CHIHANDE CHACHINENE | UNO MBIMBILIYA YINAHASE KUKAFWA VATU MAKUMBI ANO TAHI?
Vilinga Vize Vatela Kupwa Navyo Vatu Vosena—Muchima Wakulikanyisa
LUSHIMBI LWAMUMBIMBILIYA: “Chiheu eji kuhanjikanga mweshomwo mwaya utenu wenyi, Oloze muka-mangana mwaukinga nakuuholesa.”—Vishimo 29:11.
“Nguli nakulivwa nge ngunayovoka kukufwa.”
NGANYO: Kachi nge namusoneka mukana wanganyo yatwama hakupwa namuchima wakulikanyisa, munahase kukumisa mapapilo amavulu. Kupwa namuchima wakulikanyisa cheji kutukinganga kumujimba. Mbimbiliya yamba ngwayo, “Muchima wakuunda unapu kuyoya chamujimba.” Kaha nawa ngwayo, “Muchima wakuwahilila unapu vitumbo vyamwaza.” (Vishimo 14:30; 17:22) Enga, vaka-kulinangula vanawane nge vatu vaka-kusulakana washi navaka-utenu vanahase kuviza chikumanyi misongo yamuchima. Kupwa namuchima wakulikanyisa kacheshi kuminganyalisa kumujimba kahako.
Cassius, uze ali namyaka yakusemuka 30 ambile ngwenyi: “Ngwapwile ngumuka-vikokojola namuchima wamatoto, kaha ngwasakilenga kuzunga ndombo lwola lwosena. Vatu kavanguhanyinenga kavumbiko. Oloze omu ngwaputukile kukavangiza vyuma ngwalinangwile muMbimbiliya, ngwalumukile. Ngwalinangwile kulihenda kumuchima wamatoto nakupwa wakulinyisa nakukonekelanga vakwetu. Nge pimbi, oholyapwa kachi nguli mukamenga. Enga, nguli nakulivwa nge ngunayovoka kukufwa mwomwo yakwalumuna muchima wami.”
Cassius alinangwile kulihenda kumuchima wamatoto nakupwa muka-kukonekela