Tulwezeko chiyoyelo chove chakuunyike.

Ngwasemukilile mulifuchi lyaItaly mu 1943. Ngwakolelele hamwe navayayami navasongo jami mungalila yimwe. Tata apwilenga njimi, kaha nawa muka-kusonga maliva. Visemi jetu vatunangwile kwitava chaka-Katolika.

Mwomwo ika wasakilile kupwa ukapilishitu?

Omu ngwapwile ngukanyike, ngwazangilenga kwivwilila kuli vapilishitu muchachi. Mazu avo navilika valingilenga muchachi vyangukunywile. Ngachize, nayami ngwasakile kupwa ngukapilishitu. Omu ngwapwile namyaka yakusemuka 13, mama angutwalile kushikola yize yanangwilenga vakweze vamalunga chiyoyelo chakulutwe, nakulinangula chikuma milimo yaupilishitu.

Uno shikola kana yaminangwilenga naMbimbiliya tahi?

Nduma, omu ngwapwile namyaka yakusemuka 15, mulongeshi wami umwe anguhanyine mukanda uze wahanjikilenga haMikanda yaMujimbu Wamwaza. Anguhanyine namukanda uze wahanjika hakuyoya chaYesu namulimo wakwambulula, kaha ngwautangilenga mapapa kakavulu. Omu ngwapwile namyaka yakusemuka 18, ngwayile kuRome hayunivesiti yize yapwile mungolo japopu. Ngwakalinangwile chiLatinyi, nachiHelase, namijimbu yakumwaka, namangana autu, navilinga navishinganyeka vyavatu hamwe kaha nakulinangula vyaukalunga. Numba tuhu twavulukilenga visoneka vyamuMbimbiliya nakwivwa nawa omu vatangilenga Mbimbiliya lyaSondo, olozenyi kuhanjika muchano, katwalinangwilenga Mbimbiliyako.

Wapwile jino umukulwane. Uno echi chasakiwile kunangula vakwenu tahi?

Nduma, mulimo wami wapwile chikumanyi wakulongesa vyuma nakutwaminyina vakwetu. Olozenyi ngwapwilenga nakunangula jishimbi jamuchachi jakupandama kukuliwana vavulukile ngwavo Second Vatican Council.

Vyuma muka vyakulingishile uputuke kukakasana chachi kana?

Kwapwile vyuma vitatu vize vyanguyanjishilenga. Chachi kana yazanyinenga mumapolitiki. Vatwamina navatu vavetavishilenga valinge vilinga vyavipi muchachi. Kaha kunangula chimwe chamuKatolika chapwile chamakuli. Chakutalilaho, uno Kalunga wazangi nahase kuzangamisa ngachilihi vatu haya myaka yosena nge vanafu? Kaha nawa, kutala Kalunga asaka tuhitulukenga mukulomba mapapa kakavulu oku tunavwale usanga mushingo nyi? *

Vyuma muka walingile?

Ngwalombele kuli Kalunga angutwaminyine, oku nguli nakulila. Ngwalanjile naMbimbiliya yavaka-Katolika yaJerusalem Bible, yize valowele halwola kana mulilimi lyaItalian, kaha ngwaputukile kuyitanga. Likumbi limwe haSondo nachimene omu ngwapwile nakusukika mahina hanyima yaMisa, malunga vavali vejile hashikola. Valijimbwile kuli yami ngwavo vapwile Vinjiho jaYehova. Twashimutwilile vyamuMbimbiliya novyo yahanjika kutalisa kuvyuma vyakwijivilaho kwitava chamuchano halwola lwakuhambakana haola yimwe.

 Wevwile ngachilihi hakukutambukila kuli vangeji kana?

Ngwevwile kuwaha hakumona omu vapwile nakulumbunwinamo vyuma, nomu vapwile nakwinyikila kumijimbu yatwama muMbimbiliya yavaka-Katolika. Kufumaho kwapwile nawa Chinjiho mukwavo walijina lyaMario, uze aputukile kungutambukilanga. Apwilenga nakungutalilila chikoki, kaha nawa ejilenga haSateli hiSateli nachimene, kupwenga vula chipwe musana. Embilenga ngezo yahachikolo chami nalwola lwa 09:00.

Vakwenu vapilishitu vevwilenga ngachilihi hakukutambukila kuli vinjiho?

Ngwavalwezelenga vezenga nakwivwilila kuchilongesa chetu, oloze naumwe wauchi ahakile mangana kukulinangula Mbimbiliya. Aminyi ngwalivwishilenga kuwaha. Ngwalinangwilenga vyuma vyamwaza vyakufwana nge, ovyo Kalunga etavishila upi nakuyanda, chuma chize kangwevwishishileko hamyaka yayivulu.

Uno vakulwane jove vakukanyishile kulinangula Mbimbiliya tahi?

Mu 1975, ngwayilenga kuRome mapapa kakavulu nakuvalweza vishinganyeka vyami. Vakulwane jami vesekele kwalumuna muchima wami, oloze kavapwile nakuzachisa Mbimbiliyako. Kuheta haJanuary 9, 1976, ngwasonekelele mukanda kuRome nakulumbununa ngwami kangweshi cheka ngumuka-Katolikako. Omu mwahichile makumbi avali, ngwafumine haze hashikola nakuya nakunyina komboyu. Ngwayile kukukunguluka chachihanda chaVinjiho jaYehova halwola lwatete kuze kwapwile vikungulwilo vyavivulu vyaVinjiho jaYehova. Vyuma vyosena ngwakamwene kuze vyalihandunwine navize ngwamwenenga muchachi yetu. Vinjiho vosena vapwile najiMbimbiliya javo jize vapwilenga nakukavangiza omu vaka-kuhanjika vihande vapwilenga nakulumbununa vihande vyakulisezaseza.

Uno tanga yove yevwile ngachilihi havyuma kanevi?

Vavavulu vangwimanyinyine nakole. Oloze ngwawanyine nge nasongo yami umwe apwile nakulinangula Mbimbiliya naVinjiho munganda yaLombardy muItaly. Ngocho, ngwayile nakumumona, kaha Vinjiho vakungalila kana vangukafwile nguwane milimo nazuvo yakutwama. Mumwaka vene uze, vangumbapachishile nakupwa nguChinjiho chaYehova.

Uno weji kuliveyanga tahi?

Kwakusukusuku! Nguli nakwivwa jino nge ngunapandama kuli Kalunga mwomwo vyuma ngunatachikiza hali ikiye vyazama haMbimbiliya keshi hamangana autu chipwe hakunangula chachachiko. Kaha ngunahase kunangula vakwetu nakuvakunyula nakashishi.