LUSHIMBI LWAMUMBIMBILIYA: “Iyaze mwatwamanga mumbalaka [yaKalunga]? . . Ou eji kutambukanga mwakulonga, nakulinga mwakwoloka, nakuhanjika muchano mumuchima wenyi.”—Samu 15:1, 2.

NGANYO: Vatu vavavulu vasaka kupwa vakashishi, vakulonga. Nyi ngachilihi nge vanamono ngwavo nge kaveshi kushishikako kaha vyuma vimwe navivanganyalisa, kaha nawa nou mwavatachikiza wauchi? Echi nachipendamina havyuma vyatwama mumuchima wavo.

Raquel, uze eji kuzatanga mulimo wakulanda vyuma vyakapani ambile ngwenyi: “Vaka-kulanjisa vamwe vazangilenga kunguhana maswekeza. Vangulwezelenga ngwavo nge nangulanda vyuma vyavo, kaha navanguhana jimbongo muchishishisa chakutepulwilako kapani yami ndando. Oloze ngwanukile lushimbi lwamuMbimbiliya lwakupwa nakashishi kaha ngwakanyine. Mukulwane wami wamilimo evwile chuma kana, kaha angufwelelele chikuma.”

Kachi Raquel etavilile jimbongo vamuhanyine, kachi apwile najimbongo hakatando kakandende kaha. Oloze ngachilihi nge mukulwane wenyi wamilimo ejivile chuma kana? Kutala kachi atwalileho kupwa hamilimo tahi? Nyi ngachilihi kulutwe, kutala kachi awanyine milimo yeka nyi? Chuma chachinene amwene Raquel shina kupwa nachivezu chitoma nakumuvumbika kuvatu. Hali Vishimo 22:1 vamba ngwavo: “Lijina lyamwenemwene valisakule kuhambakana vikumba vyavivulu, nauselewa wamwaza nawa kuhambakana palata naulu.”

Jessie, nayikiye apwile wakashishi, kaha vamufwelelele ngocho apwile napuho yamwaza kuli mukulwane wenyi wamilimo. Uno nganyo muka awanyineho? Vamuhakile hachihela chachinene hakapani nakumuhana lwola lwaluvulu lwakunoka. Echi chamulingishile apwenga nalwola lwaluvulu lwakutwama napwevo lyenyi navana venyi nalwakwazana muvyuma vyakushipilitu.

Hakutonda vaka-kuzata milimo, vatu vamwe vanayinga kumauka aze vatachikiza ngwavo apwa akashishi. Chakutalilaho, mukulwane umwe wamilimo muPhilippines asonekelele kumutango waVinjiho jaYehova mulifuchi kana mangana Vinjiho vatonde milimo kukapani yenyi. Ambile ngwenyi vatu kana vapwa “vaka-kuzata nangolo, vakashishi, vaka-kulihana hamilimo.” Twatela kwalisa Yehova Kalunga mwomwo ikiye eji kutunangulanga ‘tuhunge kupihya, nakuzanga kuwaha.’—Amose 5:15.