HILTON azangile chikuma kuhema chakuliveta jikonyi. Omu apwile namyaka yakusemuka 7, apwilenga nakuliveta jikonyi navakwavo numba vene hakushikama navakwavo. Omu apwile kusekondali, lwola lwosena asakilenga mutu wakuliveta nenyi omu apwilenga nakuhema navakwavo. Ambile ngwenyi, “Ngwevilenga, ngwahemenenga njuka, ngwatalilenga mivwimbimbi yauselesele, ngwayanjishilenga mapwevo nakulishinga visemi jami. Vilinga vyami vyalingishile visemi jami vamone nge kangweshi kukalumuka mukuyoya chamiko. Omu ngwakumishile shikola, ngwafumine hembo lyavisemi jami.”

Omu Hilton akindulukile hembo hanyima yamyaka 12, visemi jenyi valikomokelele numba nge ou ikiye mwanavo. Apwile jino wakuunda, wakutalilila chikoki nakavumbi. Vyuma muka vyamukafwile alumuke? Kuchihela kuze ayile akaputukile kushinganyeka chikuma hachiyoyelo chenyi. Akekeselenga nawa Mbimbiliya amone numba nge nayimukafwa alumuke. Hilton ambile ngwenyi, “Ngwakavangijile vyuma vize ngwatangilenga muMbimbiliya. Ngwasezele vilinga vyami vyamwaka nakukavangiza lushimbi lwakuvumbika visemi luze lwatwama hali Wavaka-Efwesu 6:2, 3. Elu lukiko lwola lwatete kupwa wakuwahilila mukuyoya chami chosena, kahechi chevwishile tata namama kuwaha keshi kukola kumuchimako.”

Mujimbu waHilton wasolola nge Mbimbiliya yapwa yayilemu kaha nawa ikwechi ngolo jakwalumuna vatu. (WavaHepeleu 4:12) Tushimutwilenu havilinga vimwe vyamwaza vyakufwana nge kashishi, muchima wakulikanyisa, kushishika nazangi, nomu vilinga kana vinahase kukafwa vatu vapwenga vakuwahilila mukuyoya.