LUSHIMBI LWAMUMBIMBILIYA: “Vwalenunga zangi, mwomwo yikiko yeji kununganga vatu hamwe mujila yakukupuka.”—Wavaka-Kolose 3:14.

NGANYO: Zangi yize vavuluka kakavulu muMbimbiliya kayapwa zangi yakulimona chalunga napuwenyiko. Oloze yapwa zangi yize yatambukila hamwe navilinga vyeka vyakufwana nge kutetela, kukonekela, kushishika, kuvova, nakutalilila vatu chikoki. (Mika 6:8; Wavaka-Kolose 3:12, 13) Zangi kana yeji kutohwelangako lika, kaha yalihandununa nazangi yamukachi kapwevo nalunga yize yinahase kukuma mukuhita chalwola.

Brenda, uze natwame muulo hamyaka kafwe 30 ambile ngwenyi: “Zangi yize veji kulisolwelanga vapwevo nalunga vaze vachili mukulimbata yalihandununa nazangi veji kulisolwelanga vapwevo nalunga vaze vanashimbula muulo.”

Sam, lunga uze natwame muulo hamyaka yakuhambakana 12 ambile ngwenyi: “Ami napuwami tunawahililanga nakulikomokela omu jindongi jamuMbimbiliya jeji kutukafwanga, kaha nawa japwa jajashi. Nge natukavangiza Mbimbiliya, kaha vyuma muulo navitambuka kanawa. Numba tuhu ngweji kuyikavangizanga, oloze lwola lumwe kangwayikavangizako. Echi cheji kusolokanga kakavulu nge nguli nakwivwa kupihya chipwe kuzeya. Halwola kana ngweji kulombanga Yehova angukafwe nguhone kupwa navishinganyeka vyavipi. Ngweji kupakatanga puwami mukasamba, kaha nakushimbula chiku kwijiva nge kakwapwanga naukaluko.”

Yesu Kulishitu ambile ngwenyi “mangana eji kulyambululanga kupwa akwoloka kumilimo yawo.” (Mateu 11:19) Ngocho, Mbimbiliya yikwechi vyuma vize navitukafwa tupwenga namangana. Vyuma yanangula najindongi jatwamamo vyeji kuzatanga namakumbi ano. Jinahase kukafwa mutu chamokomoko nachisemwa chenyi chipwe lifuchi atwama. Kaha nawa jasolola nge Yehova Kalunga uze apwa Tengi yetu atachikiza omu vapwa vatu. Chuma chachilemu shina kujikavangiza. Ngachize, Mbimbiliya yatulweza ‘tumakile nakumona ngwetu Yehova apwa wamwaza.” (Samu 34:8) Kutala namwitavila mazu kana tahi?