VATU VAMWE vanahase kwamba ngwavo mutu uze alinangula chikuma vyasayasi nahase kwamba ngwenyi “chalijilile chivene,” kaha mutu uze afwelela muli Kalunga nahase kwamba ngwenyi “valingile chakutenga.”

Oloze keshi nge vosena veji kukumbululanga mwomumweko.

Vatu vavavulu vaze valinangula chikuma kuhakilako navaka-sayasi veji kuhuhwasananga kunangula chakwamba ngwavo vyuma vyalijilile vivene.

Achishinganyekenu Gerard uze alinangwile chikuma vyakuyoya chatututu uze vanangwile vyuma vyakulijila vivene kushikola yakukaye. Ambile ngwenyi: “Omu ngwasonekelenga vyeseko, ngwakumbulwilenga vihula kana nakuvihana kuli valongeshi. Oloze kangwafwelelele vyuma kanako.”

Mwomwo ika navatu vaze valinangula chikuma vyasayasi vachiwana kupwa chachikalu kwitavila nge kuyoya chalijilile chivene? Hakusaka tukumbulule chihula kana, tuchitalenu havihula vivali vize veji kuhonanga kwivwishisa vaka-kuhehwojola vavavulu: (1) Uno kuyoya chaputukile ngachilihi? (2) Uno vyuma vyakuyoya vyaputukile ngachilihi?