“Ngwatenukilile yayami wapwevo nakusokolola chikolo nangolo chikuma, kaha kapachiso kachikolo katuvile hambango. Wina uze wapwile haze hambango wangwanukishilenga nge vyuma ngwalingile vyapwile vyaunyike.”—Diane *

“Ngwatambakanyine ngwami, ‘Wapwa uchisemi wamupi! Kaha ngwasokele chikolo nangolo chikuma. Oloze shimbu kanda chikolo chilisoke, ngwamwene mikanya haluholo lwatata, kaha ngwalyambile mumuchima wami ngwami ika ngwahanjikilanga mazu kana.”—Lauren.

Kutala nayenu mweji kwivwanga ngana muze vevwile vaLauren naDiane tahi? Nge mukiko, kaha chihande chino nachimikafwa.

Matoto anahase kupihisa lijina lyenu. Briana uze ali namyaka yakusemuka 21 ambile ngwenyi, “Ngwapwilenga nakushinganyeka ngwami vatu vatela kaha kwitavila muchima wami wamatoto. Oloze ngwaputukile kushinganyeka ngwami nge mutu keshi kutulisa muchima wenyi wamatotoko, kaha nahase kusoloka uleya, kaha ngwashinganyekele ngwami omu mukiko vangumwenenga vakwetu.”

Mbimbiliya yahanjika ngwayo: “Muka-kutenuka washi mwalinga mwauleya.”—Vishimo 14:17.

Muchima wenu wamatoto unahase kulingisa vatu vamichine. Daniel wamyaka yakusemuka 18 ambile ngwenyi, “Nge uli namatoto, kaha navatu vene kaveshi kukuvumbikako.” Kaha Elaine wamyaka yakusemuka 18 naikiye ambile ngwenyi, “Muchima wamatoto kawapwa wamwazako, weji kulingisanga vatu vakuchine.”

Mbimbiliya yahanjika ngwayo: “Kanda ukakwata usepa namuka-kutenukako, Kaha kanda ukaya namuka-kulundundu hamweko.”—Vishimo 22:24.

Munahase kwalumuka. Sara wamyaka yakusemuka 15 ambile ngwenyi, “Kaweshi kuhasa kuhonesa vyuma vize vinakulingisa upihilileko, oloze unahase kuunjisa muchima wove. Kawatela kupihilila chikumako.”

Mbimbiliya yahanjika ngwayo: “Ou wakushipwokela kutenuka nawahe kuhambakana chindume, Kahou eji kwonononanga shipilitu yenyi nawahe kuhambakanou mwatambula limbo.”—Vishimo 16:32.

Shinganyekenu vyuma mwatela kulinga. Muchishishisa chakwamba ngwenu, “Omu mukiko ngwapwa,” fwilenu kuzata nangolo nakumbila muchima wamatoto, pamo munahase kulinga ngocho mutukweji 6. Mulwola kanelu, sonekenu vyuma vize muli nakuzachilaho. Nge munapihilila, kaha sonekenu (1) vyuma vize vyamilingisanga mupihilile, (2) omu mwevwanga kumuchima, kaha (3) nomu mwatelanga kusolola muchima wamwaza, kaha mwomwo ika? Kaha fwilenu kukasolola muchima kana omu navakamipihisa kumuchima halwola lweka. Vyuma vize navimikafwa: Kekesenunga navyuma vize muli nakulinga kanawa. Sonekenu kuwaha mweji kwivwanga nge munahonesa muchima wamatoto.—Lushimbi lwamuMbimbiliya: Wavaka-Kolose 3:8.

Kamwatela kupihililanga washiko. Nge mutu chipwe vyuma vimwe vinamipihisa kumuchima, kaha kamwatela kulusuka kuhanjikako, oloze mwatela kuunda muchima. Undenu nakushinganyeka havyuma kana. Erik wamyaka yakusemuka 15 ambile ngwenyi, “Nge ngunahwimi muchima, kaha cheji kunguhananga lwola lwakushinganyeka shimbu kanda ngulinge chipwe kuhanjika vyuma vize navikangulingisa ngukaliveye kulutwe.” Lushimbi lwamuMbimbiliya: Vishimo 21:23.

Wanenu Mashina Namasongo Achihande. Lwola lumwe munahase kupihilila havyuma vimwe mwomwo kamwevwishishile chihande chosenako. Ngachize, shimbu kanda mupihilile chapwa chamwaza kwivwishisa mashina namasongo achihande. Jessica wamyaka yakusemuka 24 ambile ngwenyi, “numba tuhu nge vatu vali namanya, oloze kwatwama vyuma vize vyeji kungulingisanga ngusolole muchima wamwaza.”—Lushimbi lwamuMbimbiliya: Vishimo 19:11.

Nge chinahase, kaha liyilenu kwenu. Mbimbiliya yahanjika ngwayo: “Seza jipami shimbu kanda mulihuhile.” (Vishimo 17:14) Kweseka nachisoneka kanechi, lwola lumwe chapwa chamwaza kuliyila shimbu kanda vikokojola vyepuke. Muchishishisa chakutwalaho lika kushinganyeka hachihande kana nakupihilila chikuma, oloze mwatela kuzata nangolo muhonese muchima kana. Mukweze wapwevo walijina lyaDanielle ambile ngwenyi, “Kulinyukanga mujimba cheji kungukafwanga nguhonese matoto.”

Pwenunga namuchima wakuliula. Mbimbiliya yahanjika ngwayo: “Chikimenu woma, kanda muvulumunako, Lihanjikisenu mumichima yenu, . . . holenu kulu.” (Samu 4:4) Tachikizenu ngwenu kupihilila kachapihyako. Oloze lihulisenu ngwenu, Vyuma muka navisoloka nge ngunapihilila? Mukweze walunga walijina lyaRichard ambile ngwenyi, “Nge mwechelela vatu vakwivwise kupihya kumuchima, kaha nachivahana ngolo. Watela kuliula vilinga vyavo.” Nge namulinganga ngocho, kaha namuhonesanga matoto muchishishisa chakwechelela matoto amifungulule enu.