OMU YAHANJIKA MBIMBILIYA
Meshiya
Mbimbiliya yahanjikile chimweza ngwayo Meshiya mwakeza mulifuchi nakusokola vatu kumisongo nakukuyanda nakukufwa. Kutala Yesu Kulishitu ikiye Meshiya nyi?
Uno Meshiya vamutachikijilile haka?
Kweseka naupolofweto wamuMbimbiliya, Meshiya chipwe ngwetu Kulishitu atelele kwiza nakuzata milimo yivali kaha mwahichile tando yayinene numba azate mulimo wamuchivali *. Mulimo watete auzachile hakupwa mutu hano hamavu. Ejile nakupwa mutu hano hamavu mangana vamutachikize kuvatu. Vaka-kusoneka Mbimbiliya vahanjikile vyuma vyavivulu hakuyoya chenyi namulimo wenyi. Enga, ‘unjiho wakuvuluka Yesu’ ukiko wapwile chuma chachilemu vasonekelele upolofweto wamuMbimbiliya.—Kusoloka 19:10.
Omu Yesu apwile hano hamavu, alingile vyuma vyavindende hakuvyesekesa navize mwakalinga hakupwa jino mutu wakushipilitu wangolo.
VYUMA YAHANJIKA MBIMBILIYA
Meshiya atelelele . . .
Kufuma kuchisaka chaMwangana Ndavichi.—Isaya 9:7; Luka 3:23-31. *
Kusemukila munganda yaMbetelema.—Mika 5:2; Luka 2:4-7.
Kuvilika “mujimbu wamwaza” nakulinyisa.—Isaya 61:1; Luka 4:43.
Kumulumbilisa nakumumona kupwa wamokomoko.—Isaya 53:3; Mateu 26:67, 68.
Kumusolola kuli vaka-kole najimbongo japalata 30.—Zekaliya 11:12, 13; Mateu 26:14, 15.
Kuhola kulu omu vapwile nakumuvangijikila nakumuhana mulonga wakufwa.—Isaya 53:6, 7; Mateu 27:12-14.
Kupwa “Mwanamukoko” uze afumishileko shili nakulingisa jino vatu vapwenga vatoma kumeso aKalunga.— Isaya 53:7; Yowano 1:29, 34, 36.
Kumujiha chakuzeneka kuhokola vifuwa vyenyi.—Samu 34:20; Yowano 19:33, 36.
Kumufunda navaka-luheto hamwe.—Isaya 53:9; Mateu 27:57-60.
Kumusangula halikumbi lyamuchitatu.—Mateu 16:21; 28:5-7.
Yesu ateselemo upolofweto wosenou naukwavo weka wauvulu. Okile nawa vaka-kuviza nakusangula vafu. Ngachize, atuhana unjiho wakutamo wakusolola nge apwile chikupu Meshiya, kaha nawa atulingisa tufwelele chikupu jishiko jamuMbimbiliya nakusolola nge mwakalinga vyuma vyavivulu kulutwe. (Luka 7:21-23; Kusoloka 21:3, 4) Omu Yesu vamusangwile, atwamine ‘kulivoko lyaKalunga lyachilyo’ nakuvandamina lwola luze mwakakumisa mulimo wenyi wauMeshiya.—Samu 110:1-6.
“Omu mwakeza Kulishitu, kutala mwakalinga vinjikizo vyavivulu kuhambakana evi nalingi ou mutu numba?”—Yowano 7:31.
Uno Meshiya atelele kukumisa ngachilihi mulimo wenyi?
VaYuleya vamumakumbi aYesu vashinganyekele ngwavo Meshiya mwakeza nakuvasokola kuchiyulo chavaLoma nakuyula jino wangana wavaIsalele. (Vilinga 1:6) Omu mwahichile tando, vaYuleya vaze vakavangijile Yesu vevwishishile jino ngwavo mwakakumisa mulimo wenyi mwilu hakupwa mutu wangolo wakushipilitu uze vahana wata.—Mateu 28:18.
VYUMA YAHANJIKA MBIMBILIYA
Mumulimo wenyi wamuchivali, Meshiya atelelele . . .
Kukayula hakupwa Mwangana waWangana waKalunga, fulumende yakaye.—Ndanyele 7:13, 14; Kusoloka 11:15.
Kukakisula vatu vosena vaze navamufwelela.—Kuputuka 22:17, 18; Samu 72:7, 8.
‘[Kukakomwesa, NW] vaka-mafuchi amavulu’ navatwamina javo omu mwakavanongesa mwomwo yakumwimanyina nakole.—Isaya 52:15; Kusoloka 19:19, 20.
Kukapululula “liyongomena lyalinene” lyavatu vakwoloka nakuvengisa mulifuchi lyalihya lyakuunda.—Kusoloka 7:9, 10, 13-17.
Kukazachila hamwe naYehova Kalunga nakusangula vafu mangana vakatwame muPalachise yahamavu.—Luka 23:43; Yowano 5:21, 28, 29.
Kukanangula vatu jenyi jijila jakuunda chamwenemwene.—Isaya 11:1, 2, 9, 10.
Kukafumisako shili yize yaneha kukola nakufwa.—Yowano 1:29; Wavaka-Loma 5:12.
Kukenyeka milimo yosena yaSatana nakununga vatu vosena vakaliluule kuli Yehova Kalunga.—Wavaka-Kolinde 1, 15:25-28; WaYowano 1, 3:8.
Yesu ateselemo mulimo wenyi watete wauMeshiya. Mwakakumisa namulimo wamuchivali. Ngachize, vatu vamangana veji kulinangulanga vyaikiye mwomwo Yesu ambile ngwenyi: “Ami yami jila, yami muchano, yami kuyoya.”—Yowano 14:6.
“Hamakumbi enyi vaka-kwoloka navakafukilanga, nakuunda chachivulu nawa, palanga nomu mwakapwa kakweji wauchiko. Mwakapwanga mwangana . . . mbwe nakujisongo jamavu.”—Samu 72:7, 8.
^ par. 5 Lizu “Meshiya” lyafuma kulizu lyachiHepeleu. Kaha kulizu “Kulishitu” lyafuma kulizu lyachiHelase likwechi ulumbunwiso woumwe.—Yowano 1:41.
^ par. 7 Chisoneka chatete chinapu upolofweto, kaha chamuchivali chinasolola omu vauteselemo.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Upolofweto Wahanjika Hali Meshiya Wasolola Nge Yesu Apwile Meshiya Tahi?
Uno kwatwama vaMeshiya vavavulu tahi?
