VINAKUSOLOKA MUKAYE
Mijimbu Yize Yahanjika haMauka Akwitava
Mauka akwitava akiko atela kuneha kuunda nakulinunga mukaye. Oloze chaluvinda namauka akwitava eji kunehenga vikokojola nakuhona kuwafwelela.
Kaye
Vatu vamuno mukaye vavavulu vatwama mumafuchi muze vakanyisa mauka akwitava mwomwo yajishimbi jafulumende chipwe ukalu wamuchitungilo. Mumyaka 5 yakalinwomu yinahichi, mumafuchi amavulu mauka akwitava amavulu ali nakumona ukalu.
VYUMA MWATELA KUSHINGANYEKAHO: Vyuma muka vyakulisezaseza vize vili nakulingisa vatu vamwe vajinde mauka akwitava?—Mateu 23:27, 28; Yowano 15:19.
England
Lunga walijina lyaTony Blair uze apwile twamina walifuchi asonekele mulipapilo lyamijimbu lyaObserver ngwenyi “kusaula mauka akwitava” chikiko cheji kunehanga ukenya. Asonekele nawa ngwenyi, “Jijita jamyaka yino jili nakufumanga havihande vyalifuchi nachiyulo, ngana muze chapwile mulikulukaji lyamyaka lyakusokesa 20, oloze jijita kana vatu vali nakujizunganga mwomwo yakulihandununa chavisemwa chipwe kwitava.
VYUMA WATELA KUSHINGANYEKAHO: Mwomwo ika mauka akwitava ali nakunehelenga chimbalanganyi kuvatu?—Mako 7:6-8.
Australia
Liuka lyaAustralian Bureau of Statistics lyahanjikile ngwalyo vatu vavavulu mulifuchi lyaAustralia kavatwama mumauka akwitavako. Lyahanjika nawa ngwalyo, vatu vamwe vaze vatwama mumauka akwitava kaveshi kuzata natwima milimo yamuliuka lyakwitavako.” Malunga vakuheta kujipaseti 15 namapwevo vakuheta kujipaseti 22 vaze vatwama mumauka akwitava vakiko kaha veji kwazananga natwima mumilimo yamukwitava.
VYUMA MWATELA KUSHINGANYEKAHO: Vilinga muka vyavipi vili mumauka akwitava amavulu makumbi ano?—Mateu 7:15-20.
