LUSHIMBI LWAMUMBIMBILIYA: “Ulo vauvumbikenga kuli vosena, kaha kahela kaulo kanda vakakapihisako.”—WavaHepeleu 13:4.

NGANYO: Vatu vamwe veji kwambanga ngwavo mazu kana kaweshi kuzata makumbi anoko. Oloze makulyavo, vanalyongo. Kuhona kushishika kuli muka-mahya mutu cheji kuvizanga namakumbi ano nganomu chapwile omu vasonekele mazu kana muMbimbiliya.—Vishimo 6:34, 35.

Jessie, lunga uze ambata, kaha nawa chisemi asonekele ngwenyi: “Kushishika muulo chinangulingisa tulivwasane chikuma napuwami nakupwa nawa vakuwahilila. Chikupu vene, kulifwelela muulo chapwa chachilemu. Kuhona kushishika cheji kulingisanga muhone kulifwelela,” kaha nawa cheji kunehanga ukalu kuvana.

Ligaya * ahakile ulo wenyi muponde. Ambile ngwenyi, “Ngwaputukile kulikata navatu vavapi. Echi changulingishile nguyenganga kuvilika vyakukaye naufuku nakulinganga ujila.” Uno chiyoyelo kana chamwivwishilenga kuwaha tahi? Nduma, valikokojweselenga lwola lwosena nalunga lyenyi kaha ahombelenga. Ambile ngwenyi “Omu ngwaputukile kushinganyeka haukalu ngwalinehelele ami livene, ngwamwene ngwami visemi jami volokele omu vangulwezelenga ngwavo, ‘Kulikata navatu vavapi cheji kwenyekanga vilinga vyamwaza.’”—Wavaka-Kolinde 1, 15:33.

Ligaya ambile nawa ngwenyi: “Shimbu kanda vyuma vipihye, ngwalishikile ngwami nangwecha vilinga vyami vyavipi nakulinangula Mbimbiliya. Ngwambile ngwami oholyapwa jino nangukavangiza vyuma nangulinangula.” Vyuma muka vyafuminemo? Ulo wenyi kawafwileko, kaha nawa lunga lyenyi aputukile kumutetela nakumuhananga kavumbi. Ambile ngwenyi, “Mbimbiliya yinalumuna kuyoya chami. Kangweshi nakuliveya hakuseza vilinga vyami vyavipi namasepa vavapiko.”