakukulula numba tuhu kavyayile muze twashinganyekeleko.” Flew ahanjikile nawa ngwenyi vyuma vahanjikile ava vatu valinangula mangana autu vyasolola nge Tengi kwatwama.

Gerard uze twavulukanga kumaputukilo achihande chino, naikiye etavilile mazu kana. Numba tuhu Gerard alinangwile chikuma mangana akukaye nakulinangula chiyoyelo chatututu, oloze ambile ngwenyi: “Kangwamwene unjiho wasolola nge kuyoya chalijilile chiveneko. Hakumona omu vyuma vyakuyoya vyeji kuzatanga mukulonga, vyangulingishile ngufwelele ngwami kwatwama Mutu Avitengele.”

Ngana muze mutu nahase kulinangula mulimo wakufunjejeka hakukekesa mulimo wamuka-kufunjejeka, naGerard atachikijile vilinga vyaTengi hakulinangula vyuma vyakutenga. Alinangwile nawa Mbimbiliya mukanda uze wahanjika havilinga vyaTengi. (WaChimoteu 2, 3:16) Kutanga Mbimbiliya chamukafwile awane muvakumbulwila vihula vize vyapandama kuchiyoyelo chavatu vakushikulu nomu vatu makumbi ano vanahase kulipika naukalu vali nakumona. Echi chamulingishile afwelele nawa ngwenyi Mbimbiliya yapwa mukanda uze vahwima kuli Kalunga.

Ngana muze chapwile kuli Gerard, chapwa chachilemu kutanganga Mbimbiliya mwomwo yakumbulula vihula vyapandama kukuyoya. Tuli nakumikolezeza mutangenga Mbimbiliya.