Chihula chakusaka kutachikiza numba nge Kalunga kwatwama nyi chiku chasoloka nge kavachikumbululako chipwe chapwa chamokomoko kuli vatu vavavulu. Herve uze akolelele mulifuchi lyaFrance ambile ngwenyi: “Numba tuhu kangwafwelela mukunangula chakwamba nge kakwatwama Kalungako, oloze kangwapwa ngumuka-kwitavako. Mukuyoya chami ngwalifwelela kaha ami livene. Echi kachasaka kufwelela muli Kalungako.”

Vatu veka vanahase kushinganyeka ngana muze ashinganyekelenga John wakulifuchi lyaUnited States. Ambile ngwenyi: “Vangulelele kuli visemi vaze kavafwelelele muli Kalungako. Muukweze wami kangwashinganyekelenga ngwami Kalunga kwatwamako. Chipwe ngocho, lwola lumwe ngwashinganyekele chikuma hachuma kanechi.”

Kutala mwashinganyekaho lyehi ngwenu Kalunga kwatwama, kaha nawa kuyoya kuchatwama tahi? Pamo mwawanaho lyehi unjiho uze wapwa waukalu kwivwishisa kutalisa kukupwako chaTengi, wakufwana nge unjiho wasayasi uze wavuluka nge kuyoya chalijila chivene hano hamavu naunjiho wakuvuluka nge kuyoya kachafuma kuvyuma vyakuhona kuyoyako.—Talenu lipwata lyakuvuluka ngwavo “ Kekesenu Unjiho.”

Talenu unjiho waulemu uze vanavuluka helu. Unjiho kana unafwane nge katachikijilo kaze kanenyika kuchihela chimwe chachilemu. Nge namuwana unjiho wamwaza wakusolola nge Kalunga kwatwama namijimbu yeka yize yahanjika hali ikiye, kaha namunganyala vyavivulu. Vyakutalilaho vyaunjiho kana viwana vino:

Nge kuyoya chikwechi ulumbunwiso waunene, kaha twatela kutachikiza ulumbunwiso kana nakutachikiza omu unahase kutukafwa. Mwomwo nge Kalunga kwatwama, oloze etu katwatachikiza ngochoko, kaha tuli nakuyoya chakuzeneka kutachikiza muchano waulemu chikuma mukuyoya chetu.

Mbimbiliya yahanjika ngwayo Kalunga ikiye Kasulu kakuyoya chosena. (Kusoloka 4:11) Uno kutachikiza chuma kana chinahase kutukafwa ngachilihi mukuyoya chetu? Talenu vyuma yanangula Mbimbiliya kutalisa kuchihande kana.

Vatu vapwa vakulipwila havyuma vyosena vize atenga Kalunga hano hamavu. Mbimbiliya yahanjika ngwayo vatutenga muchifwanyisa chaKalunga nakupwa navilinga vize atwama navyo ikiye. (Kuputuka 1:27) Kaha nawa Mbimbiliya yanangula ngwayo vatu vanahase kupwa masepa jaKalunga. (WaYakova 2:23) Kakweshi vyuma vize vinahase kulingisa kuyoya chetu chipwenga chamwaza kuhambakana kupwa nausoko naTengi yetuko.

Uno kupwa sepa lyaKalunga chalumbununa ika? Masepa jaKalunga veji kuhanjikanga naikiye namuchima wakukasunuka. Kaha Kalunga avashika ngwenyi mwavevwililanga nakuvakafwa. (Samu 91:15) Etu masepa jaKalunga tunahase kutachikiza vishinganyeka vyenyi kutalisa kuvihande vyavivulu. Echi chinahase kutuhana chinyingi chakutachikiza mwakukumbulwila vihula vyavilemu chikuma vyakutalisa kukuyoya chetu.

Chakutalilaho, vatu vamwe cheji kuvakaluhwilanga kufwelela muli Kalunga mwomwo yaukalu vali nakumona mukaye. Kaha veji kuhulisanga ngwavo, ‘Mwomwo ika Tengi wangolo josena etavishila kuyanda naupi?’

Mbimbiliya yatuvendejeka ngwayo Kalunga kasakile ngwenyi vatu vayandengako. Omu Kalunga atengele mutu watete, kakwapwile kuyandako. Nakufwa vene kachapwile kujina chaKalungako. (Kuputuka 2:7-9, 15-17) Uno echi chapwa chachikalu kuchifwelela tahi? Nyi hivilota kaha tahi? Nduma. Nge Tengi wangolo josena kwatwama, kaha nawa nge atwama nazangi, kaha chikupu vene echi chikiko kuyoya navakapwa nacho vatu kulutwe.

Vyuma muka vyaneha kuyanda chize vali nakumona vatu makumbi ano? Mbimbiliya yamba ngwayo Kalunga atengele vatu nauhashi wakulisakwila vavene vyakulinga. Etu kavatushinjila kwononoka Yehovako. Vapwevo nalunga vakulivanga kuze kwafuma vatu vosena vakanyine kuvatwaminyina kuli Kalunga. Valingile mwayile muchima wavo. (Kuputuka 3:1-6, 22-24) Ngachize, nayetu tuli nakumona ukalu.

Tunahase kupwa vakuunda muvishinganyeka hakutachikiza ngwetu kuyanda chavatu kachapwa kujina chaKalungako. Oloze tuvosena twasaka kutwama chakuzeneka kuyanda. Twatela kutalilila vyuma vatushika kulutwe.

Omu vatu valikangile, Kalunga ashikile ngwenyi mwakatesamo vyuma vize ajinyine hakutenga mavu. Hakuwana nge Kalunga apwa wangolo josena, kakweshi chuma chinahase kumuhonesa kutesamo vyuma kanako. (Isaya 55:11) Kalinwomu Kalunga akumise kuyanda chosena chize chejile mwomwo yakulikanga chavatu, kaha mavu navatu navikapwa ngana muze ajinyine Kalunga hakavanga.

Uno echi chalumbununa ika kuli enu? Achitalenu hajishiko jivali hajishiko jajivulu jamuMbimbiliya jize Kalunga ashika kukatesamo kulutwe.

• HAMAVU HOSENA NAHAKAPWA KUUNDA NAKUFUMISAHO UPI WOSENA. “Mwomwo kunasale kashimbu kakandende, kaha muka-kuhuka hipimbi, naunyingilila kanawa kuze apwanga, kaha ikiye pimbiko. Oloze vavavwovu navakaswana lifuchi, navakevwanga chipepa chakuunda chachivulu.”—Samu 37:10, 11.

• KUVIZA NAKUFWA NAVAKAVIFUMISAKO. “Ava navakatwamako kaveshi kukambako ngwavo: ‘Tuli nakukola’” (Isaya 33:24) “Kufwa nachiminyi haya myaka yosena. Mwata Yehova mwakahunda masoji kumeso avatu vosena.”—Isaya 25:8.

Mwomwo ika twatela kufwelela jishiko jaKalunga jize jatwama muMbimbiliya? Mwomwo upolofweto wauvulu wamuMbimbiliya unatesamo lyehi. Oloze lutalililo lwakukakumisa kuyanda kulutwe kalweshi kuhasa kukumisa ukalu tuli nakumona makumbi anoko. Vyuma vyeka vika vize eji kutukafwanga Kalunga?

Kalunga atuhana jindongi jakutukafwa mwakulipikila naukalu nakusakula kanawa vyakulinga. Vyuma vyavivulu tunahase kusakula kulinga vinahase kusoloka nge vyavindende, oloze vyeka vinahase kuneha ukalu wakwilila. Vatu vahano hamavu kaveshi kuhasa kutuhana mangana mujila yamwaza ngana muze eji kutuhananga mangana Tengi yetuko. Mangana aYehova apwa amwenemwene mwomwo atachikiza vyuma vize vili nakusoloka makumbi ano navize navikasoloka kulutwe. Kaha nawa eji kuhananga vatu kuyoya. Ngachize, atachikiza vyuma vyamwaza vize twasaka kuli ikiye.

MuMbimbiliya mwatwama vishinganyeka vyaYehova Kalunga kweseka namuze ahwiminyinyine vatu vakulisezaseza mangana vavisoneke. Mbimbiliya yahanjika ngwayo: “Yami Kalunga kenu Yehova, ngweji kuminangulanga nakumiwahisa, ngweji kumitwalanga jila yatela kuli enu kuya.”—Isaya 48:17, 18.

Kalunga atwama nangolo jize kajakumako, kaha eji kujizachisanga mangana atukafwe. Mbimbiliya yahanjika ngwayo Kalunga apwa chisemi wazangi uze asaka kutukafwa. Yahanjika ngwayo: “Senu wamwilu mwahambakanamo chikuma kuhana shipilitu yajila kuli vaze navamulombayo.” (Luka 11:13) Ngolo kaneji jakufuma kuli Kalunga jinahase kututwaminyina nakutujikijisa.

Vyuma muka mwatela kulinga hakusaka Kalunga amikafwe? Mbimbiliya yakumbulula ngwayo: “Ou mwapandama kuli ikiye, atela kwitavila ngwenyi kwali, kaha nawa ngwenyi ikiye muka-kufweta vaze vali nakumutondatonda chikuma.” (WavaHepeleu 11:6) Hakusaka mufwelele ngwenu Kalunga kwatwama, mwatela kukekesa unjiho kana enu vavene.

Numba tuhu kutachikiza muchano waKalunga cheji kumbatanga lwola, oloze munahase kunganyala nge namulinga ngocho. Talenu vyuma vyasokele kuli Xiujin Xiao uze asemukilile mulifuchi lyaChina, kaha oholyapwa ali nakutwama mulifuchi lyaUnited States. Xiujin Xiao ambile ngwenyi: “Numba tuhu ngwafwelelele mukunangula chakwamba nge vyuma vyalijilile vivene, oloze ngwafwililile chikuma kulinangula Mbimbiliya. Kaha ngwaputukile kulinangula Mbimbiliya naVinjiho jaYehova. Omu kwasalile mwaka umwe nakukumisa shikola yami, ngwapwile namilimo chikuma, kahechi changulingishile ngupwenga nalwola lwalundende lwakulinangula Mbimbiliya. Oloze kangwasuulukileko. Omu ngwaputukile kuhaka muchima kukulinangula Mbimbiliya, ngwasuulukile jino.”

Kutala muli nakusaka kulinangula vyavivulu kutalisa kuli Tengi yetu Yehova Kalunga tahi? Nge mukiko, kaha wanenu lwola lwakuhehwojola?