Liuka lyaWorld Health Organization lize lyatala hakulikangula chavatu linambe nge vatu kafwe jimiliyoni 24 navavawananga namusongo wakasa mwaka himwaka omu natukaheta mu 2035. Echi hikuvula chachinene chize chinazomboka jipaseti 70 chipwe ngwetu jimiliyoni 14 jize vanakuwana vatu oholyapwa namusongo wakasa mwaka himwaka. Kafwe chimbwa chavatu kana vali nakuvawana namusongo kana mwomwo yachiyoyelo chavo chakufwana nge kunwa chikuma wala, kuhonanga kuzata milimo yakulinyuka, kutohwa chikuma mujimba, nakupwanga chikuma mukasana, nakunwa makanya.

Hanyima yakukekesa unjiho umwe, fulumende yalifuchi lyaBritain yatumine vatu vahehwojole unjiho wakusolola nge musongo umwe wakufwana nge musongo wangombe wakuzaluka unahase kutanda kuvatu kuhichila mukuhaka manyinga. Chilolo Andrew Miller uze apwa lihako wafulumende ambile ngwenyi, “Tunalizakamina chikuma hakwivwa unjiho wakusolola nge ou musongo wakuhona vitumboko unahase kutanda kuvatu.” Ambile nawa ngwenyi “vanatulweze ngwavo [musongo kana unahase kutanda] kuhichila mukuhaka vatu manyinga aze anapihi nahakuhana vatu vilyo vyamutu veka.”

Mulifuchi lyaNorway, vehwojwele vatu kafwe 63,000 hamyaka 11, kaha vawanyine nge vatu kafwe jipaseti 40 vaze vahomba chikuma vanahase kupwa namusongo wamuchima. Liuka limwe lize lyatala hamisongo yakupandama kumuchima lyavulukile mazu ahanjikile muka-kusoneka umwe hali vaka-kwihwojola kana ngwalyo kuhomba chinahase kuneha kulizakamina chikuma chize chinahase kuneha musongo wakumuchima nakuhonesa mutu ahone kukavangiza vyuma navamulweza vyakumukafwa alikangule.

Vaka-sayasi vali nakuhehwojola ponde yize yinahase kwiza kutushiki, natumule twakukasanga kamakanya tuze vanambili hamavu chipwe vanaseze muzuvo chipwe muminyau. Etu tushiki natumule nge tunavulu, kaha nawa tunashimbula, tunahase kuneha ponde.