VYUMA VEJI KUHANJIKANGA VATU

Vatu vashinganyeka ngwavo kuhema njuka kachapihyako, chikalu kaha nge vachitavisa kufulumende. Kuhema njuka chimwe chize vetavisa kufulumende chakufwana nge kuzachisa tumapapilo tuze vanasonekaho jinambala cheji kunehanga jimbongo mufulumende.

VYUMA YAHANJIKA MBIMBILIYA

Mbimbiliya kayashindakanya kanawa hakuhema njukako. Chipwe ngocho, yahanjika jindongi jize jasolola omu Kalunga amona kuhema njuka.

Mulimo wanjuka wapwa wakulya jimbongo jambala nakuhokola lushimbi lwamuMbimbiliya luze lwahanjika ngwalwo “lilamenunga kuchipululu chosena.” (Luka 12:15) Kuhema njuka cheji kunehanga muchima wachipululu. Mauka aze eji kukundwizanga kuhema njuka kawatachikiza numba nge vatu navalya jimbongo nyi chiku, mwomwo vatachikiza ngwavo vishinganyeka vyakusaka kupita navilingisa vaze vali nakwazana mukuhema kana vahakeho jimbongo jajivulu. Muchishishisa chakukafwa mutu alihende kumuchima wachipululu, kuhema njuka cheji kulingisanga mutu afwile kuwana jimbongo mujila yayashi.

Kuhema njuka chapendamina hamuchima wawiji nakusaka kulya mbongo javakwenu. Oloze Mbimbiliya yahanjika ngwayo mutu “kanda mwasakanga kulinganyalisa iveneko, oloze anganyalisenga vakwavo.” (Wavaka-Kolinde 1, 10:24) Kaha nawa lushimbi hajishimbi 10 lwahanjika ngwalwo: “Kanda mukevwa lwiso . . . lwachuma chimwe chinapu chaminenu.” (Kulovoka 20:17) Nge muka-kuhema njuka ali nakufwila kutapa vakwavo, kaha chinapu nge ali nakufwelela kulya jimbongo javo mangana ikiye anganyale.

Mbimbiliya nawa yahuhumuna vatu kuhona kwazananga mukupanda chize chinahase kuvanehela vyuma vyamwaza. MuIsalele yakushikulu mwapwilenga vatu vamwe vaze kavafwelelele muli Kalungako, nakuputuka jino ‘kulongeselanga kalunga waKutokwa mesa.’ Uno kulemesa ou ‘kalunga waKutokwa’ chevwishilenga Kalunga kuwaha kumuchima tahi? Nduma, avalwezele ngwenyi: “mwalingilengovyo vyapihile kumeso ami, ovyo ngwazenekele kwivwila kuwaha mwavisakwilenga.”—Isaya 65:11, 12.

Mumafuchi amwe jimbongo jize jeji kufumanga kunjuka veji kujizachisanga kukufwetela vatu kushikola, kukehesako uhutu mulifuchi, navyuma vyeka. Numba tuhu jimbongo kana veji kujiwananga mujila yawiji nalizangamina nakukundwiza muchima wakumbata vyuma hawana wakanyombo, oloze kajeshi kwalumuna milimo navajizachisako.

“Kanda mukevwa lwiso . . . lwachuma chimwe chinapu chaminenu.”—Kulovoka 20:17.

VYUMA YAHANJIKA MBIMBILIYA

Mbimbiliya yahuhumuna ngwayo “vaze veji kufwilanga kupwa naluheto veji kwingilanga mucheseko namumuheto, namukufwila cheka nacheka chamokomoko chachipi chize cheji kutwalanga vatu mukuvenyeka nakuvanongesa.” (WaChimoteu 1, 6:9) Kuhema njuka chafuma kumuchima wachipululu, kaha muchima wachipululu wapwa waupi chikuma, ngachize muMbimbiliya “chipululu” chatwama havilinga vyavipi vize twatela kulihendako.—Wavaka-Efwesu 5:3.

Kuhema njuka cheji kulingisanga mutu afwile kuwana luheto mujila yayashi mwomwo yamuchima wakuzanga jingombo uze Mbimbiliya yavuluka ngwayo “mwiji wavyuma vyavipi vyosena.” Muchima wakufwila jimbongo unahase kuhungumwisa mutu nakumulingisa apwenganga wakulizakamina chikuma nakuhona kufwelela Kalunga. Mbimbiliya yahanjika mujila yachifwanyisa ngwayo vaze vafwila jimbongo “vanalituvasana vavene namakava amavulu.”—WaChimoteu 1, 6:10.

Muchima wachipululu weji kulingisanga mutu ahonenga kupwa wakusuuluka najimbongo ali najo, nakuhonanga kupwa wakuwahilila mukuyoya chenyi. “Ou azanga palata keshi kukasuuluka napalatako, kahou azanga vyuma vyavivulu keshi kukasuuluka navyakuwanyinahoko.”—Muka-kwambulula 5:10.

Vatu vavavulu vaze vanandupukila mukuhema njuka vanafu mumuheto kana. Ukalu kana uli mukaye kosena, mulifuchi lyaUnites States ukawalyo muli vatu vavavulu vaze vandupukila mukuhema njuka.

Chishimo chimwe chahanjika ngwacho: “Uswana navahasa kuuyutukila hakulivanga, Oloze kukumisa chawo kacheshi kutokwako.” (Vishimo 20:21) Kuhema njuka chinalingisa vatu vengile mumikuli, kuvahanga hamilimo, kujiha malo nausepa. Kukavangiza jindongi jamuMbimbiliya chinahase kukafwa mutu alihende kuukalu uze weji kufumanga hakuhema njuka, nakupwa wakuwahilila mukuyoya chenyi.

“Vaze veji kufwilanga kupwa naluheto veji kwingilanga mucheseko namumuheto, namukufwila cheka nacheka chamokomoko chachipi chize cheji kutwalanga vatu mukuvenyeka nakuvanongesa.”—WaChimoteu 1, 6:9