VYUMA NAVIKAFWA TANGA | KULELA VANA
Nge Mwanenu Namihulisa vyaKufwa
UKALU
Nge mwanenu wamwaka yakusemuka 6 mwamihulisa ngwenyi, “Uno likumbi limwe namukafwa tahi?” Munahase kulikomokela hachihula kana nakulihulisa ngwenu: ‘Kutala ou mwanami nakolo numba evwishise vyuma nangumukumbulula tahi? Nangushimutwila nenyi ngachilihi chihande chakufwa?’
VYUMA MWATELA KUTACHIKIZA
Vanyike veji kushinganyekanga hakufwa. Vamwe veji kuhemanga kuhema chimwe chize cheji kusololanga mutu nafu. Shikaho, chihande chakufwa kamwatela kuchimona nge hichijila kuchishimutwilako. Mwatela kwitavila kala vihula navamihulisa vana venu. Kachi nge lwola lumwe namushimutwilanga chihande chakufwa, kaha munahase kukafwa vana venu valinangule mwakulingila nge kausoko kavo umwe nafu.
Kushimutwila chihande chakufwa kacheshi kulingisa vana venu vapwenga nawomako, oloze nachivakafwa vakeheseko woma kana. Tuyokutuyoku nawa, mwatela kuvalumbunwina muchano mangana mukumise makuli vanangula vamwe hachihande chakufwa. Chakutalilaho, vatu vamwe vaze valinangula chikuma vamba ngwavo vanyike vavavulu vaze kanda vachipwe namyaka yakusemuka 6 kavamona nge kufwa akiko makumishilo akuyoyako. Nge vali nakuhema, kanyike umwe nahase kulyonga nge “nafu,” oloze mukapyapya kakandende kaha, mwapwa “wamutonyi.”
Oloze omu vanyike navakola, vanahase kuputuka kushinganyeka jino ngwavo kufwa chachipi. Chuma kana chinahase kuvalingisa vahulise vihula, nakulizakamina, nakwivwa woma chikuma nge mutu umwe mutanga nafu. Ngocho, chapwa chachilemu kushimutwilanga navo chihande chakufwa. Marion Haza uze alinangula muwazata wongo ambile ngwenyi: “Kanyike nahase kulizakamina chikuma vyakufwa kachi nge mwashinganyeka ngwenyi kavamwitavishile kuhanjika hachihande chakufwa hazuvoko.”
Kanda namulizakaminanga chikuma havyuma munahase kuhanjikako. Vaka-kuhehwojola vamwe vamba ngwavo vanyike vasaka “kuvalumbunwina muchano kuzachisa mazu alikoji.” Fwelelenu ngwenu kanyike keshi kuhulisa chihula chakuzeneka kulizanga vamukumbululeko.
VYUMA MWATELA KULINGA
Wanenunga lwola lwakushimutwila hakufwa. Kachi nge mwanenu namono kajila wakufwa kukulo yajila chipwe chimuna umwe nafu, kaha muhulenu vihula vimwe vyavyashi mangana mumukunyule ahanjike. Chakutalilaho, munahase kumuhulisa ngwenu: “Uno chimuna wakufwa eji kuyandanga tahi? Kutala nahase kwivwa chishika chipwe zala nyi? Mwijiva ngachilihi ngwove chimuna chipwe mutu nafu?”—Lushimbi lwamuMbimbiliya: Muka-kwambulula 3:1, 7.
Kanda namusweka muchanoko. Nge sepa lyenu chipwe kausoko kenu nafu, kaha lihendenu kukuzachisa mazu akufwana nge “Nayi ungeji.” Mwomwo echi nachilingisa vana venu vashinganyeke mwakuhenga ngwavo uze nafu kalinwomu akinduluke hembo. Oloze valwezenu muchano kuzachisa mazu amashi. Chakutalilaho, munahase kwamba ngwenu: “Kaka yove nafu, mujimba wenyi unalitwamina kuzata. Katweshi kuhasa kuhanjika nenyiko, oloze katweshi kukamuvulyamako.”—Lushimbi lwamuMbimbiliya: Wavaka-Efwesu 4:25.
Hakuwana nge mwanenu nahase kushinganyeka ngwenyi naikiye jino mwafwa, mufwelelesenu ngwenu keshi kufwako.
Fwelelesenu vana venu. Mwanenu umwe nahase kushinganyeka ngwenyi vyuma alinganga vikiko vinalingisa mutu kana afwenga. Muchishishisa chakumulweza kaha ngwenu keshi ikiye nalingisa chuma kana chisolokeko, munahase kumuhulisa ngwenu, “Vyuma muka vinakulingisa ushinganyeke ngocho?” Kufumaho mwivwililenu kanawa chakuzeneka kumupopolola. Kaha nawa hakuwana nge mwanenu nahase kushinganyeka ngwenyi naikiye jino mwafwa, mufwelelesenu ngwenu keshi kufwako.
Tachikizenu vili mumichima yavana venu. Hanjikenu nakukasunuka vyavausoko wenu vaze vafwa kuhakilako vene navaze kanda vachimoneho lyehi kuli vana venu. Munahase kwanuka vyuma vyamwaza valingile vaisepwevo, chipwe vanatwenyi, chipwe vakaka jenyi vize vyamivwishilenga kuwaha. Nge namushimutwilanga hatoma vyavausoko wenu vaze vafwa, kaha namukafwa vana venu vevwishise nge vatela kushinganyekanga nakuhanjika vyavatu kana. Oloze kanda namukanjikiza vana venu kuhanjikako. Munahase kuhanjika hachihande kana lwola lweka, omu namumona ngwenu nahase kuhanjika jino.—Lushimbi lwamuMbimbiliya: Vishimo 20:5.
Tupetulu 34 na 35 vamumukanda waLinangule Kuli Mulongeshi Wamunene vanahase kukafwa vana venu valinangule vyuma yanangula Mbimbiliya hakufwa. Talenu haMIKANDA > MIKANDA NAJIMBULOSHUWA