MUSONGO vavuluka ngwavo scleroderma walumbununa “kunjinjila chikova.” Musongo kana uli nakuyanjisa vatu kafwe jimiliyoni 2.5 mukaye kosena. Musongo kanou weji kukwatanga navanyike, kaha nawa weji kumisanga chikova.

Elisa vamuwanyine namusongo kana omu apwile namyaka yakusemuka 10. Musongo wascleroderma weji kwenyekanga chikova nakulingisa vilyo vyamujimba vyakufwana nge jiso, muchima, mahuyungu, namijingwa vihone kuzata kanawa. Vandotolo vashinganyekele ngwavo vitumbo navahana Elisa navimukafwa ayoye kaha myaka 5. Oloze munahichi jino myaka kafwe 14 kufuma haze vamuwanyine namusongo kana, kaha hanga achili nakuyoya. Numba vahona kumuka musongo wenyi, oloze apwa wakuwahilila mukuyoya chenyi. Vaka-kusoneka Tonenu! vahulishile Elisa avalweze vyamusongo wenyi novyo vyeji kumujikijisanga.

 Lwola muka watachikijile ngwove uli namusongo?

Omu ngwapwile namyaka yakusemuka 9, ngwalilemekele kumunguza, kaha ngwevwile kukola chikuma. Mbandu yatohwele lika chakuhona kukanguka. Omu vapimine manyinga ami, vanguwanyine namusongo wascleroderma. Hakuwana nge musongo kana wapwile nakutohwelako lika, chasakiwile kutonda ndotolo uze atachikiza kuka musongo kana.

Kutala ndotolo wamuwanyine tahi?

Eyo, ndotolo twamuwanyine. Uze ndotolo alwezele visemi jami vitumbo vize navingukafwa nguyoyeko hamyaka 5, nakufwelela ngwami musongo wami nauunda. Vitumbo anguhanyine uze ndotolo vyalingishile vihanda vyamumujimba wami vihone kuzata kanawa. Chipwe musongo wachishikashika unahase kunguhitula.

Musongo kana kawakuhitwileko.

Eyo, musongo kana kawangujihileko. Omu ngwapwile namyaka yakusemuka kafwe 12, shimbu jimwe ngwevwilenga kukola mutulo, kukola kana chambachilenga minyutu 30, jola jimwe kavali halikumbi. Kukola kana chatohwele nakungulingisa ngutetumukenga.

Vyuma muka vyanehele musongo kana?

Vandotolo vawanyine nge manyinga akehele mumujimba wami, kaha nawa muchima wami wapwile nakuzata chikuma hakutwala manyinga kuwongo. Omu mwahichile vyalumingo vyavindende, vitumbo kana vyaunjishile musongo wami. Oloze halwola kana ngwatachikijile ngwami kala vyuma vinahase kungusolokela hakala lwola. Ngwevwile namuvifuwa vene keke, nakushinganyeka ngwami musongo wami kaveshi kuukako.

Munahichi jino myaka 14 kufuma haze vakuwanyine namusongo kana. Oholyapwa uli nakwivwa ngachilihi?

Ngweji kwivwanga lika kukukola, kaha nawa nguli nakulipika namisongo yeka yayivulu yakulifwana namusongo wascleroderma yakufwana nge jimbandu mujimo, jimbandu kumahuyungu, nakukola kumuchima. Chipwe ngocho, kangwalizakamina chikuma hamusongo wami chipwe kuhombako. Ngweji kulinganga vyuma vize vyeji kungukafwanga nguhone kulizakamina.

Weji kulinganga vyuma muka?

Ngwasaka kufunjejeka, kutonga vyakuvwala, nakutunga vimbilingwa. Chuma chachilemu chikuma ngweji kulinganga hakupwa nguChinjiho chaYehova shina kunangula vatu Mbimbiliya. Numba tuhu kangweshi kuhasa kuya hamembo avatuko, oloze ngweji kuzatanga hamwe navandumbwami vaze veji kutwaminyinanga vilongesa vyaMbimbiliya mungalila yetu. Nayami nguli navilongesa vyaMbimbiliya. Mulimo wamuwande weji kungulingisanga ngupwenga wakusuuluka mukuyoya chami.

Mwomwo ika weji kuzachilanga mulimo kana okunyi waviza?

Ngwatachikiza ngwami mujimbu uze ngweji kwambulilanga vatu wapwa waulemu kaha nawa weji kuvanganyalisanga. Nge nguli nakwambulila vatu, ngweji kupwanga wakuwahilila, nakulivwa nge ngunalikangula. Mulimo kana weji kungulingisanga nguvulyame ngwami nguli nakuviza.

Mbimbiliya yeji kukukafwanga ngachilihi upwenga wakuwahilila?

Yeji kungwanukisanga nge misongo yami nayize vaviza vakwetu yinapu yakashimbu kakandende kaha. Mukanda waKusoloka 21:4 wahanjika ngwawo halwola luze Kalunga atongola “mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” Kushinganyeka havisoneka vyangana cheji kungukafwanga ngufwelele nge vyuma atushika Kalunga navikatesamo, keshi nge kuli vaze kaha vali nakuyanda namisongo yakuhona kukako, oloze kuli vosena.